ອິນເດຍເຜີຍແຜນຫລຸດມົນລະພິດໃນອາກາດ

     ລັດຖະບານ​ອິນ​ເດຍ​ເປີດ​ເຜີຍ​ແຜນ​ຫລຸດ​ບັນຫາມົນ​ລະ​ພິດ​ໃນ​ອາກາດ ​ແລະ ພັດທະນາ​ໂຄງ​ລ່າງ​ພື້ນຖານ​ສຳລັບ​ຮອງ​ຮັບ​ລົດ​ພະລັງງານ​ໄຟຟ້າ ລວມມູນ​ຄ່າ 885.000 ລ້ານຣູປີ.

     ລັດຖະບານ​ອິນ​ເດຍຕັ້ງ​ເປົ້າຈະ​ພະຍາຍາມ​ຫລຸດ​ປະລິມານ​ການ​ປ່ອຍ​ກຳ​ມະ​ຖັນ​ຈາກ​ໂຮງ​ໄຟຟ້າ, ຂະນະ​ທີ່​ເມືອງ​ຕ່າງໆ​ປະມານ 70 ​ເມືອງ​ຈະ​ມີ​ໂຄງ​ລ່າງ​ພື້ນຖານ​ສຳລັບ​ຮອງ​ຮັບ​ລົດ​ພະລັງງານ​ໄຟຟ້າ​ເພີ່ມ​ໃນ 5 ປີ. ທັງ​ນີ້ ຄາດ​ວ່າ​ໂຮງ​ໄຟຟ້າ​ພະລັງງານ​ຄວາມ​ຮ້ອນ​ເປັນສາ​ເຫດ​ຂອງ​ການ​ປ່ອຍ​ມົນ​ລະ​ພິດ​ຈາກ​ອຸດສາຫະກຳ​ໃນ​ອິນ​ເດຍ​ເຖິງ 80%, ມົນ​ລະ​ພິດ​ທາງ​ອາກາດ​ໃນ​ນະຄອນຫລວງ​ນິວ​ເດ​ລີ​ເພີ່ມ​ສູງ​ຂຶ້ນຈົນ​ເຖິງ​ລະດັບ​ທີ່​ເປັນ​ອັນຕະລາຍ​ຕໍ່​ສຸຂະພາບ​ຢ່າງ​ຕໍ່​ເນື່ອງ ​ເຮັດ​ໃຫ້​ເກີດ​ສຽງ​ຮຽກຮ້ອງ​ໃຫ້​ມີ​ການ​ປ່ຽນ​ແປງ​ແກ້​ໄຂ​ຢ່າງ​ຮີບ​ດ່ວນ.

      ລາຍ​ງານ​ຂອງ​ອົງການ​ອະນາ​ໄມ​ໂລກ ລະບຸ​ວ່າ: ​ໃນ​ຈຳນວນ 10 ​ເມືອງ​ທີ່​ເຕັມ​ໄປ​ດ້ວຍ​ມົນ​ລະ​ພິດ​ຫລາຍ​ທີ່​ສຸດ​ໃນ​ໂລກ ມີ​ເຖິງ 9 ​ເມືອງ​ຢູ່​ໃນ​ອິນ​ເດຍ.