ມຽນມາຫ້າມຜູ້ແທນດ້ານສິດທິມະນຸດ ຂອງສະຫະປະຊາຊາດເຂົ້າປະເທດ

ທ່ານ​ນາງ ລີ ຢາງ​ຮີ ຜູ້​ແທນ​ພິ​ເສດ​ຂອງ​ສະຫະ​ປະຊາ​ຊາດ ກ່າວ​ວ່າ: ທາງ​ການ​ມຽນມາ​ແຈ້ງ​ຕໍ່​ຄະນະ​ກຳມະການ​ສອບ​ສວນ​ອິດສະຫລະ​ດ້ານ​ສິດທິ​ມະນຸດສະຫະ​ປະຊາ​ຊາດວ່າ: ຈະ​ບໍ່​ໃຫ້ການ​ຮ່ວມ​ມື ​ແລະ ບໍ່​ອະນຸຍາດ​ໃຫ້​ນາງ​ເດີນທາງ​ເຂົ້າປະ​ເທດ​ຕະຫລອດ​ວາລະ​ໃນ​ການ​ດຳລົງ​ຕຳ​ແໜ່​ງຂອງ​ນາງ.

ຜູ້​ແທນ​ພິ​ເສດ ສປຊ ​ເຊິ່ງ​ເປັນ​ຊາວ ສ.​ເກົາຫລີ ກ່າວ​ວ່າ: ນາງ​ມີ​ກຳນົດ​ເດີນທາງ​ຢ້ຽມຢາມ​ມຽນມາ​ເດືອນ​ມັງກອນ ​ເພື່ອ​ຕີ​ລາຄາ​ສະຖານະ​ການ​ດ້ານ​ສິດທິ​ມະນຸດ​ທົ່ວ​ປະ​ເທດ​ມຽນມາ ​ເຊິ່ງລວມທັງ​ຂໍ້​ກ່າວ​ຫາ​ລະ​ເມີດ​ສິດທິ​ຊາວ​ມຸດ​ສະ​ລິ​ມ​ໂຣຮິງ​ຢາ​ໃນ​ລັດ​ຍະ​ໄຂ່. ນາງ ລີ ກ່າວ​ວ່າ: ການ​ປະກາດ​ບໍ່​ໃຫ້ການ​ຮ່ວມ​ມື​ກັບ​ຄະນະ​ເຮັດ​ວຽກ​ດ້ານ​ສິດທິ ​ເປັນ​ເຄື່ອງ​ບົ່ງ​ບອກ​ໄດ້​ຢ່າງ​ຈະ​ແຈ້ງວ່າ: ສະຖານະ​ການ​ໃນ​ລັດ​ຍະ​ໄຂ່​ອາດ​ຈະ​ຮ້າຍ​ແຮງ ລວມທັງ​ບ່ອນ​ອື່ນໆ​ໃນ​ມຽນມາ.