ປກສ ນະຄອນປາກເຊ ກະກຽມຄວາມພ້ອມໃນການປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍ ໄລຍະປີໃໝ່ສາກົນ
ພັທ ຂັນທອງ ໄຊຍະວົງ ຮອງພະແນກຕໍາຫຼວດ ກອງບັນຊາການ ປກສ ນະຄອນປາກເຊ ໃຫ້ສໍາພາດໃນວັນທີ 28 ທັນວາ 2023 ວ່າ: ໂດຍປະຕິບັດຕາມທິດຊີ້ນຳຂອງກອງບັນຊາການປ້ອງກັນຄວາມສະຫງົບ (ປກສ) ແຂວງຈຳປາສັກ ກໍຄືແຜນການເຄື່ອນໄຫວຂອງກອງບັນຊາການ ປກສ ນະຄອນປາກເຊ ວາງອອກ ເພື່ອເປັນການເພີ່ມທະວີຄວາມຮັບຜິດຊອບຂອງກໍາລັງໃນການເຮັດໜ້າທີ່ການເມືອງ ໂດຍສະເພາະແມ່ນການປ້ອງກັນເວນຍາມ ແລະ ປະຈຳການຄອຍເຫດ, ຮັບປະກັນທາງດ້ານຄວາມສະຫງົບ, ຄວາມເປັນລະບຽບຮຽບຮ້ອຍ ແລະປອດໄພໃຫ້ກັບພໍ່-ແມ່ປະຊາຊົນ ແລະ ນັກທ່ອງທ່ຽວທາງພາຍໃນ ແລະ ຕ່າງປະເທດ ກໍຄືການເຄື່ອນໄຫວກິດຈະກຳຕ່າງໆຂອງນະຄອນ ໂດຍສະເພາະແມ່ນໃນໄລຍະສະເຫຼີມສະຫຼອງສົ່ງທ້າຍປີເກົ່າ ຄສ 2023 ແລະ ຕ້ອນຮັບປີໃໝ່ສາກົນ ຄສ 2024 ຢູ່ນະຄອນປາກເຊ ທີ່ຈະມາຮອດໃນມໍ່ໆນີ້,
ກອງບັນຊາການ ປກສ ນະຄອນປາກເຊ ໄດ້ມອບໝາຍໜ້າທີ່ຄວາມຮັບຜິດຊອບໃຫ້ ພະແນກຕໍາຫຼວດພວກເຮົາ ໂດຍປະສານສົມທົບ ກັບ ພະແນກຈະລາຈອນ ກອງບັນຊາການ ປກສ.ແຂວງ ວາງແຜນເຄື່ອນໄຫວຈັດວາງກໍາລັງຕຳຫຼວດຈະລາຈອນ ເຂົ້າໃສ່ຈຸດຕ່າງໆຕາມສາຍທາງພາຍໃນຂອບເຂດນະຄອນປາກເຊ ເພື່ອອຳນວຍຄວາມສະດວກໃນການສັນຈອນ ແລະ ຕິດຕາມກວດກາສະພາບການສັນຈອນຢູ່ຕາມທ້ອງຖະໜົນ ຕິດພັນກັບການລົງໂຄສະນາປູກຈິດສຳນຶກໃຫ້ແກ່ນັກຂັບຂີ່ ຜູ້ໃຊ້ລົດໃຊຊ້ຖະໜົນ ໄດ້ຮັບຮູ້ເຂົ້າໃຈ, ມີສະຕິປະຕິ ແລະ ເປັນເຈົ້າການໃນການປະຕິບັດກົດລະບຽບຈະລາຈອນຢ່າງເຂັ້ມງວດ ທັງເປັນການຫຼີກເວັ້ນຫຼຸດຜ່ອນການເກີດອຸບັດ ເຫດຢູ່ຕາມທ້ອງຖະໜົນ ເຊິ່ງເຫັນວ່າເປັນບັນຫາປະກົດການຫຍໍ້ທໍ້ໜຶ່ງ ທີ່ເກີດຂຶ້ນ ແລະ ສ້າງຜົນເສຍຫາຍຕໍ່ຊີວິດ ສຸຂະພາບ ຊັບສິນຂອງປະຊາຊົນ ກໍຄືຂອງລັດ ແລະ ລວມໝູ່.
ພັທ ຂັນທອງ ໄຊຍະວົງ ກ່າວຕື່ມວ່າ: ເພື່ອເປັນການສະກັດກັ້ນບັນຫາດັ່ງກ່າວ, ເຈົ້າ ໜ້າທີ່ພວກເຮົາຈິ່ງໄດ້ຈັດວາງກຳລັງເຂົ້າໃສ່ຈຸດຕ່າງໆທີ່ສໍາຄັນຢູ່ຕາມສາຍທາງໃນຂອບເຂດນະຄອນປາກເຊ ເປັນຕົ້ນແມ່ນເສັ້ນທາງເລກທີ13, ເສັ້ນທາງສາລາຂຽວດົງຈອງ, ເສັ້ນທາງແຄມຂອງ ລວມທັງໝົດມີ 9 ຈຸດ ຄື: ວົງວຽນ ໜ້າກອງພັນໃຫຍ່ 645, ວົງວຽນວັດພູ, ໄຟແດງວັດທາງເຂົ້າໂຮງຮຽນຈີນ, ໄຟແດງໜ້າສະໜາມກິລາ, ໄຟແດງຂ້າງສະຖານີວິທະຍຸ, ໄຟແດງໜ້າໂຮງສີທັນສະໄໝ, ວົງວຽນປາຄ່າ, ໄຟແດງທ່າຫຼວງ ແລະ ແກ້ໄຂອຸບັດເຫດ ໂດຍວາງຈຸດ ເຄື່ອນໄຫວໂຄສະນາມີ 6 ຈຸດ.
ນອກນັ້ນ ກໍມີຈຸກວດກາເຄື່ອນທີ່ ແລະ ຈຸດກວດກາ ຈັບຄວາມໄວ, ກວດກາທາດເຫຼົ້າ ແລະ ຕິດຕາມສະພາບການສັນຈອນ ຂອງພະແນກຈະລາຈອນ ປກສ ແຂວງ 3 ຈຸດ ເຊິ່ງໄດ້ປະກອບກຳລັງປະຈໍາການຢູ່ແຕ່ລະຈຸດ. ໃນນາມຕາງໜ້າເຈົ້າໜ້າທີ່ຕໍາຫຼວດຈະລາຈອນ ປກສ ນະຄອນປາກເຊ ຂໍຮຽກຮ້ອງມາຍັງພໍ່ແມ່ປະຊາຊົນ ແລະ ທຸກພາກ ສ່ວນໃນສັງຄົມ ໂດຍສະເພາະແມ່ນນັກຂັບຂີ່ ຜູ້ທີ່ໃຊ້ລົດໃຊ້ຖະໜົນຈົ່ງມີສະຕິ ແລະ ເປັນເຈົ້າການນໍາກັນໃນການຂັບຂີ່ທຸກຄັ້ງ ຕ້ອງປະຕິບັດກົດລະບຽບຈະລາຈອນ ຢ່າງເຂັ້ມງວດ, ກ່ອນຈະຂັບຂີ່ລົດອອກຈາກເຮືອນ ຫຼື ກ່ອນຈະອອກເດີນທາງ ຕ້ອງໄດ້ກວດກາເຊັກສະພາບຂອງລົດ ແລະ ຜູ້ຂັບຂີ້ກ່ອນ ເພື່ອຮັບປະກັນຄວາມປອດໄພຂອງຕົວທ່ານເອງ. ຖ້າໃຊ້ລົດຈັກ ກໍຕ້ອງໃສ່ໝວກກັນກະທົບ, ມີເອກະສານຕ່າງໆທີ່ກ່ຽວພັນກັບພາຫະນະ ກໍຕ້ອງມີຄົຍຖ້ວນ, ເມື່ອເຫັນເຈົ້າໜ້າທີ່ ກວດກາ ກໍຕ້ອງສະແດງຄວາມບໍລິສຸດໃຫ້ຄວາມຮ່ວມມື ແລະ ມີສ່ວນຮ່ວມນໍາກັນ. ທັງນີ້ ກໍເພື່ອເປັນການຫຼຸດຜ່ອນ ແລະ ເປັນການສະກັດກັ້ນບັນຫາອຸບັດເຫດທີ່ອາດຈະເກີດຂຶ້ນ ໃຫ້ຫຼຸດໜ້ອຍຖອຍລົງເທື່ອລະກ້າວ. ໃນກໍລະນີຫາກທ່ານປະສົບອຸບັດເຫດ ຫຼື ພົບພໍ້ຄົນປະສົບອຸບັດເຫດ ຂໍໃຫ້ທ່ານຈົ່ງໄດ້ໃຫ້ການຊ່ວຍເຫຼືອຄົນເຈັບ, ນໍາສົ່ງຄົນເຈັບໄປ ໂຮງໝໍໂດຍດ່ວນ; ບໍ່ເຄື່ອນຍ້າຍພາຫະນະທີ່ເກີດອຸບັດເຫດ; ປະສານຫາເຈົ້າໜ້າທີ່ກ່ຽວຂ້ອງ; ໃຫ້ຂໍ້ມູນທີ່ເປັນປະໂຫຍດຕໍ່ຮູບຄະດີ ກັບ ເຈົ້າໜ້າທີ່ຕາມຄວາມເປັນຈິງ.
ສຳລັບເວລາພົບເຫັນການເກີດອຸບັດເຫດຢູ່ນະຄອນປາກເຊ
ຂໍໃຫ້ທ່ານປະສານ ຫຼື ໂທລາຍງານເຈົ້າໜ້າທີ່ ໄດ້ຕາມໝາຍເລກໂທລະສັບ
030 9789 923
