ສູນກາງແນວລາວສ້າງຊາດຈັດກິດຈະກຳບໍລິຈາກເລືອດຕ້ອນຮັບວັນສ້າງຕັ້ງຄົບຮອບ 70 ປີ
ໃນວັນທີ 6 ກຸມພານີ້, ສູນກາງແນວລາວສ້າງຊາດ ຮ່ວມກັບອົງການກາແດງລາວ ໄດ້ຈັດກິດຈະກຳຮັບບໍລິຈາກເລືອດ ພາຍໃຕ້ຄຳຂວັນ: ການບໍລິຈາກເລືອດແມ່ນຮັກຊາດ ແລະ ພັດທະນາ ເພື່ອຂໍ່ານັບຮັບຕ້ອນວັນສ້າງຕັ້ງສູນກາງແນວລາວສ້າງຊາດຄົບຮອບ 70 ປີ ຂຶ້ນທີ່ສຳນັກງານໃຫຍ່ອົງການດັ່ງກ່າວ ໂດຍການເຂົ້າຮ່ວມເປີດພິທີຂອງທ່ານ ຈັນທະວົງ ແສນອາໝາດມົນຕີ ຮອງປະທານສູນກາງແນວລາວສ້າງຊາດ, ທ່ານ ສິງ ເມໂນລາດ ຮອງປະທານອົງການກາແດງລາວ ພ້ອມດ້ວຍພະນັກງານອ້ອມຂ້າງ ແລະ ກຳລັງນັກຮົບທະຫານ, ຕຳຫຼວດຈາກກົມກອງຕ່າງໆເຂົ້າຮ່ວມເປັນຈຳນວນຫລາຍ.
ທ່ານຮອງປະທານສູນກາງແນວລາວສ້າງຊາດ ກ່າວໃນພິທີວ່າ: ໃນໄລຍະ 3 ປີຜ່ານມາ ສູນກາງແນວລາວສ້າງຊາດ ແລະ ສູນເລືອດແຫ່ງຊາດ ໄດ້ຈັດຂະບວນການຮັບບໍລິຈາກເລືອດໃນວັນສຳຄັນຕ່າງໆຂອງຊາດຢ່າງຕໍ່ເນື່ອງ ເປັນການປຸກລະດົມໃຫ້ຜູ້ເຂົ້າຮ່ວມໄດ້ສະແດງເຖິງຄວາມກ້າຫານ ນ້ຳໃຈເສຍສະຫຼະເຂົ້າໃນວຽກງານຊ່ວຍເຫຼືອເພື່ອນມະນຸດດ້ວຍກັນ ເພື່ອໃຫ້ມີເລືອດຕອບສະໜອງໃຫ້ຄົນເຈັບຢ່າງພຽງພໍ ປອດໄພ ແລະ ທັນເວລາ ແລະ ສໍາລັບກິດຈະກໍາຄັ້ງນີ້ ສູນກາງແນວລາວສ້າງຊາດໄດ້ເຊີນຊວນພະນັກງານຈາກບັນດາກະຊວງ, ອົງການຈັດຕັ້ງມະຫາຊົນ, ພະນັກງານທະຫານ-ຕຳຫຼວດຈາກກົມກອງຕ່າງໆ, ນັກຮຽນ-ນັກສຶກສາ ເຂົ້າຮ່ວມບໍລິຈາກເລືອດຫຼາຍກວ່າ 400 ຄົນ ແລະ ຄາດວ່າຈະໄດ້ຮັບການບໍລິຈາກເລືອດໄດ້ຫຼາຍກວ່າ 200 ຖົງ.
