ນາຍົກລັດຖະມົນຕີ ໂອ້ລົມຄະນະບໍລິຫານງານພັກແຂວງສະຫວັນນະເຂດ

ໃນ​ໂອກາດເຂົ້າຮ່ວມບັ້ນດຳເນີນຊີວິດການເມືອງພາຍໃນຄະນະບໍລິຫານງານພັກແຂວງສະຫວັນນະເຂດ ທ້າຍສະໄໝທີ  VIII ທີ່​ໄດ້​ຈັດ​ຂຶ້ນ​ໃນ​ວັນ​ທີ 21-22 ຕຸລາ​ນີ້ ທີ່​ຫ້ອງ​ວ່າການ​ແຂວງ​ດັ່ງກ່າວ ໂດຍມີ ສະຫາຍ ສັນຕິພາບ ພົມວິຫານ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງສະຫວັນນະເຂດ ​ແລະ ບັນດາສະຫາຍຄະນະບໍລິຫານງານພັກແຂວງ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະກວດກາສູນກາງພັກເຂົ້າຮ່ວມ.

ສະຫາຍ ທອງລຸນ ສີສຸລິດ ກຳມະການ​ກົມ​ການ​ເມືອງ​ສູນ​ກາງ​ພັກ, ນາຍົກລັດຖະມົນຕີ ໄດ້ມີຄໍາເຫັນໂອ້ລົມ ແລະ ຊີ້ນຳຕໍ່ຄະນະ​ບໍລິ​ຫານ​ງານ​ພັກ​ແຂວງ​ດັ່ງກ່າວ ​ເຊິ່ງສະຫາຍ​ນາຍົກລັດຖະມົນຕີ ​ໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດອັນພົ້ນເດັ່ນຈາກການນຳພາ-ຊີ້ນຳຂອງຄະນະບໍລິຫານງານພັກແຂວງ ໂດຍສະເພາະການເຕົ້າໂຮມຄວາມສາມັກຄີ, ການປະຕິບັດວຽກງານປ້ອງກັນຊາດ, ປ້ອງກັນຄວາມສະຫງົບ, ການພັດທະນາເສດຖະກິດ-ສັງຄົມ, ພັດທະນາຊົນນະບົດ, ການແກ້ໄຂໄພພິບັດນໍ້າຖ້ວມ, ການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແລະ ອື່ນໆ, ອັນສຳຄັນ ສະຫາຍ ທອງລຸນ ສີສຸລິດ ໄດ້ຊີ້ນຳໃຫ້ບັນດາສະຫາຍຄະນະບໍລິຫານງານພັກແຂວງນຳໄປຄົ້ນຄວ້າ ແລະ ພ້ອມກັນຈັດຕັ້ງປະຕິບັດ ​ແລະ ກຳແໜ້ນກ່ຽວກັບຈຸດປະສົງ ແລະ ເປົ້າໝາຍໃນການດຳເນີນຊີວິດການເມືອງຄັ້ງນີ້ ລວມທັງການກະກຽມບຸກຄະລະກອນ ເພື່ອສືບຕໍ່ລົງສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກແຂວງຊຸດໃໝ່ໃຫ້ຮັບປະກັນ​ໄດ້​ທັງສາມລຸ້ນ (ລຸ້ນອາວຸໂສ, ລຸ້ນກາງ, ລຸ້ນໜຸ່ມ), ເພດ ແລະ ເຜົ່າ, ຄົ້ນຄວ້າຢ່າງເລິກເຊິ່ງ ແລະ ປະກອບຄໍາຄິດເຫັນຢ່າງພາວະວິໄສຕໍ່ຮ່າງບົດສໍາຫລວດການນຳພາລວມຂອງຄະນະບໍລິຫານງານພັກແຂວງ ​ເພື່ອໄຈ້ແຍກໃຫ້ເຫັນອັນດີ-ອັນອ່ອນ-ຂໍ້ຄົງຄ້າງຕ່າງໆ ​ເພື່ອ​ມີທິດທາງປັບປຸງແກ້ໄຂໃນຕໍ່ໜ້າ, ການສໍາຫລວດບຸກຄົນໃຫ້ບັນດາສະຫາຍ ຄະນະບໍລິຫານງານພັກແຂວງ ສຸມໃສ່ລົງເລິກຕີລາຄາຕົນເອງທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ຄວາມຮັບຜິດຊອບຕໍ່ໜ້າທີ່ການເມືອງ, ຄວາມຮູ້ຄວາມສາມາດ, ສະຕິຕໍ່ການຈັດຕັ້ງ, ຄວາມເປັນແບບຢ່າງນຳໜ້າ, ແບບແຜນວິທີເຮັດວຽກ, ແບບແຜນການດຳລົງຊີວິດ ແລະ ອື່ນໆ. ພ້ອມກັນນັ້ນ, ກໍໃຫ້ໝູ່ຄະນະມີຄໍາເຫັນຕຳນິສົ່ງຂ່າວ ເພື່ອກໍ່ສ້າງເຊິ່ງກັນ ແລະ ກັນດ້ວຍຄວາມຈິງໃຈ, ກົງໄປກົງມາ, ຖືກຕ້ອງກັບຄວາມເປັນຈິງ, ໃຫ້ພ້ອມກັນຄົ້ນຄວ້າ ແລະ ກວດກາຄືນບັນດາຄຳເຫັນໃນການສຳຫລວດກວດກາກັນໃນໄລຍະຜ່ານມາ, ອັນໃດຖືກຕ້ອງກັບຄວາມເປັນຈິງກໍສືບຕໍ່ນຳໄປປັບປຸງແກ້ໄຂໃຫ້ມີການຫັນປ່ຽນທີ່ດີຂຶ້ນ, ອັນໃດບໍ່ມີມູນຄວາມຈິງ ກໍໃຫ້ນຳໄປເປັນຄະຕິເຕືອນ​ໃຈ ແລະ ບົດຮຽນໃນອະນາຄົດ ບໍ່ໃຫ້ເກີດມີເຫດການຄືຫາງສຽງດັ່ງກ່າວ ຊຶ່ງທັງໝົດນັ້ນກໍເພື່ອແນໃສ່ເຮັດ​ໃຫ້ອົງຄະນະພັກແຂວງສະຫວັນນະເຂດມີຄວາມປອດໃສ, ໜັກແໜ້ນ, ເຂັ້ມແຂງ.