ລຸ້ນອ້າຍລົ້ມລະລາຍ ແຣສຟອດ ຊ່ວຍເຫລືອ ເວສ ບຣາວ ໃຫ້ເຊົ່າເຮືອນໃນລາຄາບໍ່ແພງ
ມາຄັສ ແຣສຟອດ ກອງໜ້າຂອງ ແມນເຊັສເຕີ ຢູໄນເຕັດ ໄດ້ເຂົ້າມາຊ່ວຍ ເວສ ບຣາວ ທີ່ລົ້ມລະລາຍ. ດ້ວຍການສະເໜີທີ່ຢູ່ອາໄສໃນລາຄາບໍ່ແພງ, ອີງຕາມການລາຍງານຈາກ Daily Star.
ອະດີດກອງຫລັງ ອາຍຸ 43 ປີ ຖືກສານຍື່ນຄຳຮ້ອງໃຫ້ເປັນບຸກຄົນລົ້ມລະລາຍ ມາຕັ້ງແຕ່ວັນທີ 27 ກຸມພາທີ່ຜ່ານມາ ກ່ອນຈະໄດ້ຮັບການຢັ້ງຢືນໃນວັນທີ 12 ເມສາຜ່ານມາ.
ເວສ ບຣາວ ເຊິ່ງອຳລາສະໜາມໄປໃນປີ 2018, ປະສົບບັນຫາທາງດ້ານການເງິນຢ່າງໜັກຈົນລົ້ມລະລາຍ. ເນື່ອງຈາກຄວາມລົ້ມເຫລວໃນການເຮັດທຸລະກິດອະສັງຫາລິມະສັບ ລວມທັງການແຍກທາງຈາກອະດີດເມຍຂອງລາວ Leanne Wassell, ເຊິ່ງມີສ່ວນສໍາຄັນທີ່ເຮັດໃຫ້ລາວຕ້ອງສູນເສຍເງິນໄປຈຳນວນຫລາຍ.
ດ້ວຍເຫດຜົນນີ້, ແຣສຟອດ ຈຶ່ງຍື່ນມືເຂົ້າມາຊ່ວຍເຫລືອລຸ້ນອ້າຍໃນທັບຜີສາດແດງ. ໂດຍອະນຸຍາດໃຫ້ ບຣາວ ມາອາໄສຢູ່ໃນເຮືອນຫລູແຫ່ງໜຶ່ງຂອງລາວ. ໂດບການຄິດລາຄາເຊົ່າທີ່ບໍ່ແພງ, ເຊິ່ງນອກຈາກ ແຣສຟອດ, ແລ້ວຍັງມີອະດີດເພື່ອນຮ່ວມທີມຄື ເວນ ຣູນີ່ ແລະ ໄມເຄິນ ຄາຣິກ ມາໃຫ້ຄວາມຊ່ວຍເຫລືອໃນດ້ານອື່ນໆອີກເຊັ່ນກັນ, ຂະນະທີ່ ເດລີ ສະຕາ ອອກມາເປີດເຜີຍບົດສຳພາດຈາກແຫລ່ງຂ່າວທີ່ອ້າງວ່າເປັນຄົນໃກ້ຊິດກັບ ບຣາວ ເຊິ່ງລະບຸວ່າສາເຫດຂອງການລົ້ມລະລາຍແມ່ນການໃຊ້ຈ່າຍເງິນແບບເກີນໂຕ.
