ກະຊວງແຮງງານມອບເຂົ້າຫລາຍໂຕນ ໃຫ້ປະຊາຊົນທີ່ຖືກຜົນກະທົບຈາກໄພພິບັດຜ່ານມາ
ໃນລະຫວ່າງ ວັນທີ 24-27 ກຸມພາ ນີ້, ທ່ານ
ນາງໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຕາງໜ້າລັດຖະບານ
ໄດ້ນຳເອົາເຂົ້າກິນ ຫລາຍກ່ວາ 3 ລ້ານ ໂຕນ ລວມມູນຄ່າ 10 ຕື້ກ່ວາກີບ, ລົງມອບໃຫ້ກັບປະຊາຊົນຜູ້ໄດ້ຮັບຜົນກະທົບຈາກໄພພິບັດໃນຜ່ານມາ
ຢູ່ ແຂວງ ຄຳມ່ວນ, ສະຫວັນນະເຂດ, ຈຳປາສັກ ແລະ ສາລະວັນ.
ທ່ານ ຮອງລັດຖະມົນຕີ ໃຫ້ຮູ້ວ່າ:
ເຂົ້າທີ່ນຳມາຊ່ວຍ ເຫລືອຄັ້ງນີ້,ແມ່ນການປະກອບສ່ວນຂອງສັງຄົມທັງພາຍໃນ ແລະ ຕ່າງປະເທດ,
ພາຍຫລັງທີ່ລາວເຮົາ, ໄດ້ຮັບຜົນເສຍຫາຍຈາກໄພທຳມະຊາດໃນລະດູຝົນຜ່ານມາ,
ເພື່ອສ້າງເງື່ອນໄຂໃຫ້ເຂົາເຈົ້າສາມາດຟື້ນຟູສະພາບການດຳລົງຊີວິດໃຫ້ກັບຄືນສູ່ສະພາບປົກະຕິໂດຍໄວ
ທ່ານຮອງລັດຖະມົນຕີ ໃຫ້ຮູ້ອີກວ່າ: ປັດຈຸບັນ, ບັນຫາໄພພິບັດ ແລະ ຄວາມສ່ຽງຈາກການປ່ຽນແປງຂອງດິນຟ້າອາກາດ ເປັນຕົ້ນ ໄພນ້ຳຖ້ວມ, ແຫ້ງແລ້ງ, ລົມພາຍຸ, ການລະບາດຂອງພະຍາດ ແລະ ອື່ນໆ ໄດ້ກາຍເປັນສິ່ງທ້າທາຍຢ່າງໃຫຍ່ຫລວງຕໍ່ປະເທດ ແລະ ເພີ່ມຄວາມຮຸນແຮງຂຶ້ນເລື້ອຍໆ ສ້າງຜົນກະທົບ ແລະ ຄວາມເສຍຫາຍຢ່າງຫລວງຫລາຍ ຕໍ່ຊີວິດ ແລະ ຊັບສິນຂອງປະຊາຊົນ, ທັງໄລຍະສັ້ນ ແລະ ໄລຍະຍາວ, ສະນັ້ນ ລັດຈຶ່ງໄດ້ວາງແຜນຮັບມືຢ່າງຕັ້ງໜ້າ.
