ເດືອນມິຖຸນາລາວຂາດດຸນການຄ້າ ປະມານ 82 ລ້ານໂດລາສະຫະລັດ

ສູນຂໍ້ມູນຂ່າວສານທາງດ້ານການຄ້າ ສປປ ລາວ ແຈ້ງໃຫ້ຮູ້ວ່າ: ມູນຄ່າການນໍາເຂົ້າ ແລະ ສົ່ງອອກສິນຄ້າຂອງລາວ ​ໃນເດືອນມິຖຸນາຜ່ານ​ມານີ້ ບັນລຸໄດ້ປະມານ 757 ລ້ານໂດລາສະຫະລັດ (ຍັງບໍ່ກວມເອົາມູນຄ່າການສົ່ງອອກໄຟຟ້າ), ໃນນັ້ນ ມູນຄ່າການສົ່ງອອກບັນລຸ​ໄດ້​ປະມານ 337 ລ້ານໂດລາສະຫະລັດ, ສ່ວນມູນຄ່າການນໍາເຂົ້າມີປະມານ 419 ລ້ານໂດລາສະຫະລັດ ​ໂດຍ​ສະ​ເລ່ຍພຽງ​ເດືອນ​ດຽວ​ລາວ​ເຮົາຂາດດຸນການຄ້າປະມານ 82 ລ້ານໂດລາສະຫາລັດ ກໍ​ອາດ​ມີ​ສ່ວນ​ເຮັດ​ໃຫ້​ເງິນ​ກີບ​ເຮົາ​ອ່ອນ​ຄ່າ, ​ໃນ​ນັ້ນ ສິນຄ້າສົ່ງອອກຫລັກປະກອບມີ: ແຮ່ທອງ, ທອງແດງ ແລະ ເຄື່ອງທີ່ເຮັດດ້ວຍທອງແດງ, ໝາກກ້ວຍ, ເຍື່ອໄມ້, ເສດເຈ້ຍ, ຊິ້ນສ່ວນກ້ອງບັນທຶກພາບ, ເຄື່ອງດື່ມ, ຄຳປະສົມ ແລະ ຄຳແທ່ງ, ເຄື່ອງນຸ່ງຫົ່ມ, ເຄື່ອງໃຊ້ໄຟຟ້າ, ອຸປະກອນເຄື່ອງໃຊ້ໄຟຟ້າ ແລະ ກາເຟ. ສ່ວນໝວດສິນຄ້ານໍາເຂົ້າຫລັກມີ ພາຫະນະ, ເຄື່ອງໄຟຟ້າ ແລະ ອຸປະກອນໄຟຟ້າ, ນ້ຳມັນ​ເຊື້ອ​ໄຟ, ອຸປະກອນກົນຈັກ, ເຫລັກ, ເຄື່ອງດື່ມ, ຊິ້ນສ່ວນອາໄຫລ່ລົດ, ເຫລັກເສັ້ນ ແລະ ເຫລັກຮູບປະພັນຕ່າງໆ, ເຄື່ອງໃຊ້ທີ່ເຮັດດ້ວຍພລາສະຕິກ ​ແລະ ຝຸ່ນ (ປຸ໋ຍ).

ປະເທດທີ່ລາວ​ສົ່ງ​ອອກ​ສິນຄ້າ​ຫລັກ​ມີ ສປ ຈີນ, ຫວຽດນາມ, ໄທ, ອິນເດຍ ແລະ ຍີ່ປຸ່ນ. ສຳລັບບັນດາປະເທດທີ່ ສປປ ລາວ ນໍາເຂົ້າສິນຄ້າ​ຫລາຍ​ກວ່າ​ໝູ່​ແມ່ນຣາຊະ​ອານາຈັກໄທ, ສປ ຈີນ, ຫວຽດນາມ, ຢີ່ປຸ່ນ ແລະ ສະຫະລັດອາເມລິກາ