ອິດສະລາແອນສັ່ງອົບພະຍົບປະຊາຊົນທາງຕອນໃຕ້ຂອງເຂດກາຊາ ຍົກລະດັບການສູ້ຮົບຫລັງການເຈລະຈາຢຸດຍິງລົ້ມເຫລວ
ກອງທັບອິດສະລາແອນສັ່ງອົບພະຍົບປະຊາຊົນໃນຫລາຍເມືອງທາງຕອນໃຕ້ຂອງເຂດກາຊາ, ພ້ອມຍົກລະດັບການສູ້ຮົບ ແລະ ການໂຈມຕີທາງອາກາດ ຫລັງຄວາມພະຍາຍາມໃນການເຈລະຈາຂະຫຍາຍໄລຍະເວລາຢຸດຍິງຊົ່ວຄາວບໍ່ປະສົບຜົນສໍາເລັດ ທ່າມກາງສຽງຂອງປະຊາຄົມໂລກທີ່ຮຽກຮ້ອງໃຫ້ມີການຄຸ້ມຄອງພົນລະເຮືອນ ແລະ ຫາແນວທາງຢຸດເຊົາສົງຄາມໂດຍໄວ.
ອາເມລິກາ ເຊິ່ງເປັນໜຶ່ງໃນພັນທະມິດທີ່ໃກ້ຊິດຂອງອິດສະລາແອນ ລະບຸວ່າ: ການຍົກລະດັບການສູ້ຮົບຂອງກອງທັບອິດສະລາແອນທາງຕອນໃຕ້ຂອງເຂດກາຊາບໍ່ຄວນຕັ້ງເປົ້າໝາຍ ຫລື ໂຈມຕີໃສ່ເຂດທີ່ຢູ່ອາໄສຂອງພົນລະເຮືອນ ຄືທີ່ເຄີຍເກີດຂຶ້ນທາງພາກເໜືອຂອງເຂດກາຊາກ່ອນໜ້ານີ້.
ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ ຮຽກຮ້ອງໃຫ້ກອງທັບອິດສະລາແອນຫລີກລ່ຽງການກະທໍາໃດໆທີ່ຈະເຮັດໃຫ້ສະຖານະການໂດຍລວມດ້ານມະນຸດສະທໍາຢູ່ເຂດກາຊາຮ້າຍແຮງຕື່ມ ເພື່ອເຮັດໃຫ້ພົນລະເຮືອນຊາວປາແລັສຕິນບໍ່ຕ້ອງທົນທຸກທໍລະມານຍິ່ງໄປກວ່ານີ້.
ຂະນະທີ່ທ່ານ ສຕີເຟນ ດູຈາຣິກ ໂຄສົກສະຫະປະຊາຊາດ ລະບຸວ່າ: ເລຂາທິການສະຫະປະຊາຊາດຕົກໃຈຕໍ່ການກັບມາເປັນປໍລະປັກກັນອີກຂອງກອງທັບອິດສະລາແອນ ແລະ ກຸ່ມຮາມັດ, ສ່ວນພົນລະເຮືອນທີ່ໄດ້ຮັບຄໍາສັ່ງໃຫ້ອົບພະຍົບນັ້ນກໍໜ້າເປັນຫ່ວງ ເນື່ອງຈາກບໍ່ມີສະຖານທີ່ໃດປອດໄພ ແລະ ໂອກາດຈະລອດຊີວິດກໍມີໜ້ອຍ.
ກອງທັບອິດສະລາແອນຢຶດຄອງພື້ນທີ່ສ່ວນຫລາຍທາງຕອນເໜືອຂອງເຂດກາຊາ ນັບແຕ່ຕອບໂຕ້ກັບການໂຈມຕີຂອງກຸ່ມຮາມັດໃນຕົ້ນເດືອນຕຸລາຜ່ານມາ ໂດຍປະກາດໃຫ້ພົນລະເຮືອນຊາວປາແລັສຕິນອົບພະຍົບອົງມາຕອນໃຕ້ຂອງເຂດກາຊາເພື່ອຄວາມປອດໄພ ກ່ອນຈະສັ່ງໃຫ້ມີການອົບພະຍົບອອກຈາກຫລາຍເມືອງທາງຕອນໃຕ້ຂອງເຂດກາຊາໃນປັດຈຸບັນ.
ຫລາຍຝ່າຍເບິ່ງວ່າ: ກອງທັບອິດສະລາແອນຕ້ອງການປາບປາມກຸ່ມຮາມັດຢ່າງຈິງຈັງ ແລະ ກໍາລັງພະຍາຍາມສ້າງຫລັກປະກັນວ່າ: ເຂດກາຊາຈະບໍ່ເປັນໄພຄຸກຄາມຕໍ່ພົນລະເຮືອນອິດສະລາແອນອີກໃນອະນາຄົດ.
ອ້າງອີງ:
- www.reuters.com/world/middle-east/israel-intensifies-southern-gaza-offensive-us-un-urge-civilian-protections-2023-12-05/
- www.bbc.com/news/world-middle-east-67614711
- www.france24.com/en/middle-east/20231204-%F0%9F%94%B4-live-israel-bombs-gaza-launches-ground-invasion-despite-calls-to-protect-civilians
