ອາເມລິກາກຽມຂຶ້ນພາສີນໍາເຂົ້າເຫລັກ ແລະ ອາລູມີນຽມເປັນ 50%
ທ່ານ ໂດນັລ ທຣໍາ ປະທານາທິບໍດີອາເມລິກາ ປະກາດວ່າ: ອາເມລິກາຈະເພີ່ມອັດຕາພາສີນໍາເຂົ້າເຫລັກ ແລະ ອາລູມີນຽມຈາກ 25% ເປັນ 50% ໂດຍຈະເລີ່ມມີຜົນນັບແຕ່ວັນທີ 4 ມິຖຸນາຕາມເວລາທ້ອງຖິ່ນ. ພ້ອມລະບຸວ່າ: ມາດຕະການນີ້ຈະຊ່ວຍກະຕຸ້ນອຸດສາຫະກໍາເຫລັກໃນປະເທດ ພ້ອມຊຸກຍູ້ໃຫ້ເຫລັກເພນຊິລເວເນຍກັບມາເປັນກະດູກສັນຫລັງຂອງອາເມລິກາອີກ, ເພີ່ມຄວາມໝັ້ນຄົງດ້ານອຸປະທານ ແລະ ຫລຸດການອາໄສຈີນ.
ທ່ານ ທຣໍາ ຍັງເປີດເຜີຍວ່າ: ມີແຜນລົງທຶນ 14,000 ລ້ານໂດລາສະຫະລັດ ໃນອຸດສາຫະກໍາເຫລັກຂອງລັດເພນຊິລເວເນຍ ຜ່ານການຮ່ວມມືລະຫວ່າງ US Steel ກັບ Nippon Steel ຂອງຍີ່ປຸ່ນໃນອະນາຄົດອັນໃກ້ ໂດຍການຮ່ວມທຶນຄັ້ງນີ້ຈະຍັງເຮັດໃຫ້ຄົນອາເມລິກາເປັນເຈົ້າຂອງ ແລະ ບໍລິຫານງານໃນອາເມລິກາ ແລະ ລັດຖະບານຈະມີສິດຢັບຢັ້ງການຫລຸດກໍາລັງການຜະລິດໃນອະນາຄົດ ເພື່ອຮັກສາວຽກ ແລະ ອຸດສາຫະກໍາເຫລັກຂອງປະເທດ.
ທ່ານ ທຣໍາ ລະບຸວ່າ: ຖ້າບໍ່ມີມາດຕະການພາສີ 25% ທີ່ທ່ານເຄີຍໃຊ້ໃນສະໄໝທໍາອິດ ໂຮງງານເຫລັກໃນເພນຊິລເວເນຍອາດບໍ່ເຫລືອຢູ່ແລ້ວ ແລະ ການເພີ່ມພາສີເປັນ 50% ຈະຍິ່ງຊ່ວຍໃຫ້ US Steel ຢູ່ລອດຕໍ່ໄປ. ພ້ອມກ່າວຕໍ່ກໍາມະກອນວ່າ: ຈະບໍ່ມີການເລີກຈ້າງ ຫລື ຍ້າຍວຽກໄປຕ່າງປະເທດເດັດຂາດ ແລະ ກໍາມະກອນທຸກຄົນຢູ່ອາເມລິກາຈະໄດ້ຮັບໂບນັດ 5,000 ໂດລາ.
ເຖິງຢ່າງໃດກໍຕາມ, ການຂຶ້ນພາສີນີ້ອາດເຮັດໃຫ້ລາຄາສິນຄ້າຕ່າງໆ ທີ່ໃຊ້ເຫລັກ ແລະ ອະລູມີນຽມເຊັ່ນ: ຍານພາຫະນະ, ກະປ໋ອງ ແລະ ເຄື່ອງຈັກອຸດສາຫະກໍາປັບສູງຂຶ້ນ.
ການປະກາດຂຶ້ນພາສີຄັ້ງນີ້ເກີດຂຶ້ນທ່າມກາງຂໍ້ຂັດແຍ່ງທາງກົດໝາຍກ່ຽວກັບຄວາມຍຸຕິທໍາຂອງມາດຕະການພາສີລະຫວ່າງປະເທດທີ່ທ່ານ ທຣໍາ ໃຊ້ ໂດຍສານອຸທອນອະນຸຍາດໃຫ້ມາດຕະການດັ່ງກ່າວຍັງດໍາເນີນຕໍ່ໄປ ເຖິງວ່າສານການຄ້າສາກົນ (CIT) ຈະເຄີຍສັ່ງໃຫ້ຢຸດການເກັບພາສີເຫລົ່ານີ້ແລ້ວກໍຕາມ.
ອ້າງອີງ:
- https://www.bbc.com/news/articles/cy0k5x21y35o
- https://www.nytimes.com/2025/05/30/us/politics/trump-steel-tariffs-nippon.html
- https://www.reuters.com/business/trump-says-he-plans-double-steel-tariffs-50-2025-05-30/
- https://edition.cnn.com/2025/05/30/business/trump-announces-50-percent-steel-tariff
