ລົດໄຟຟ້າສາຍສີຄໍາບໍ່ມີຄົນຂັບຂອງໄທ ພ້ອມໃຫ້ບໍລິການເດືອນຕຸລານີ້

ນະຄອນຫລວງ​ບາງກອກ​ ຂອງ​ໄທ ໄດ້​ເດີນ​ໜ້າ​ໂຄງການ​ກໍ່ສ້າງ​ລົດ​ໄຟຟ້າ​ສາຍ​ສີຄຳ ​ເພື່ອ​ເປັນ​ລະບົບ​ຂົນ​ສົ່ງ​ມວນ​ຊົນ​ທາງ​ລາງ​ລະບົບ​ຮອງ ​ເຮັດ​ໜ້າ​ທີ່​ເປັນ Feeder ທີ່​ສົ່ງ​ຕໍ່​ປະຊາຊົນ​ໃນ​ເຂດ​ຊຸມ​ຊົນ​ເບື້ອງທົນ​ບຸຣີ​ໄປ​ລະບົບ​ຂົນ​ສົ່ງ​ມວນ​ຊົນ​ລະບົບ​ຫລັກ​ໄດ້​ໂດຍ​ບໍ່​ໃຊ້​ລົດ​ສ່ວນ​ຕົວ ທັງ​ລົດ​ໂດຍສານ​ປະຈຳ​ທາງ, ​ເຮືອ​ໂດຍສານ​ແມ່ນ້ຳ​ເຈົ້າພະຍາ ​ແລະ ລົດ​ໄຟຟ້າ​ບີ​ທີ​ເອັສ 3 ​ເສັ້ນທາງ ​ໄດ້​ແກ່ ລົດ​ໄຟຟ້າ​ສາຍ​ສີຂຽວ​ສ່ວນ​ຕໍ່​ຂະຫຍາຍ​ສາຍ​ສີ​ລົມ, ລົດ​ໄຟຟ້າ​ສາຍ​ສີ​ແດງ ຊ່ວງ​ຫົວ​ລຳ​ໂພງ-ບາງ​ບອນ-ມະຫາ​ໄຊ ​ແລະ ລົດ​ໄຟຟ້າ​ສາຍ​ສີ​ມ້ວງ ຊ່ວງ​ເຕົາ​ປູນ-ຣາກບູລະນະ.

ສຳລັບ​ຄວາມ​ພິ​ເສດ​ຂອງ​ຂະ​ບວນລົດ​ໄຟຟ້າ​ສາຍ​ສີຄຳ ຄື​ເປັນ​ລົດ​ໄຟຟ້າ​ແບບ​ບໍ່​ມີ​ຄົນ​ຂັບ ​ໂດຍ​ໃຊ້​ລາງ​ນຳ​ທາງ, ມີ​ລໍ້ ​ແລະ ທາງ​ແລ່ນ​ເປັນ​ຢາງ ​ເຊິ່ງຈ​ະ​ເຮັດ​ໃຫ້​ເກີດ​ຄວາມ​ນຸ້ມນວນ ​ແລະ ກໍ່​ໃຫ້​ເກີດ​ສຽງ​ລົບ​ກວນ​ຕໍ່າ, ຫລຸດ​ຂີ້ຝຸ່ນ ​ແລະ ມົນ​ລະ​ພິດ, ຄວາມ​ໄວ​ສູງ​ສຸດ 80 ກິ​ໂລ​ແມັດ​ຕໍ່​ຊົ່ວ​ໂມງ ​ໂດຍ​ຂະ​ບວນລົດ​ທີ່​ໃຊ້​ໃນ​ລະບົບ​ນີ້​ມີ​ທັງ​ໝົດ 3 ຂະ​ບວນ, ຂະ​ບວນລະ 2 ຕູ້ ຮອງ​ຮັບ​ຜູ້​ໂດຍສານ​ໄດ້ 4.000-12.000 ຄົນ/ຊົ່ວ​ໂມງ/ທິດ​ທາງ.

ປັດຈຸບັນ ການ​ກໍ່ສ້າງ​ໂຄງການ​ດັ່ງກ່າວ​ຄືບ​ໜ້າ​ແລ້ວ 95% ​ແລະ ຢູ່​ລະຫວ່າງ​ການ​ທົດ​ສອບ​ລະບົບ​ການ​​ແລ່ນ​ລົດ ​ໂດຍ​ຄາດ​ວ່າ​ຈະ​ພ້ອມ​ໃຫ້​ບໍລິການ​ແກ່​ປະຊາຊົນ​ໃນ​ເດືອນ​ຕຸລາຈະ​ເຖິງນີ້.