ຜູ້ຍິງໄອຣິຊ 2.505 ຄົນແກ້ເສື້ອຜ້າ ລົງນ້ຳທຳລາຍສະຖິຕິໂລກໃໝ່
ຜູ້ຍິງຊາວໄອຣິຊ 2.505 ຄົນ ແກ້ເສື້ອຜ້າລົງນ້ຳທະເລທີ່ຫາດສ່ວນຕົວແຫ່ງໜຶ່ງທາງໃຕ້ຂອງນະຄອນຫລວງດັບລິນ ໃນວັນທີ 9 ມິຖຸນາ ເພື່ອສ້າງສະຖິຕິໂລກຫາເງິນຊ່ວຍການກຸສົນໃຫ້ອົງການຕໍ່ຕ້ານພະຍາດມະເຮັງສຳລັບເດັກ.
ສຳນັກຂ່າວຕ່າງປະເທດລາຍງານວ່າ: ທ່ານນາງ ລູເຊຍ ຊິນິກາກລີຊີ ເຈົ້າໜ້າທີ່ຂອງກິນເນສ ເວິລ ເຣດຄອດ ເຊິ່ງເຮັດໜ້າທີ່ວິນິດໄສເລື່ອງການແກ້ເຄື່ອງລອຍນ້ຳ ເປີດເຜີຍວ່າ: ຜູ້ຍິງຊາວໄອຣິຊ 2.505 ຄົນ ໄດ້ຍອມແກ້ເສື້ອຜ້າລົງລອຍນ້ຳໂດຍແຊ່ຢູ່ໃນນ້ຳ 5 ນາທີ ຂອງກິດຈະກຳແກ້ເຄື່ອງລອຍນ້ຳທະເລໃຫ້ໄດ້ຫລາຍທີ່ສຸດ ຢູ່ຫາດແມກີຣາມໍ ທາງໃຕ້ຂອງນະຄອນຫລວງດັບລິນ ໃນວັນທີ 9 ມິຖຸນາ ຖືເປັນສະຖິຕິໂລກໃໝ່.
ສ່ວນສະຖິຕິເກົ່ານັ້ນເກີດຂຶ້ນຢູ່ລັດເວສເທິນ ອົດສະຕຣາລີ ໃນປີ 2015 ເປັນຜູ້ເຂົ້າຮ່ວມກິດຈະກຳ 786 ຄົນ ເຊິ່ງແກ້ເຄື່ອງລອຍນ້ຳທະເລ ເພື່ອສົ່ງເສີມພາບພົດໃນທາງບວກຂອງຮູບຮ່າງ ເຊິ່ງອຸນຫະພູມນ້ຳທະເລໃນຕອນນັ້ນປະມານ 23 ອົງສາ, ແຕ່ອຸນຫະພູມນ້ຳທະເລທີ່ຫາດແມກີຣາມໍປະມານ 12 ອົງສາ.
ສຳລັບກິດຈະກຳໃນປີນີ້ຍັງຈະເປັນການລະດົມທຶນເພື່ອຫາເງິນເຂົ້າອົງການການກຸສົນຕໍ່ຕ້ານພະຍາດມະເຮັງສຳລັບເດັກຊື່ ອອຍບີອານພິງ ໄທ ເຊິ່ງສ້າງຕັ້ງຂຶ້ນໃນປີ 2010 ໂດຍທ່ານ ມິດ ຣອດຟອດ ແລະ ທ່ານ ຈິມມີ ນໍແມນ ຫລັງການເສຍຊີວິດຂອງລູກສາວທ່ານ ຈິມມີ ນໍແມນ ເຊິ່ງມີຊື່ວ່າ ອອຍບີອານ ເດັກຍິງອາຍຸ 8 ປີທີ່ເສຍຊີວິດຈາກພະຍາດມະເຮັງ.
