ສະຕາ ຟິນເທັກ ຮ່ວມມືກັບ ທະນາຄານ ເອຊີລີດາ ລາວ ເຊື່ອມຕໍ່ການຊໍາລະ
ບໍລິສັດ ສະຕາ ຟິນເທັກ ຈໍາກັດຜູ້ດຽວ ແລະ ທະນາຄານ ເອຊີລີດາ ລາວ ຈໍາກັດ ໄດ້ຕົກລົງການຮ່ວມມືເຊື່ອມຕໍ່ການຊໍາລະ, ເຊິ່ງພິທີຮ່ວມລົງນາມດັ່ງກ່າວໄດ້ຈັດຂຶ້ນໃນວັນທີ 15 ກໍລະກົດນີ້, ຢູ່ທີ່ນະຄອນຫລວງວຽງຈັນ ລະຫວ່າງ ທ່ານ ດຣ ຮາຍ ສະວາຍ ຜູ້ອໍານວຍການໃຫຍ່ ທະນາຄານ ເອຊີລີດາ ລາວ ຈໍາກັດ ແລະ ທ່ານ ລິວແມ໋ງ ຮ່າ ອໍານວຍການ ບໍລິສັດ ສະຕາ ຟິນເທັກ ຈໍາກັດຜູ້ດຽວ ແລະ ທັງເປັນຜູ້ອໍານວຍການໃຫ່ຍບໍລິສັດ ສະຕາໂທລະຄົມ. ໂດຍການ ເຂົ້າຮ່ວມຂອງ ທ່ານ ສຸລິສັກ ທໍານຸວົງ ຫົວໜ້າກົມຄຸ້ມຄອງລະບົບຊໍາລະສະສາງ ທະນາຄານ ແຫ່ງ ສປປ ລາວ.
ແນໃສ່ເປີດກ້ວາງການເຂົ້າເຖິງບໍລິການດ້ານການທະນາຄານໃຫ້ສະດວກວ່ອງໄວຍິ່ງຂຶ້ນ, ບໍ່ວ່າຈະເປັນລູກຄ້າທີ່ມີບັນຊີ ກະເປົາເງິນອີເລັກໂຕຣນິກ ຢູມັນ(u-money) ສາມາດໂອນເງິນເຂົ້າບັນຊີໂດຍກົງຂອງທະນາຄານ ເອຊີລີດາ ລາວ ຈໍາກັດ ແລະ ບັນຊີທະນາຄານ ເອຊີລີດາ ລາວ ຈໍາກັດ ກໍສາມາດໂອນເງິນເຂົ້າບັນຊີກະເປົາເງິນອີເລັກໂຕຣນິກ ຢູມັນນີ (u-money) ໄດ້ເຊັ່ນດຽວກັນ. ເຊິ່ງເຮັດໃຫ້ມີຄວາມງ່າຍຕໍ່ການເຮັດທຸລະກໍາການຊໍາລະ ແລະ ການໃຊ້ບໍລິການຕ່າງໆຂອງທັງສອງຝ່າຍໄດ້ຢ່າງງ່າຍດາຍ ແລະ ວ່ອງໄວ.ຕະຫລອດໄລຍະຜ່ານມາ ບໍລິສັດ ສະຕາ ຟິນເທັກ ຈໍາກັດ ກໍໄດ້ຮ່ວມກັບທະນາຄານອື່ນໆເຊັ່ນ: ທະນາຄານຫຸ້ນສ່ວນ ການຄ້າທະຫານ-ສາຂາລາວ, ທະນາຄານ ລາວ-ຫວຽດ, ທະນາຄານ ມາຣູຮານ ເຈແປນ ລາວ, ທະນາຄານ ຮ່ວມພັດທະນາ ກໍໄດ້ເຊັນບົດບັນທຶກຄວາມເຂົ້າໃຈນຳກັນແລ້ວ, ສ່ວນທະນາຄານການຄ້າຕ່າງປະເທດລາວ ມະຫາຊົນ ໄດ້ເປີດບໍລິການດ້ານ “BCEL E-Commerce” ມາແລ້ວເຊັ່ນກັນ.
ຖືເປັນຍຸດທະສາດໜຶ່ງໃນການພັດທະນາຂອງ ບໍລິສັດ ສະຕາ ຟິນເທັກ ຈໍາກັດ ແລະ ທະນາຄານ ເອຊີລີດາ ລາວ ຈໍາກັດ ເພື່ອຕອບສະໜອງຄວາມຕ້ອງການຂອງລູກຄ້າ ແລະ ທັງສອງຝ່າຍຍັງຈະສືບຕໍ່ຄົ້ນຄ້ວາການຮ່ວມມືທີ່ເປັນປະໂຫຍດອື່ນໆອີກໃນອານາຄົດ.
ບໍລິສັດ ສະຕາຟິນ ເທັກ ມີສະໂລແກນຂອງຕົນວ່າ: “ທະນາຄານເທິງມືຖືຂອງຄົນລາວ” ຈະສືບຕໍ່ຮ່ວມມືກັບພາກສ່ວນອື່ນໆ ເພື່ອອໍານວຍຄວາມ ສະດວກ ໃນການນໍາໃຊ້ ທຸລະກໍາທະນາຄານໃນຍຸກແຫ່ງບໍລິການທະນາຄານ ແບບດີຈິຕອນ.
ບໍລິສັດ ສະຕາ ຟິນເທັກຈໍາກັດຜູ້ດຽວ ພາຍໃຕ້ເຄື່ອງໝາຍການຄ້າ ຢູມັນນີ (u-money), ເປັນບໍລິສັດໃນ ເຄືອຂອງ ສະຕາ ໂທລະຄົມ ເຊິ່ງໄດ້ຮັບອະນຸຍາດຈາກທະນາຄານແຫ່ງ ສປປ ລາວ ໃນການສະໜອງບໍລິການ ດ້ານກະເປົາເງິນອີເລັກໂຕຣນິກຢ່າງເປັນທາງການ, ເຊິ່ງການໃຫ້ບໍລິການດັ່ງກ່າວນີ້ຈະເພີ່ມຄວາມສະດວກໃຫ້ແກ່ລູກຄ້າ ແລະ ປະຊາຊົນ ທີ່ອາໄສຢູ່ທຸກຂົງເຂດໃນທົ່ວປະເທດກໍສາມາດເຂົ້າເຖິງທະນາຄານແບບດີຈິຕອນໄດ້ຢ່າງງ່າຍດາຍທີ່ສຸດ.
