ຜູ້ນຳປາແລັສຕິນຍ່າງອອກຈາກ ກອງປະຊຸມສະພາຄວາມໝັ້ນຄົງ ສປຊ

ປະທານາທິບໍດີປາ​ແລັສຕິນ ກ່າວ​ຕໍ່​ກອງ​ປະຊຸມ​ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະຊາ​ຊາດ ສະ​ເໜີ​ການ​ໃຊ້​ກົນ​ໄກ​ລະຫວ່າງ​ປະ​ເທດ​ແບບ​ພະຫຸ​ພາຄີ ​ເພື່ອ​ປະສິດທິພາບ​ຂອງ​ການ​ສ້າງສັນ​ຕິ​ພາບ​ກັບ​ອິດສະ​ລາ​ແອນ ກ່ອນ​ລຸກ​ອອກ​ຈາກ​ກອງ​ປະຊຸມທັນທີ.

WATCH: Israel Amb. Danon accuses Palestinian Pres. Abbas of "running away" after Abbas departs moments after giving his speech at the UN Security Council. pic.twitter.com/LpYAcHosEr

— NBC News World (@NBCNewsWorld) February 20, 2018

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນ​ນິວຢອກ ປະ​ເທດ​ສະຫະລັດ​ອາ​ເມ​ລິ​ກາ ​ໃນ​ວັນ​ທີ 21 ກຸມພາ​ວ່າ: ປະທານາທິບໍດີ ມາ​ມຸດ ອັບ​ບັດ ກ່າວ​ຖະ​ແຫລ​ງຕໍ່​ກອງ​ປະຊຸມ​ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະຊາ​ຊາດ (UNSC) ​ໃນ​ວັນ​ທີ 20 ກຸມພາ ສະ​ເໜີ​ໃຫ້​ມີ​ການ​ຈັດ​ກອງ​ປະຊຸມ​ສັນຕິພາບ​ລະຫວ່າງ​ປະ​ເທດ​ພາຍ​ໃນ​ກາງ​ປີ​ນີ້ ​ເຊິ່ງຈະ​ເປັນ​ກົນ​ໄກ​ແບບ​ພະຫຸ​ພາຄີ ​ເພື່ອ​ປູ​ທາງ​ສູ່​ການ​ຮື້ຟື້ນການ​ເຈລະຈາ​ສັນຕິພາບ​ລະຫວ່າງ​ປາ​ແລັສຕິນກັບ​ອິດສະ​ລາ​ແອນ ​ເຊິ່ງຢຸດ​ສະ​ງັກນັບ​ແຕ່​ປີ 2014 ​ແລະ ຕັ້ງຄຳ​ຖາມ​ກ່ຽວ​ກັບ “ຄວາມ​ຈິງ​ໃຈ” ຂອງ​ອາ​ເມ​ລິ​ກາທີ່​ມີ​ຕໍ່​ແນວທາງ​ສອງ​ລັດ ​ເພື່ອ​ແກ້​ໄຂ​ຄວາມ​ຂັດ​ແຍ່ງ​ລະຫວ່າງ​ປາ​ແລັສຕິນກັບ​ອິດສະ​ລາ​ແອນ, ພ້ອມ​ທັງ​ປະນາມ​ການ​ທີ່​ລັດຖະບານ​ວໍ​ຊິງ​ຕັນ​ຕັດ​ເງິນ​ສະໜັບ​ສະ​ໜູນ​ດຳ​ເນີນ​ງານ​ຂອງ​ສຳ​ນັກ​ງານ​ບັນ​ເທົາ​ທຸກ ​ແລະ ຈັດ​ຫາ​ງານ​ຂອງ​ສະຫະ​ປະຊາ​ຊາດ​ສຳລັບ​ຜູ້​ລີ້​ໄພ​ປາ​ແລັສຕິນ​ໃນ​ຕາ​ເວັນ​ອອກ​ໃກ້ (UNRWA) ທັງ​ທີ່​ເປັນ​ໜ່ວຍ​ງານ​ທີ່​ອາ​ເມ​ລິ​ກາ​ຮ່ວມ​ສ້າງຕັ້ງ.

ຂະນະ​ດຽວ​ກັນ, ທ່ານ ອັບ​ບັດ ກ່າວ​ເນັ້ນການ​ເດີນ​ໜ້າ​ຄວາມ​ພະຍາຍາມ​ທາງ​ການ​ທູດ​ຂອງ​ປາ​ແລັສຕິນ ​ເພື່ອ​ໃຫ້​ໄດ້​ຮັບ​ການ​ຍອມຮັບ​ຈາກ​ສະມັດຊາ​ໃຫຍ່​ສະຫະ​ປະຊາ​ຊາດ (UNGA) ​ໃນ​ຖານະ​ລັດ​ສະມາຊິກ ຫລັງ​ໄດ້​ຮັບ​ການ​ຍອມຮັບ​ຈາກ UNGA ​ໃນ​ຖານະ​ລັດ​ຜູ້​ສັງ​ເກດ​ການ​ທີ່​ບໍ່​ແມ່ນ​ສະມາຊິກ ​​ໃນ​ເດືອນ​ພະຈິກ 2012 ​ເຊິ່ງ​ເປັນ​ສະຖານະ​ທີ່​ທຽບ​ເທົ່າ​ນະຄອນ​ລັດ​ວາ​ຕິ​ກັນ ​ແລະ ກ່າວ​ວ່າ: ນັບ​ແຕ່​ປີ 1948 ​ເປັນຕົ້ນມາ, UNSC ຜ່ານ​ມະຕິ​ສະໜັບສະໜູນ​ປາ​ແລັສຕິນ​ແລ້ວ 86 ສະບັບ, ​ແຕ່​ບໍ່​ເຄີຍ​ມີ​ການ​ຍົກ​ເອົາ​ຄຳ​ສັ່ງ​ຈາກ​ມະຕິ​ໃດ​ກໍ​ຕາມ​ມາ​ດຳ​ເນີນ​ການ​ພຽງ​ແຕ່​ຄັ້ງດຽວ ​ແລະ ​ໃຫ້​ເຫດຜົນ​ວ່າ​ນັ້ນ​ເປັນ​ເພາະ​ມີ​ການ​ສະໜັບສະໜູນ​ໃຫ້​ອິດສະ​ລາ​ແອນ “​ເປັນ​ລັດ​ເໜືອ​ກົດໝາຍ”. ຖື​ເປັນ​ເທື່ອ​ທຳ​ອິດ​ນັບ​ແຕ່​ປີ 2009 ທີ່​ຜູ້ນຳ​ປາ​ແລັສຕິນກ່າວ​ຖະ​ແຫລ​ງຕໍ່​ກອງ​ປະຊຸມ UNSC. ​ເຖິງ​ຢ່າງ​ໃດ​ກໍ​ຕາມ, ທ່ານ ອັບ​ບັດ ລຸກ​ອອກ​ຈາກ​ຫ້ອງ​ປະຊຸມ​ທັນທີ​ທີ່​ສຳ​ເລັດ​ການ​ຖະ​ແຫລ​ງຂອງ​ຕົນ.