ສູນກາງແນວລາວສ້າງຊາດ ແລະ ສູນກາງແນວໂຮມປະເທດຊາດຫວຽດນາມ ເສີມຂະຫຍາຍການຮ່ວມມື
September 15, 2022 - 1:23 PM
ພິທີພົບປະສອງຝ່າຍ ລະຫວ່າງ ຄະນະກຳມະການສູນກາງແນວລາວສ້າງຊາດ ກັບຄະນະກຳມະການສູນກາງແນວໂຮມປະເທດຊາດ ຝ່າຍລາວນຳໂດຍ ທ່ານ ຄຳເຜີຍ ບຸດດາວຽງ ກຳມະການສູນກາງພັກ ຮອງປະທານຜູ້ປະຈຳການສູນກາງແນວລາວສ້າງຊາດ ແລະ ຝ່າຍຫວຽດນາມນຳໂດຍ ທ່ານ ເລ ຕຽນ ເຈົາ ກຳມະການສູນກາງພັກ ຮອງປະທານສູນກາງແນວໂຮມປະເທດຊາດຫວຽດນາມ ພ້ອມດ້ວຍພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ ທີ່ສຳນັກງານສູນກາງແນວໂຮມປະເທດຊາດຫວຽດນາມ ໃນວັນທີ 13 ກັນຍາ ຜ່ານມາ.
ທ່ານ ເລ ຕຽນ ເຈົາ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ຂອງ ທ່ານ ຄຳເຜີຍ ບຸດດາວຽງ ໃນຄັ້ງນີ້ ຊຶ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ-ຫວຽດນາມ ເວົ້າລວມ, ເວົ້າສະເພາະແມ່ນສອງອົງການ ຄື: ແນວລາວສ້າງຊາດ ແລະ ແນວໂຮມປະເທດຊາດຫວຽດນາມ ໃຫ້ແຕກດອກອອກຜົນຍິ່ງໆຂຶ້ນ.
ໂອກາດນີ້, ທ່ານຮອງປະທານສູນກາງແນວລາວສ້າງຊາດ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານຮອງປະທານສູນກາງແນວໂຮມປະເທດຊາດຫວຽດນາມ; ໃນນີ້, ໄດ້ສະແດງຄວາມຊົມເຊີຍຜົນສຳເລັດອັນສຳຄັນໃຫຍ່ຫຼວງ ໃນການສ້າງສາພັດທະນາປະເທດຊາດ ສສ ຫວຽດນາມ, ພ້ອມທັງລາຍງານສະພາບທີ່ພົ້ນເດັ່ນຂອງ ສປປ ລາວ ໃຫ້ຮັບຊາບ; ໃນນີ້, ສຳລັບການຮ່ວມມືຂອງສອງອົງການ ແມ່ນສືບຕໍ່ຈັດຕັ້ງຜັນຂະຫຍາຍບົດບັນທຶກເຊັນສັນຍາຂອງສອງປະທານແນວໂຮມລາວ ແລະ ຫວຽດນາມ ແຕ່ປີ 2022-2027 ທີ່ນະຄອນຫຼວງວຽງຈັນ ໃຫ້ມີຜົນສຳເລັດ;
ພ້ອມກັນນັ້ນ, ທັງສອງຝ່າຍໄດ້ຕີລາຄາຄືນກ່ຽວກັບການພົວພັນຮ່ວມມືໃນໄລຍະຜ່ານມາ ແລະ ປຶກສາຫາລືກ່ຽວກັບບາງວຽກງານ ກໍຄືທິດທາງແຜນການໃນຕໍ່ໜ້າ ເປັນຕົ້ນແມ່ນການກຳນົດວັນເວລາ ທີ່ຈະຈັດກອງປະຊຸມເສີມສ້າງຊາຍແດນສັນຕິພາບ-ມິດຕະພາບ ລາວ-ຫວຽດນາມ ໃນທ້າຍປີ 2022 ນີ້, ຈັດກອງປະຊຸມສຳມະນາແລກປ່ຽນບົດຮຽນຊຶ່ງກັນ ແລະ ກັນ ເພື່ອຍົກລະດັບຄວາມຮູ້ຄວາມສາມາດ ໃຫ້ພະນັກງານ-ລັດຖະກອນ ຕໍ່ກັບວຽກງານແນວໂຮມ.
