ຈຳນວນຜູ້ເສຍຊີວິດ 1.200 ກວ່າຄົນ ຊ່ວງລະດູຝົນໃນອາຊີໃຕ້
ສຳນັກຂ່າວ AFP ລາຍງານຈາກຂໍ້ມູນທີ່ຮວບຮວມມາພົບວ່າ: ມີຜູ້ເສຍຊີວິດ 1.200 ກວ່າຄົນ ຊ່ວງລະດູຝົນມໍລະສຸມໃນອາຊີໃຕ້ປີນີ້. ຂະນະທີ່ຕົວເລກເພີ່ມຂຶ້ນໃນອິນເດຍຈາກອຸທົກກະໄພເປັນບໍລິເວນກວ້າງໃນລັດເກຣລະທາງພາກໃຕ້.
ລະດູຝົນໃນອາຊີໃຕ້ ລະຫວ່າງເດືອນມິຖຸນາ-ກັນຍາ ເຮັດໃຫ້ມີຜູ້ເສຍຊີວິດ ແລະ ຄວາມເສຍຫາຍຮຸນແຮງທົ່ວພາກພື້ນທຸກປີ ໂດຍສະເພາະຢູ່ລັດເກຣລະແຫລ່ງທ່ອງທ່ຽວທາງພາກໃຕ້ຂອງອິນເດຍປະສົບໄພນ້ຳຖ້ວມຮຸນແຮງທີ່ສຸດໃນຮອບເກືອບ 100 ປີ ມີລາຍງານຜູ້ເສຍຊີວິດແລ້ວ 445 ຄົນ ແລະ ພົບສົບເພີ່ມອີກໃນແຕ່ລະວັນຂະນະກຳລັງດຳເນີນພາລະກິດທຳຄວາມສະອາດຄັ້ງໃຫຍ່ໃນພື້ນທີ່. ອຸທົກກະໄພເຮັດໃຫ້ປະຊາຊົນ 1 ລ້ານກວ່າຄົນ ຕ້ອງໄປອາໄສຢູ່ສູນພັກຊົ່ວຄາວ ແລະ ມີລາຍງານຜູ້ສູນຫາຍອີກ 15 ຄົນ. ໃນວັນທີ 27 ສິງຫາ, ຂໍ້ມູນທາງການອິນເດຍລະບຸວ່າ: ລັດເກຣລະມີລາຍງານຜູ້ເສຍຊີວິດເກີນເຄິ່ງຂອງຈຳນວນທັງໝົດ 1.000 ກວ່າຄົນທົ່ວອິນເດຍ ໂດຍຢູ່ລັດກໍນາກະເສຍຊີວິດ 160 ຄົນ, ລັດອຸຕໍປະເທດ 200 ຄົນ ແລະ ລັດເບງກໍຕາເວັນຕົກ 195 ຄົນ. ຝົນມໍລະສຸມຍັງພັດຖະຫລົ່ມເນປານ ເຮັດໃຫ້ມີຜູ້ເສຍຊີວິດ 87 ຄົນ ນັບແຕ່ເດືອນມິຖຸນາຜ່ານມາ, ສ່ວນຢູ່ສີລັງກາມີລາຍງານວ່າເຈົ້າໜ້າທີ່ສັ່ງອົບພະຍົບປະຊາຊົນ 750.000 ຄົນໃນພື້ນທີ່ສ່ຽງໃນປີນີ້ ໂດຍຈຳນວນເສຍຊີວິດຈາກຝົນຕົກນ້ຳຖ້ວມຫລຸດລົງເຫລືອ 24 ຄົນ ຈາກ 224 ຄົນ ລະຫວ່າງເດືອນພຶດສະພາ-ມິຖຸນາປີຜ່ານມາ. ຂໍ້ມູນທາງການລະບຸວ່າ: ບັງກະລາເທດມີລາຍງານຜູ້ເສຍຊີວິດຈາກອຸທົກກະໄພ ແລະ ດິນເຈື່ອນຢ່າງໜ້ອຍ 29 ຄົນ.
