ມຽນມາ ພົບຜູ້ຕິດເຊື້ອໂຄວິດເພີ່ມ 23 ຄົນ ເປັນແຮງງານທີ່ກັບມາຈາກໄທ ແລະ ມາເລເຊຍ

ສຳນັກຂ່າວມຽນມາທາມລາຍງານວ່າ: ຈາການເປີດເຜີຍຂອງກະຊວງສາທາລະນະສຸກ ມຽນມາ ໃນວັນທີ 19 ມິຖຸນານີ້ ລະບຸວ່າ ມຽນມາພົບຜູ້ຕິດເຊື້ອໂຄວິດ-19 ເພີ່ມຈຳນວນ23 ຄົນ ເປັນແຮງງານທີ່ກັບມາຈາກໄທ ແລະ ມາເລເຊຍ, ໂດຍຜ່ານດ່ານບໍລິເວນຊາຍແດນຈັງຫວັດຕາກ ເມື່ອວັນທີ 8 ມິຖຸນາຜ່ານມາ ຖືວ່າເປັນການພົບຜູ້ຕິດເຊື້ອເພີ່ມຈຳນວນສູງສຸດຮອບ 3 ເດືອນ, ສົ່ງຜົນໃຫ້ຕົວເລກຜູ້ຕິດເຊື້ອສະສົມເປັນ 286 ຄົນ, ປິ່ນປົວຫາຍດີ 177 ຄົນ ແລະ ເສຍຊີວິດ 6 ຄົນ.

ລາຍງານລະບຸວ່າ: ຜູ້ຕິດເຊື້ອເພີ່ມ 23 ຄົນນັ້ນ ໃນຈຳນວນດັ່ງກ່າວ 19 ຄົນ ເປັນແຮງງານທີ່ກັບມາຈາກໄທ, ເດີນທາງຜ່ານດ່ານຊາຍແດນຈັງຫວັດຕາກໄປຫາຝັ່ງມຽວດີ 18 ຄົນ ແລະ ຜ່ານຈັງຫວັດຣະນອງ 1 ຄົນ. ສ່ວນ 4 ຄົນແມ່ນກັບມາຈາກມາເລເຊຍ ໂດຍຂະນະນີ້ 23 ຄົນຖືກກັກກັນບໍລິເວນຢູ່ສູນກັກກັນເຂດອຸດສາຫະກຳໃນເມືອງພະອັນ ເປັນເມືອງເອກຂອງລັດກະຍີນ ຕິດກັບຊາຍແດນໄທບໍລິເວນຈັງຫວັດຕາກ ກ່ອນຈະກຽມສົ່ງໄປປິ່ນປົວຢູ່ໂຮງໝໍໃນນະຄອນຫລວງຢ່າງກຸ້ງ.