ສິງກະໂປ ຂະຫຍາຍເວລາມາດຕະການເຂັ້ມງວດຈົນຮອດວັນທີ 1 ມິຖຸນາ

ແຫລ່ງຂ່າວຈາກປະເທດສິງກະໂປລາຍງານວ່າ:  ທ່ານ ຫລີຊຽງລຸງ ນາຍົກ ລັດຖະມົນຕີສິງກະໂປ  ໄດ້ຖະແຫລງຜ່ານສະຖານີ ໂທລະພາບແຫ່ງຊາດ ໂດຍມີເນື້ອໃນລະບຸວ່າ  ສິງກະໂປຈະຂະຫຍາຍເວລາມາດຕະການທາງສັງຄົມ ໂດຍມີຜົນບັງຄັບໃຊ້ນັບແຕ່ວັນທີ 7 ເມສາ- ວັນທີ 4 ພືດສະພາ, ແຕ່ປັດຈຸບັນ ຈະຂະຫຍາຍເວລາຕໍ່ໄປຈົນເຖິງ ວັນທີ 1 ມິຖຸນາ ເປັນຢ່າງໜ້ອຍເນື່ອງຈາກສະຖານະການ ແຜ່ລະບາດຂອງພະຍາດ ໂຄວິດ-19 ໃນປະເທດ ຍັງສືບຕໍ່ເພີ່ມຂຶ້ນແບບເປັນກຸ່ມກ້ອນຢູ່ຕາມບ້ານພັກກຳມະກອນຕ່າງດ້າວ ແຕ່ຂະໜາດການແຜ່ລະບາດເປັນກຸ່ມໃຫຍ່ ແລະ ການຂະຫຍາຍເວລາບັງຄັບໃຊ້ມາດຕະການດັ່ງກ່າວເພ່ືອເປັນການຊ່ວຍກຽມພ້ອມໃຫ້ແກ່ລະບົບສາທາລະນະສຸກໃນການຮັບມືກັບພະຍາດດັ່ງກ່າວ.

ທ່ານຫລີຊຽງລຸງ ແຈ້ງໃຫ້ປະຊາຊົນກຽມຄວາມພ້ອມລ່ວງໜ້າເນື່ອງຈາກມາດຕະການທາງສັງຄົມຈະເຂັ້ມງວດຂື້ນຕື່ມ, ໂດຍຈະມີການອະນຸຍາດໃຫ້ເປີດສະເພາະສະຖານທີ່ຈຳເປັນທີ່ສຸດ, ໝາຍຄວາມວ່າ ຈະມີການສັ່ງປິດສະຖານທ່ີປະກອບການທຸລະກິດເພີ່ມຂື້ນ ແລະ ການຍົກລະດັບຄວບຄຸມ ການເຄື່ອນໄຫວຂອງປະຊາຊົນຕາມສະຖານທີ່ມີຄວາມສ່ຽງ ເຊັ່ນ: ຕະຫລາດສົດ. ສ່ວນໂຮງຮຽນໃຫ້ປິດຕໍ່ໄປຈົນເຖິງກຳນົດເວລາໃໝ່ ແລະ ໃນລະຫວ່າງນີ້ໃຫ້ຈັດການຮຽນ ການສອນ ຢູ່ເຮືອນ.