ເຈົ້າໜ້າທີ່ ໄຊຍະບູລີ ສຶກສາອົບຮົມນັກຂັບຂີ່ດັດແປງສະພາບເຕັກນິກລົດ

ເມື່ອບໍ່ດົນມານີ້, ເຈົ້າໜ້າທີ່ກອງບັນຊາການປກສເມືອງ ແລະ ແຂວງໄຊຍະບູລີ ເຊີນຜູ້ປົກຄອງຂອງນັກຂັບຂີ່ຈໍານວນໜຶ່ງເພື່ອມາຮັບຮູ້ການກ່າວເຕືອນສຶກສາອົບຮົມລູກຫລານຂອງເຂົາເຈົ້າຈາກເຈົ້າໜ້າທີ່, ຫລັງຈາກໄວລຸ້ນດັ່ງກ່າວມີພຶດຕິກໍາສ້າງຄວາມບໍ່ເປັນລະບຽບຮຽບຮ້ອຍໃນສັງຄົມດ້ວຍການດັດແປງສະພາບເຕັກນິກລົດແລະຂັບຂີ່ເປັນພຶງເປັນແພສ້າງສຽງດັງເນືອງນັນສັງຄົມແລະຖືກເຈົ້າໜ້າທີ່ກັກຕົວໄດ້ໃນເສັ້ນທາງຕ່າງໆໃນເທສະບານ,ເຊິ່ງຜິດລະບຽບກົດໝາຍບ້ານເມືອງແລະຖືກປັບໄໝຕາມດໍາລັດ 188/ນຍ, ໂດຍສະເພາະຂັບຂີ່ລົດເກີນກໍານົດ, ຂັບລົດແຂ່ງກັນໂດຍບໍ່ໄດ້ຮັບອະນຸຍາດ, ດັດແປງສະພາບເຕັກນິກລົດ, ເອກະສານບໍ່ຄົບຖ້ວນແລະລະເມີດລະບຽບຈະລາຈອນແມ່ນຈະຖືກປັບໄໝຕາມລະບຽບກົດໝາຍ.

ໃນໂອກາດນີ້, ເຈົ້າໜ້າທີ່ໄດ້ເຕືອນໄວລຸ້ນທີ່ລະເມີດລະບຽບຄັ້ງນີ້, ໃຫ້ຢຸດເຊົາພຶດຕິກໍາທີ່ບໍ່ເໝາະສົມດັ່ງກ່າວແລະຕັ້ງໜ້າຝຶກຝົນຕົນເອງເປັນລູກທີ່ດີຂອງພໍ່ແມ່, ເປັນຄົນດີຂອງສັງຄົມແລະເອົາໃຈໃສ່ເຄົາລົບລະບຽບກົດໝາຍບ້ານເມືອງ, ພ້ອມທັງຮຽກຮ້ອງໃຫ້ຜູ້ປົກຄອງເອົາໃຈໃສ່ສຶກສາອົບຮົມລູກຫລານຂອງຕົນເລື້ອຍໆ ເພື່ອໃຫ້ເຂົາເຈົ້າເປັນຄົນດີແລະປະຕິບັດລະບຽບກົດໝາຍຢ່າງເຂັ້ມງວດ.