ທ່ານ ຮຸນ ມາເນດ ກຽມເຈລະຈາກັບໄທຢູ່ມາເລເຊຍ ອາເມລິກາເປັນຄົນກາງ-ຜູ້ແທນຈີນເຂົ້າຮ່ວມ

            ທ່ານ ຮຸນ ມາເນດ ນາຍົກລັດຖະມົນຕີກໍາປູເຈຍ ລະບຸວ່າ: ວັນທີ 28 ກໍລະກົດ ທ່ານຈະເປັນຜູ້ນໍາຄະນະຜູ້ແທນກໍາປູເຈຍເຂົ້າຮ່ວມກອງປະຊຸມພິເສດ ຢູ່ນະຄອນຫລວງກົວລາລໍາເປີ ປະເທດມາເລເຊຍ ເຊິ່ງເປັນເຈົ້າພາບຈັດງານ ຮ່ວມກັບອາເມລິກາ ທີ່ສະເໜີເປັນຄົນກາງເຈລະຈາໄກ່ເກ່ຍຂໍ້ຂັດແຍ່ງລະຫວ່າງ ໄທ-ກໍາປູເຈຍ ໂດຍມີຜູ້ແທນຈາກຈີນເຂົ້າຮ່ວມການເຈລະຈາໃນຄັ້ງນີ້.

            ຈຸດປະສົງຂອງກອງປະຊຸມຄັ້ງນີ້ຄື: ການບັນລຸຂໍ້ຕົກລົງຢຸດຍິງທັນທີ ຕາມຂໍ້ສະເໜີຂອງທ່ານ ໂດນັລ ທຣໍາ ປະທານາທິບໍດີອາເມລິກາ ເຊິ່ງຜູ້ນໍາຂອງກໍາປູເຈຍ ແລະ ໄທຕ່າງເຫັນພ້ອມເຖິງແນວທາງດັ່ງກ່າວ.

             ທ່ານ ຮຸນ ມາເນດ ຍັງໄດ້ສະແດງຄວາມຂອບໃຈຕໍ່ທ່ານ ອັນວາ ອິບຣາຮິມ ນາຍົກລັດຖະມົນຕີມາເລເຊຍ ໃນຖານະປະທານອາຊຽນ 2025 ທີ່ໄດ້ມີບົດບາດເປັນແກນນໍາໃນການປະສານງານຈັດກອງປະຊຸມຄັ້ງນີ້.

            ສ່ວນທ່ານ ມາໂກ ຣູບິໂອ ລັດຖະມົນຕີວ່າການກະຊວງການຕ່າງປະເທດອາເມລິກາ ລະບຸວ່າ: ກໍາປູເຈຍ ແລະ ໄທ ມີກໍານົດຈະເລີ່ມການເຈລະຈາລະດັບສູງຢູ່ປະເທດມາເລເຊຍ ໂດຍເນັ້ນເຖິງເປົ້າໝາຍເພື່ອບັນລຸການຢຸດຍິງໂດຍທັນທີ.

           ຂະນະທີ່ເຈົ້າໜ້າທີ່ກະຊວງການຕ່າງປະເທດອາເມລິກາທີ່ຢູ່ມາເລເຊຍຈະຊ່ວຍສະໜັບສະໜູນຄວາມພະຍາຍາມໃນການສ້າງສັນຕິພາບຄັ້ງນີ້ ທັງທ່ານ ທຣໍາ ແລະ ທ່ານ ຣູບິໂອ ຍັງມີສ່ວນຮ່ວມໃນການເຈລະຈາກັບຄູ່ເຈລະຈາຂອງແຕ່ລະປະເທດ ແລະ ຕິດຕາມສະຖານະການຢ່າງໃກ້ຊິດ ໂດຍສະເພາະຕ້ອງການໃຫ້ຄວາມຂັດແຍ່ງນີ້ຢຸດຕິໂດຍໄວ.

ອ້າງອີງ:

• https://www.facebook.com/share/p/1B3ozPs6Ec/ 
• https://www.channelnewsasia.com/asia/cambodia-thailand-ceasefire-talks-malaysia-us-officials-5261816 
• https://www.reuters.com/world/asia-pacific/rubio-says-us-officials-are-malaysia-help-cambodia-thailand-talks-2025-07-28/