ຊາວຊີຣີຫລັ່ງໄຫລອົບພະຍົບ ອອກຈາກເຂດກູຕາຕາເວັນອອກ

ກອງທັບຊີຣີສາມາດ​ຍຶດພື້ນທີ່​ໃນ​ເຂດ​ກູ​ຕາ​ຕາ​ເວັນ​ອອກ ທີ່ຢູ່​ນອກ​ນະຄອນຫລວງ​ດາ​ມັດ​ກັດ​ໄດ້​ຫລາຍ​ກວ່າ 70%. ຂະນະ​ທີ່​ພົນລະ​ເຮືອນ​ເກືອບ 20.000 ຄົນ ​ໄດ້​ຮັບ​ໂອກາດ​ໃຫ້​ອົບ​ພະຍົບອອກ​ຈາກ​ພື້ນທີ່ ​ແລະ ການ​ຊ່ວຍ​ເຫລືອ​ຈາກ​ພາຍ​ນອກ​ຫລັ່ງ​ໄຫລ​ເຂົ້າສູ່​ສະໜາມຣົບ​ແລ້ວ.

Civilians continue to flee war-torn Eastern Ghouta via humanitarian corridor pic.twitter.com/QpNneV5V1M

— Ruptly (@Ruptly) March 15, 2018

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ດາ​ມັດ​ກັດ ປະ​ເທດ​ຊີຣີ ​ໃນ​ວັນ​ທີ 16 ມີນາ​ວ່າ: ອົງການ​ສັງ​ເກດ​ການ​ດ້ານ​ສິດທິ​ມະນຸດ​ຊີຣີ (SOHR) ລາຍ​ງານ​ໃນ​ວັນ​ທີ 15 ມີນາ​ວ່າ: ຈຳນວນ​ຜູ້​ເສຍ​ຊີວິດ​ຈາກ​ການ​ສູ້​ຮົບ​ໃນ​ເຂດ​ກູ​ຕາ​ຕາ​ເວັນ​ອອກ ນອກ​ນະຄອນຫລວງ​ດາ​ມັດ​ກັດ ທີ່​ຍືດ​ເຍື້ອມາ​ແຕ່​ວັນ​ທີ 18 ກຸມພາ​ຜ່ານ​ມາ ມີ​ຢ່າງ​ໜ້ອຍ 1.260 ຄົນ ​ໃນ​ຈຳນວນ​ນີ້​ປະມານ 20% ​ເປັນ​ເດັກນ້ອຍ ​ແລະ ວັນ​ທີ 19 ກຸມພາ ​ເປັນ​ວັນ​ທີ່​ມີ​ຜູ້​ເສຍ​ຊີວິດ​ຫລາຍ​ທີ່​ສຸດ​ພາຍ​ໃນ​ວັນ​ດຽວ ຄື 127 ຄົນ. ຂະນະ​ທີ່​ເຮືອບິນ​ຮົບ​ຂອງ​ກອງທັບຣັດ​ເຊຍ​ເຂົ້າມາ​ປະຕິບັດ​ການ​ໃນ​ພື້ນທີ່​ນັບ​ແຕ່​ວັນ​ທີ 20 ກຸມພາ​​ເປັນຕົ້ນມາ.

ທັງ​ນີ້ ກອງທັບ​ຊີຣີສາມາດ​ຄວບ​ຄຸມພື້ນທີ່​ໃນ​ເຂດ​ກູ​ຕາ​ຕາ​ເວັນ​ອອກ ​ເຊິ່ງ​ເປັນ​ເຂດ​ອິດ​ທິພົນ​ແຫ່ງ​ສຸດ​ທ້າຍ​ຂອງ​ກຸ່ມ​ກະບົດ​ທີ່ຢູ່​ໃກ້​ກັບ​ນະຄອນຫລວງ​ດາ​ມັດ​ກັດ​ໄດ້​ແລ້ວ​ຫລາຍ​ກວ່າ 70% ກ່ອນ​ມີ​ການ​ຫລຸດ​ລະດັບ​ຄວາມ​ຮຸນ​ແຮງ​ຂອງ​ການ​ສູ້​ຮົບ​ໃນ​ບາງ​ເຂດ​ທີ່​ທະຫານ​ຝ່າຍ​ລັດຖະບານ​ເຂົ້າ​ໄປ​ຍຶດຄອງ​ໄດ້ ​ເປີດ​ທາງ​ໃຫ້​ພົນລະ​ເຮືອນ​ອົບ​ພະຍົບ​ໄດ້​ແລ້ວ​ເກືອບ 20.000 ຄົນ, ​ແຕ່​ສະຫະ​ປະຊາ​ຊາດ (UN) ຕີ​ລາຄາ​ຈຳນວນ​ປະຊາຊົນ​ຍັງ​ຄ້າງ​ຢູ່​ໃນ​ເຂດ​ກູ​ຕາ​ຕາ​ເວັນ​ອອກ​ປະມານ 400.000 ຄົນ.