UN ຂໍໃຫ້ປົກປ້ອງພົນລະເຮືອນ ແລະ ຢຸດຍິງຢູ່ຊີຣີ

      ທ່ານ ອັນ​ໂຕ​ນິ​ໂອ ກູ​ເຕີ​ເຣັສ ​ເລຂາທິການ​ສະຫະ​ປະຊາ​ຊາດ ກ່າວ​ຮຽກຮ້ອງ​ໃຫ້​ກຸ່ມ​ຕ່າງ​ຝ່າຍ​ໃນ​ການ​ສູ້​ຮົບ​ທາງ​ພາກ​ຕາ​ເວັນ​ຕົກ​ສຽງ​ເໜືອ​ຂອງ​ຊີຣີ ຊ່ວຍ​ປົກ​ປ້ອງ​ພົນລະ​ເຮືອນ ​ແລະ ​ເຄົາລົບ​ຂໍ​້ຕົກລົງ​ຢຸດ​ຍິງ.

      ກຸ່ມ​ສິດທິ​ມະນຸດ​ຢູ່​ຊີຣີທີ່​ມີ​ສຳນັກງານ​ຢູ່​ອັງກິດ ລາຍ​ງານ​ວ່າ: ການ​ປະ​ທະ​ກັນ​ສັງຫານ​ນັກຮົບ 43 ຄົນ ​ແລະ ພົນລະ​ເຮືອນ 5 ຄົນ ​ໃນ​ວັນ​ທີ 6 ພຶດສະພາ​ນີ້, ຖະ​ແຫລ​ງການ​ເລຂາ UN ​ໄດ້​ຮຽກຮ້ອງ​ໃຫ້​ທຸກ​ຝ່າຍ​ປະຕິບັດ​ຕາມ​ກົດໝາຍ​ສາກົນ​ດ້ານ​ມະນຸດສະທຳ ​ແລະ ການ​ປົກ​ປ້ອງ​ພົນລະ​ເຮືອນ. ທ່ານ ກູ​ເຕີ​ເຣັສ ຮຽກຮ້ອງ​ໃຫ້​ຫລຸດ​ຄວາມ​ຮຸນ​ແຮງ​ລົງ​ໃນ​ໄລຍະ​ເດືອນ​ລໍ​ມາດ​ອນ ​ແລະ ຂໍ​ໃຫ້​ທຸກ​ຝ່າຍ​ປະຕິບັດ​ຕາມ​ຂໍ້​ຕົກລົງ​ຢຸດ​ຍິງ​ທີ່​ໄດ້​ລົງ​ນາມ​ກັນ​ໄວ້​ໃນ​ວັນ​ທີ 17 ກັນຍາ 2018 ​ໂດຍ​ມີ​ລາຍ​ງານ​ວ່າ: ສະຖາ​ນທີ່​ບໍລິການ​ດ້ານ​ສາທາລະນະ​ສຸກ 3 ​ແຫ່ງ​ຖືກ​ໂຈມ​ຕີ​ທາງ​ອາກາດ​ໃນ​ວັນ​ທີ 5 ​ພຶດສະພາ ລວມ​ເຫດ​ໂຈມ​ຕີ​ທັງ​ໝົດ​ຢ່າງ​ໜ້ອຍ 7 ຄັ້ງນັບ​ແຕ່​ວັນ​ທີ 28 ​ເມສາ​ຜ່ານ​ມາ. ນອກຈາກ​ນີ້ ຍັງ​ມີ​ເຫດ​ໂຈມ​ຕີ​ໂຮງຮຽນ 9 ​ແຫ່ງ​ນັບ​ແຕ່​ວັນ​ທີ 30 ​ເມສາ​ຜ່ານ​ມາ ຫລາຍ​ໂຮງຮຽນ​ຕ້ອງ​ປິດ​ຖາວອນ.