ສະຫະພາບເອີຣົບກຽມເປີດປະເທດໃຫ້ຄົນທີ່ສັກວັກຊີນແລ້ວມາທ່ຽວໄດ້ – ບໍ່ມີຊິໂນແວັກໃນລາຍການ
ສະຫະພາບເອີຣົບກຽມເປີດປະເທດໃຫ້ຄົນທີ່ສັກວັກຊີນແລ້ວມາທ່ຽວໄດ້ໂດຍຈະບໍ່ກວດໂຄວິດ – 19 ແລະ ບໍ່ຕ້ອງກັກໂຕ, ແຕ່ວັກຊີນທີ່ໄດ້ຮັບການຮັບຮອງບໍ່ມີຊິໂນແວັກໃນລາຍການ.
ໃນວັນທີ 20 ພຶດສະພາ 2021, nytimes ລາຍງານວ່າ 27 ປະເທດສະມາຊິກສະຫະພາບເອີຣົບມີການເຫັນດີວ່າຈະເປີດຊາຍແດນໃຫ້ແກ່ນັກທ່ອງທ່ຽວທີ່ໄດ້ຮັບການສັກວັກຊີນໂຄວິດ – 19 ຢ່າງຄົບຖ້ວນ ໂດຍວັກຊີນທີ່ໄດ້ຮັບການອະນຸມັດ ເພື່ອໃຫ້ທັນສຳລັບການທ່ອງທ່ຽວໃນໄລຍະລະດູຮ້ອນ.
ລາຍງານຂ່າວລະບຸວ່າກົດດັ່ງກ່າວຈະຖືກໃຊ້ເປັນນະໂຍບາຍຢ່າງເປັນທາງການໃນອາທິດໜ້ານີ້ຫລັງຈາກທີ່ຈັດການກ່ຽວກັບລະບົບລາດຊະການຮຽບຮ້ອຍ ແລະ ຂຶ້ນຢູ່ກັບວ່າແຕ່ລະປະເທດສະມາຊິກກຽມການຕ້ອນຮັບນັກທ່ອງທ່ຽວໄດ້ດີປານໃດ ບາງປະເທດ ເຊັ່ນ : ເກຣັກ ໄດ້ອອກມາລະບຸວ່າຈະຍົກເລີກຂໍ້ກຳນົດການກວດໂຄວິດ – 19 ແລະ ການກັກໂຕສຳລັບນັກທ່ອງທ່ຽວທີ່ສັກວັກຊີນແລ້ວ.
ທັງນີ້ ນັກທ່ອງທ່ຽວທີ່ຈະເດີນທາງເຂົ້າປະເທດໃນສະຫະພາບເອີຣົບນັ້ນຕ້ອງໄດ້ຮັບການສັກວັກຊີນຢ່າງນ້ອຍ 2 ອາທິດກ່ອນເດີນທາງມາເຖິງ ເຊິ່ງຕ້ອງມີຫລັກຖານຢັ້ງຢືນຈາກໜ່ວຍງານກຳກັບເບິ່ງແຍງຂອງຕົນເອງ ຫລື ໂດຍອົງການອະນາໄມໂລກ.
ສຳລັບວັກຊີນທີ່ຢູ່ໃນລາຍການທີ່ຫາກສັກແລ້ວສາມາດເດີນທາງເຂົ້າສະຫະພາບເອີຣົບນັ້ນໄດ້ແກ່ :
- ແອສຕຣ້າເຊນເນກ້າ.
- ຈອນສັນ ແອນ ຈອນສັນ.
- ໂມເດີນາ.
- ໄຟເຊີ.
- ຊິໂນຟາມ.
ແນວໃດກໍຕາມ ຫາກນັກທ່ອງທ່ຽວທີ່ຕ້ອງການຈະເດີນທາງມາຍັງປະເທດສະຫະພາບເອີຣົບແລ້ວ ຍັງບໍ່ໄດ້ຮັບການສັກວັກຊີນ, ແຕ່ເດີນທາງມາຈາກປະເທດທີ່ບໍ່ແມ່ນປະເທດກຸ່ມສ່ຽງກໍຈະໄດ້ຮັບອະນຸຍາດໃຫ້ເດີນທາງມາໄດ້ດ້ວຍເຫດຜົນ ເຊັ່ນ : ການມາພັກຜ່ອນ ຫລື ເຮັດທຸລະກິດ.
