ຄະນະສະເພາະກິດກວດເຂັ້ມການຈັດເກັບລາຍຮັບ

ເພື່ອບັນລຸເປົ້າໝາຍການຈັດຕັ້ງປະຕິບັດແຜນງົບປະມານ ປະຈຳປີ 2017 ສະ​ເພາະນະຄອນຫລວງວຽງຈັນ ​ໃຫ້​ບັນລຸ​ຫລາຍ​ກວ່າ 1.100 ຕື້​ກີບ, ທ່ານຮອງນາຍົກລັດ ຖະມົນຕີ, ລັດຖະມົນຕີກະຊວງການເງິນ ສົມດີ ດວງດີ ໄດ້ອອກຂໍ້ຕົກລົງ ສະບັບເລກ 0887/ກ.ງ ລົງວັນທີ 28 ມີນາ 2017 ວ່າດ້ວຍການແຕ່ງຕັ້ງຄະນະສະເພາະກິດ ຕິດຕາມ, ກວດກາການຈັດຕັ້ງປະຕິບັດກົດໝາຍ ແລະ ລະບຽບການສ່ວຍສາອາກອນໃນຂອບເຂດທົ່ວປະເທດ ຈໍານວນ 9 ສະຫາຍ, ທີ່ມາຈາກຫລາຍພາກສ່ວນ, ສະເພາະຢູ່ນະຄອນຫລວງວຽງຈັນໄດ້ເລີ່ມຈັດຕັ້ງປະຕິບັດແລ້ວ, ພ້ອມທັງສັ່ງເຂັ້ມງວດກວດເຂັ້ມໃນການຕິດຕາມ, ໂດຍໄດ້ເລັ່ງໃສ່ເປົ້າໝາຍພະແນກສ່ວຍສາອາກອນ, ຫົວໜ່ວຍທຸລະກິດຈຳນວນໜຶ່ງທີ່ນຳເຂົ້ານ້ຳມັນເຊື້ອໄຟ, ພາຫະນະ ແລະ ອື່ນໆ.

ທ່ານ ກໍລະກັນ ສິງອຸດົມ ຮອງຫົວໜ້າກົມຈັດຕັ້ງ ຄະນະກວດກາສູນກາງພັກ ຮອງຫົວໜ້າຄະນະສະເພາະກິດດັ່ງກ່າວເປີດເຜີຍວ່າ: ການປະຕິບັດວຽກງານຂອງຄະນະສະເພາະກິດຢູ່ນະຄອນຫລວງມີກຳນົດ 1 ເດືອນ, ນັບແຕ່ວັນທີ 24 ເມສາ – 24 ພຶດສະພາ 2017 ໂດຍເລັ່ງໃສ່ພະແນກສ່ວຍສາອາກອນນະຄອນຫລວງຄື: ຫ້ອງການຄຸ້ມຄອງເກັບລາຍຮັບ, ຫ້ອງການກວດກາບັນຊີວິສາຫະກິດ, ຫ້ອງ ການຄຸ້ມຄອງໃບເກັບເງິນ ແລະ ສິ່ງພິມ,​ ຫ້ອງການອາກອນກໍາໄລ ແລະ ຄ່າທໍານຽມ, ບັນດາຫົວໜ່ວຍທຸລະກິດຈຳນວນໜຶ່ງທີ່ນຳເຂົ້າ ແລະ ຈັດຈຳໜ່າຍນ້ຳມັນເຊື້ອໄຟ, ພາຫະນະ ແລະ ອື່ນໆ…​ເຊິ່ງຕົ້ນຕໍ​ແມ່ນ​ເຮັດ​ຫນ້າ​ທີ່ຕິດຕາມ, ກວດກາການເຄື່ອນໄຫວຂອງພະນັກງານ, ເຈົ້າໜ້າທີ່ສ່ວຍສາອາກອນໃນການຈັດຕັ້ງປະຕິບັດກົດໝາຍ, ລະບຽບການ ແລະ ນິຕິກຳອື່ນໆທີ່ຕິດພັນກັບວຽກງານສ່ວຍສາອາກອນ, ເກັບກຳຊອກຮູ້ຂໍ້ມູນ,​ ສະພາບການທີ່ເປັນຫາງສຽງ,​ ປະກົດການຫຍໍ້ທໍ້ທີ່ຕິດພັນພະນັກ ງານ, ຜູ້ປະກອບການທຸລະກິດ, ທັງເປັນການຊຸກຍູ້ ແລະ ຍົກສູງຄວາມຮັບຜິດຊອບຂອງພະນັກງານ, ຕິດຕາມ, ກວດກາ, ເກັບກຳຂໍ້ມູນຖານລາຍຮັບ, ການຄຸ້ມຄອງຈັດເກັບລາຍຮັບ ແລະ ການມອບລາຍຮັບສ່ວຍສາອາກອນເຂົ້າງົບປະມານ, ເກັບກຳຊອກຮູ້ສະພາບການອອກລະບຽບການໃນການຄຸ້ມຄອງ ແລະ ນຳໃຊ້ລາຍຮັບຕ່າງໆທີ່ເປັນພັນທະຕ້ອງມອບເຂົ້າງົບປະມານ​ໃຫ້​ຖືກຕ້ອງ​ຊັດ​ເຈນ.