u-money ແລະ ທຄຕລ BCEL One ຮ່ວມມືກັນເຊື່ອມຕໍ່ລະບົບການບໍລິການ ການເງິນເທິງມືຖື 

ບໍລິສັດ ສະຕາ ຟິນເທັກ ຈໍາກັດຜູ້ດຽວ ​ແລະ ທະນາຄານການຄ້າຕ່າງປະເທດລາວ ມະຫາຊົນ (ທຄຕລ)​ ໄດ້​ຕົກລົງຮ່ວມມືກັນພັດທະນາເຊື່ອມຕໍ່ລະບົບການບໍລິການ ການເງິນເທິງມືຖື (u-money) ແລະ ການບໍລິການ ທະນາຄານເທິງມືຖື ຂອງ ທຄຕລ (BCEL One), ​ເຊິ່ງພິທີ​ຮ່ວມ​ລົງ​ນາມ​ດັ່ງກ່າວ​ໄດ້​ຈັດ​ຂຶ້ນ​ໃນ​ວັນ​ທີ 16 ກໍລະກົດ​ນີ້ ຢູ່​ທີ່​ນະຄອນຫລວງ​ວຽງຈັນ, ລະຫວ່າງ​ ທ່ານ ນັນທະລາດ ແກ້ວປະເສີດ ຮອງຜູ້ອຳນວຍການໃຫຍ່ ທະນາຄານການຄ້າຕ່າງປະເທດລາວ ມະຫາຊົນ ແລະ ທ່ານ ລິວ ແມ໋ງ ຮ່າ ຜູ້ອໍານວຍການບໍລິສັດ ສະຕາຟິນເທັກ ຈໍາກັດຜູ້ດຽວ ແລະ ທັງເປັນຜູ້ອຳນວຍການໃຫຍ່ ບໍລິສັດ ສະຕາ ໂທລະຄົມ. ​ໂດຍການເຂົ້າ​ຮ່ວມ​ຂອງທ່ານ ສຸລິສັກ ທຳນຸວົງ ຫົວໜ້າກົມຄຸ້ມຄອງລະບົບຊຳລະສະສາງ ທະນາຄານ ແຫ່ງ ສປປ ລາວ ​ແລະ ທ່ານ ພູ​ຂົງ ຈັນທະ​ຈັກ ຜູ້ອຳນວຍການ​ໃຫຍ່ ທະນາຄານການຄ້າຕ່າງປະເທດລາວ ມະຫາຊົນ.

​ ເພື່ອແນ​ໃສ່​ຄົ້ນຄວ້າ ແລະ ພັດທະນາການຮ່ວມມື ເພື່ອເຊື່ອມຕໍ່ລະບົບກະເປົາເງິນເອເລັກໂຕຣນິກ u-momey ຂອງບໍລິສັດ ສະຕາຟິນເທັກ ຈໍາກັດຜູ້ດຽວກັບ ລະບົບ BCEL One ຂອງ ທຄຕລ  ເພື່ອໃຫ້ສາມາດຮອງຮັບການໂອນເງິນຈາກບັນຊີຜູ້ໃຊ້ແອັບ u-money ຫາບັນຊີ ທຄຕລ ແລະ ໂອນເງິນຈາກບັນຊີ ທຄຕລ ຜ່ານ BCEL One ຫາບັນຊີຜູ້ໃຊ້ແອັບ u-money ໄດ້, ທັງນີ້ ເພື່ອເປັນການເປີດກວ້າງການເຂົ້າເຖິງການບໍລິການດ້ານການທະນາຄານໃຫ້ສະດວກ ແລະ ເຂົ້າເຖິງທຸກພື້ນທີ່ ໃນຂອບເຂດທົ່ວປະເທດ ເປັນຕົ້ນແມ່ນເຂດຫ່າງໄກສອກຫລີກ. ເນື່ອງຈາກລູກຄ້າ ທີ່ມີບັນຊີກະເປົາເງິນເອເລັກໂຕຣນິກ  u-money  ນຳໃຊ້ເທິງເຄືອຂ່າຍສັນຍານໂທລະສັບໂດຍບໍ່ຈຳເປັນຕ້ອງນຳໃຊ້ອິນເຕີເນັດ ກໍສາມາດໂອນເງິນເຂົ້າບັນຊີ ຂອງທະນາຄານການຄ້າຕ່າງປະເທດລາວ ມະຫາຊົນ ໄດ້ ແລະ ທະນາຄານການຄ້າຕ່າງປະເທດລາວ ມະຫາຊົນ ກໍສາມາດໂອນເງິນຜ່ານແອັບ BCEL One ເຂົ້າບັນຊີກະເປົາເງິນເອເລັກໂຕຣນິກ u-money ໄດ້ເຊັ່ນດຽວກັນ, ເຊິ່ງເປັນການອໍານວຍຄວາມສະດວກສະບາຍ ໃຫ້ກັບລູກຄ້າທັງສອງຝ່າຍໃນການຊໍາລະສະສາງ ແລະ ເຮັດທຸລະກຳທາງການເງິນຕ່າງໆ ໂດຍສະເພາະແມ່ນການໂອນເງິນ, ການຊຳລະຄ່າບໍລິການຕ່າງໆ ໄດ້ຢ່າງງ່າຍດາຍ ແລະ ວ່ອງໄວຍິ່ງຂຶ້ນ.

​​ໃນໂອກ​າດນີ້, ຄະນະ​ອຳ​ນວຍ​ການ ບໍລິສັດ ສະຕາ ຟິນເທັກ ຈໍາກັດຜູ້ດຽວ ​ໄດ້​ມີ​ຄຳ​ເຫັນ​ວ່າ: ບໍລິສັດ ສະຕາ ຟິນເທັກ ຈໍາກັດຜູ້ດຽວ ພາຍໃຕ້ເຄື່ອງຫມາຍການຄ້າ ຢູມັນນີ້ u-money, ເປັນ ບໍລິສັດໃນເຄືອຂອງ ສະຕາ ໂທລະຄົມ ເຊິ່ງໄດ້ຮັບການອະນຸຍາດຈາກທະນາຄານແຫ່ງ ສປປ ລາວ ໃນການສະໜອງການບໍລິການ ການເງິນ ຜ່ານລະບົບມືຖື ສາມາດເຮັດທຸລະກໍາ ໂອນເງິນຖອນເງິນອອກເປັນເງິນສົດ-ການຊໍາລະ ບໍລິການຕ່າງໆ ໂດຍຜ່ານລະບົບມືຖື, ສ້າງຄວາມສະດວກສະບາຍໃຫ້ແກ່ລູກຄ້າ ທີ່ນໍາໃຊ້ມືຖືໃນທົ່ວປະເທດ ແລະ ພິເສດ ແມ່ນອໍານວຍຄວາມສະດວກໃຫ້ແກ່ລູກຄ້າທີ່ນໍາໃຊ້ມືຖືຫລາຍກວ່າ 3 ລ້ານເລກໝາຍຂອງຢູນີເທວ ເຊິ່ງແນ່ນອນ u-money ຈະຊ່ວຍໃຫ້ປະຊາຊົນເຂດຫ່າງໄກ ສາມາດເຂົ້າເຖິງການບໍລິການດ້ານການເງິນ- ການທະນາຄານໄດ້ຢ່າງສະດວກເປັນຕົ້ນແມ່ນການເຂົ້າເຖິງການຝາກເງິນ-ການຖອນເງິນ-ການໂອນເງິນ, ສ້າງຄວາມສະດວກສະບາຍ ແລະ ປອດໄພ ໂດຍ ສະເພາະແມ່ນປະຊາຊົນທີ່ດໍາລົງຊີວິດຢູ່ຕ່າງແຂວງ, ເຂດຫ່າງໄກສອກຫລີກ,ເສີມສ້າງພື້ນຖານໃນການພັດທະນາ ເສດຖະກິດຊຸມຊົນໃຫ້ນັບມື້ນັບດີຂື້ນເທື່ອລະກ້າວ. ພ້ອມ​ທັງເສີມສ້າງການໃຫ້ບໍລິການ ດ້ານການທະນາຄານເທິງມືຖື ໃຫ້ມີຄວາມສົມບູນຍິ່ງຂື້ນ ດ້ວຍຈຸດປະສົງອັນດຽວກັນ ນັ້ນກໍຄື ການຮັບໃຊ້ສັງຄົມ ໃຫ້ມວນຊົນໄດ້ເຂົ້າເຖິງແຫລ່ງການເງິນ-ການທະນາຄານຢ່າງສະດວກເພື່ອເສີມ ສ້າງການພັດທະນາເສດຖະກິດສັງຄົມ.