ສາທາເປີດສາຍດ່ວນ 166 ໃຫ້ຄຳປຶກສາພະຍາດໄຂ້ຍຸງ
ກະຊວງ ສາທາລະນະສຸກ ໃຫ້ຮູ້ວ່າ: ປັດຈຸບັນ ໄດ້ເປີດສາຍດ່ວນ 166 ສຳລັບໃຫ້ບໍລິການປະຊາຊົນໃນການປຶກສາພະຍາດໄຂ້ຍຸງ ແລະ ອື່ນໆ ເພື່ອສະກັດກັ້ນ ການລະບາດພະຍາດດັ່ງກ່າວໃຫ້ລຸດລົງ. ສະເພາະໃນປີຜ່ານມາ, ທົ່ວປະເທດມີຜູ້ຕິດເຊື້ອພະຍາດໄຂຍຸງ ຫລາຍກວ່າ 11.00 ກໍລະນີ, ມີຜູ້ເສຍຊີວິດ 14 ຄົນ, ທຽບໃສ່ປີ 2016 ແມ່ນມີຈຳນວນເພີ່ມຂຶ້ນຫລາຍ.
ທ່ານ ດຣ. ອ່ອນຈັນ ແກ້ວສະຫວັນ ຫົວໜ້າສູນວິເຄາະ ແລະ ລະບາດວິທະຍາ (ສວລ) ກະຊວງສາທາລະນະສຸກ ໃຫ້ຮູ້ວ່າ: ພຽງ 4 ເດືອນຕົ້ນປີນີ້, ທົ່ວປະເທດມີຈໍານວນຜູ້ຕິດເຊື້ອໄຂ້ເລືອດອອກແລ້ວເກືອບ 500 ກໍລະນີ ແລະ ມີຜູ້ເສຍຊີວິດ 1 ຄົນ. ໃນນັ້ນ, ແຂວງອັດຕະປື ມີຕົວເລກຜູ້ຕິດເຊື້ອ 257 ກໍລະນີ ແລະ ເສຍຊີວິດ 1 ຄົນ, ຮອງລົງມາແມ່ນນະຄອນຫລວງວຽງຈັນມີ 54 ກໍລະນີ, ຈຳປາສັກ 53 ກໍລະນີ ແລະ ແຂວງອື່ນໆອີກຈໍານວນໜຶ່ງ.
ແນວໃດກໍຕາມ ເພື່ອສະກັດກັ້ນບັນຫາດັ່ງກ່າວ ສູນວິເຄາະ ແລະ ລະບາດວິທະຍາ ( ສວລ ) ແມ່ນການຈັດຕັ້ງດ້ານວິຊາການຂອງກະຊວງສາທາລະນະສຸກ ພາຍໃຕ້ການຄຸ້ມຄອງມະຫາພາກຂອງກົມຄວບຄຸມພະຍາດຕິດຕໍ່ ໄດ້ເປີດສາຍດ່ວນ 166 ເພື່ອໃຫ້ຄຳປຶກສາແກ່ປະຊາຊົນໃນການສະກັດກັ້ນ ແລະ ປ້ອງກັນພະຍາດໄຂ້ຍຸງ ແລະ ພະຍາດອື່ນໆ. ເພື່ອເສີມສ້າງຄວາມເຂັ້ມແຂງຂອງວຽກງານສາທາລະນະສຸກໃນ ສປປ ລາວ, ຮັບປະກັນ ທາງດ້ານຄຸນນະພາບໃນການບໍລິການ, ການເຝົ້າລະວັງ, ໂຕ້ຕອບພະຍາດລະບາດຢ່າງມີປະສິດທິພາບຄື: ໃນໄລຍະລະດູຝົນນີ້ ພະຍາດທີ່ມັກລະບາດກໍ່ແມ່ນໄຂ້ຍຸງລາຍ ເຊິ່ງຫາກທ່ານໃດຄິດວ່າມີ ຄວາມສ່ຽງເປັນໄຂ້ຍຸງລາຍ ເວລາໄປກວດຢູ່ໂຮງໝໍ ຫຼື ຄລີນິກຈະຕ້ອງໄດ້ກວດ 3 ພະຍາດ ຄື: ພະຍາດໄຂ້ຍຸງລາຍ, ພະຍາດຈີກູນຄຸ້ນຢາ ແລະ ພະຍາດຊິກ້າ ຮ່ວມນຳ, ເນື່ອງຈາກທັງ 3 ພະຍາດນີ້ແມ່ນມີຍຸງເປັນພາຫະນຳເຊື້ອພະຍາດຈາກຄົນສູ່ຄົນ.
