ງານບຸນອອກພັນສາ-ຊ່ວງເຮືອທີ່ນະຄອນໄກສອນ ພົມວິຫານ ຫ້າມບໍ່ໃຫ້ວົງດົນຕີທຸກປະເພດລົງເສບງັນ ເພື່ອສະກັດກັ້ນການລະບາດຂອງໂຄວິດ-19

ທ່ານ ແສງທອງ ວັງແກ້ວມະນີ ເຈົ້ານະຄອນໄກສອນ ພົມວິຫານ ແຂວງສະຫວັນນະເຂດ ໃຫ້ຮູ້ວ່າ: ງານບຸນປະເພນີອອກພັນສາ-ຊ່ວງເຮືອ ປະຈຳປີ 2020 ​ໃນນະຄອນຂອງ​ຕົນໄດ້ເລີ່ມເປີດໃຫ້ມີການຄົບງັນນັບແຕ່ວັນທີ 28 ກັນຍາ ຫາ ວັນທີ 3 ຕຸລາທີ່​ຈະ​ມາ​ເຖິງ​ນີ້ ​ເຊິ່ງຈະໄດ້ມີການແຂ່ງຂັນເຮືອຊ່ວງປະເພດເຮືອກິລາ 9-12 ສີພາຍ ​ແຕ່​ໄດ້​ຫ້າມ​ບໍ່​ໃຫ້​ວົງ​ດົນຕີ​ລົງ​ເສບ​ງັນ ​ເພື່ອ​ປ້ອງ​ກັນການລະບາດຂອງພະຍາດໂຄວິດ 19. ສ່ວນກິດຈະກຳອື່ນໆປະກອບມີ: ປະເພນີໄຫຼກະໂທງ, ໄຫຼເຮືອໄຟ, ຊ່ວງເຮືອ, ງານຕະຫຼາດນັດວາງສະແດງສິນຄ້າປະເພດຕ່າງໆ​ແມ່ນ​ຈັດ​ເປັນ​ປົກກະຕິ ແລະ ພິເສດໃນວັນທີ 2 ຕຸລາ ຈະມີການແຂ່ງຂັນແຈັດສະກີ ເຊິ່ງເປັນກິລາອີກປະເພດໜຶ່ງທີ່ບໍ່ເຄີຍຈັດມາກ່ອນໃນງານບຸນປະເພນີອອກພັນສາໃນແຕ່ລະປີ.

ສຳລັບການຄົບງັນແມ່ນຈະບໍ່ອະນຸຍາດໃຫ້ວົງດົນຕີທຸກປະເພດລົງເສບງັນ ລວມທັງການຕັ້ງຮ້ານຄາຣາໂອເກະ ແລະ ວົງເອເລັກໂທນ, ອະນຸຍາດໃຫ້ໃຊ້ແຕ່ເຄື່ອງສຽງຂະໜາດນ້ອຍໃນການໂຄສະນາສິນຄ້າ ແລະ ປະກອບໃນວົງຊິງຊ້າ, ມ້າໝຸນ, ສະໄລເດີ້ເທົ່ານັ້ນ. ທັງນີ້ກໍເພື່ອເປັນການສະກັດກັ້ນ ແລະ ຕ້ານການລະບາດພະຍາດໂຄວິດ 19.