ລັດວິສາຫະກິດລົດເມຈະເປີດບໍລິການຄືນ
ທ່ານ ບົວພາ ເພັດວິໄຊ ຮອງອຳນວຍການ ລັດວິສາຫະກິດລົດເມນະຄອນຫຼວງ ໄດ້ໃຫ້ສຳພາດວ່າ: ລັດວິສາຫະກິດລົດເມນະຄອນຫຼວງ ຈະເປີດບໍລິການເກືອບທຸກເສັ້ນທາງຢູ່ນະຄອນຫຼວງ ໃນມື້ອື່ນ, ພາຍຫຼັງທີ່ໄດ້ເປີດບໍລິການ 3 ເສັ້ນທາງ ລວມມີຕະຫຼາດເຊົ້າ–ນ້ຳຊວງ, ຕະຫຼາດເຊົ້າ–ເພຍລາດ ແລະ ຕະຫຼາດເຊົ້າ–ເມືອງສັງທອງ ໃນວັນອັງຄານ ທີ່ຜ່ານມາ ແລະ ຈະເລີ່ມເປີດເສັ້ນທາງແຕ່ ລາວ–ໄອເຕັກ ຫາ ສະໜາມບິນສາກົນວັດໄຕ, ເສັ້ນທາງ ຫາ ຕະຫາດຊັນຈຽງ ແລະ ເສັ້ນທາງອອກຕ່າງແຂວງແລ້ວ ພວກເຮົາແມ່ນຈະໄດ້ເປີດຄືນທັງໝົດ. ທັງນີ້, ພວກເຮົາໄດ້ຫຼຸດຈຳນວນຖ້ຽວ ລວມທັງຈໍານວນລົດເມ ທີ່ໃຫ້ບໍລິການແຕ່ລະເສັ້ນທາງລົງເພື່ອໃຫ້ແທດເໜາະກັບຈຳນວນຜູ້ໂດຍ ສານ.
ທ່ານ ບົວພາ ເພັດວິໄຊ ກ່າວຕື່ມວ່າ ເສັ້ນທາງຕະຫຼາດເຊົ້າ ຫາ ບ້ານທ່າເດື່ອ ທີ່ຜ່ານຂົວມິດຕະພາບລາວ–ໄທແຫ່ງທີ 1 ແມ່ນພວກເຮົາຈະຫຼຸດຈຳນວນລົດເມ ຈາກ 10 ຄັນ ຫຼື 46 ຖ້ຽວຕໍ່ມື້ ໃຫ້ເຫຼືອພຽງ ລົດເມ 2 ຄັນ ຫຼື ປະມານ 10 ຖ້ຽວຕໍ່ມື້. ໃນໄລຍະນີ້ແມ່ນເປັນໄລຍະທົດລອງຜູ້ໂດຍສານ ເພາະຖ້າຈຳນວນຜູ້ໂດຍສານໃນເສັ້ນທາງນັ້ນໆຫາກມີຫຼາຍ ພວກເຮົາກໍ່ຈະເພີ່ມຖ້ຽວລົດຂຶ້ນ ເພື່ອໃຫ້ແທດເໝາະກັບຕົວຈິງ.
ລັດວິສາຫະກິດລົດເມນະຄອນຫຼວງ ແມ່ນໄດ້ໂຈະການໃຫ້ບໍລິການພາຍໃນປະເທດຕັ້ງແຕ່ວັນທີ 30 ມີນາ 2020 ຫຼັງຈາກຢຸດໃຫ້ບໍລິການຊົ່ວຄາວເສັ້ນທາງໄປຕ່າງປະເທດ ຕັ້ງແຕ່ວັນທີ 23 ມີນາ 2020. ປະຈຸບັນເສັ້ນທາງໄປຕ່າງແຂວງ ແລະ ເສັ້ນທາງໄປຕ່າງປະເທດ ແມ່ນຍັງບໍ່ທັນເປີດໃຫ້ບໍລິການເທື່ອ.
