ອະດີດຜູ້ນຳສີລັງກາ ຈະເດີນທາງຈາກສິງກະໂປມາໄທ ຄາດວ່າຮອດນະຄອນຫລວງບາງກອກມື້ນີ້

ສື່ຕ່າງປະເທດຫລາຍສຳນັກລາຍງານ “ທ່ານ ໂກຕາບາຢາ ຣາຊປັກສາ” ອະດີດປະທານາທິບໍດີສີລັງກາ ເຊິ່ງຫລົບໜີອອກຈາກປະເທດຫລັງເກີດເຫດປະທ້ວງໃຫຍ່ ຈະເດີນທາງຈາກສິງກະໂປມາປະເທດໄທ.

ລາຍງານຂ່າວລະບຸວ່າ: ແຫລ່ງຂ່າວຢ່າງໜ້ອຍ 2 ສຳນັກໄດ້ອອກມາເປີດເຜີຍວ່າ: ທ່ານ ຣາຊປັກສາ ຈະເດີນທາງຮອດປະເທດໄທໃນວັນທີ 11 ສິງຫານີ້.

ທັງນີ້, ອະດີດຜູ້ນຳສີລັງກາໜີອອກຈາກປະເທດໃນວັນທີ 13 ກໍລະກົດ ດ້ວຍເຮືອບິນທະຫານໄປມັລດີຟ ກ່ອນຈະເດີນທາງຕໍ່ໄປປະເທດສິງກະໂປ ພາຍຫລັງເກີດເຫດການປະທ້ວງຮຸນແຮງ ເນື່ອງຈາກວິກິດເສດຖະກິດຄັ້ງຮຸນແຮງ ໂດຍຜູ້ປະທ້ວງຈຳນວນຫລາຍໄດ້ບຸກເຂົ້າຢຶດເຮືອນພັກ ແລະ ສຳນັກງານປະທານາທິບໍດີເພື່ອກົດດັນໃຫ້ທ່ານລາອອກຈາກຕຳແໜ່ງ.

ເຖິງຢ່າງໃດກໍຕາມ, ຈາກລາຍງານຂອງຣອຍເຕີ ກະຊວງຕ່າງປະເທດສີລັງກາຍັງບໍ່ໄດ້ອອກມາສະແດງຄວາມຄິດເຫັນໃດໆຕໍ່ເລື່ອງດັ່ງກ່າວ. ຂະນະທີ່ທ່ານ ດອນ ປໍລະມັດວິໄນ ລັດຖະມົນຕີວ່າການກະຊວງການຕ່າງປະເທດໄທ ເຜີຍອະດີດປະທານາທິບໍດີສີລັງກາ ສາມາດອາໄສຢູ່ໃນປະເທດໄທໄດ້ບໍ່ເກີນ 90 ວັນ ຖ້າບໍ່ສ້າງບັນຫາ, ຊີ້ການໜີ້ຮ້ອນມາເພິ່ງເຢັນເປັນເລື່ອງປົກກະຕິ ແລະ ຍັງບໍ່ມີໃຜຄັດຄ້ານ.

ອ້າງອີງ:

https://www.reuters.com/…/sri-lankas-ousted-president…/

https://www.channelnewsasia.com/…/sri-lankas-ousted…