ຍີ່ປຸ່ນຈະໃຊ້ລະບົບຈົດຈຳໃບໜ້າ ໃນໂອແລມປິກໂຕກຽວ 2020

ຜູ້​ຈັດ​ງານ​ຖະ​ແຫລ​ງ​ໃນ​ວັນ​ທີ 7 ສິງຫາ​ວ່າ: ​ໂອ​ແລມປິກ​ໂຕ​ກຽວ 2020 ຈະ​ເປັນ​ການ​ແຂ່ງຂັນ​ກິລາ​ໂອ​ແລມປິກ​​ເທື່ອ​ທຳ​ອິດ​ທີ່​ໃຊ້​ເຕັກ​ໂນ​ໂລ​ຊີ​ຈົດ​ຈຳ​ໃບ​ໜ້າ​ເຂົ້າມາ​ຊ່ວຍ​ລະບົບ​ຮັກສາ​ຄວາມ​ປອດ​ໄພ​ອ້ອມ​ຮອບ​ສະຖານ​ທີ່​ຈັດການ​ແຂ່ງຂັນ​ທັງ​ໝົດ.

ຜູ້​ຈັດ​ງານ​ໂຕ​ກຽວ 2020 ຮ່ວມ​ມື​ກັບ NEC ບໍລິສັດ​ໂທລະ​ຄົມມະນາຄົມ ​ແລະ ​ເຕັກ​ໂນ​ໂລ​ຊີ​ລາຍ​ໃຫຍ່​ຂອງຍີ່ປຸ່ນ ພັດທະນາ​ລະບົບ​ຈົດຈ​ຳ​ໃບ​ໜ້າ​ເປັນ​ເທື່ອ​ທຳ​ອິດ​ທີ່​ຈະ​ມາ​ໃຊ້​ໃນ​ກິລາ​ໂອ​ແລມປິກ. ທ່ານ ທາສີ​ໂຢຊິ ອິວາ​ຊິຕະ ຜູ້ອຳນວຍການ​ຝ່າຍ​ລະບົບ​ຄວາມ​ໝັ້ນຄົງ​ໂຕ​ກຽວ 2020 ຖະ​ແຫລ​ງວ່າ: ລະບົບ​ເຕັກ​ໂນ​ໂລ​ຊີ​ຈົດ​ຈຳ​ໃບ​ໜ້າ ​ເຊິ່ງຈະ​ໄດ້​ສາທິດ​ການ​ເຮັດ​ວຽກ​ໃຫ້​ສື່​ມວນ​ຊົນ​ໃນ​ງານ​ຖະ​ແຫລ​ງຂ່າວ​ທີ່​ນະຄອນຫລວງ​ໂຕ​ກຽວ ຈະ​ໃຊ້​ຊິ​ບ​ໄອ​ຊີ​ໃນ​ບັດ​ໄອ​ດີ ​ເພື່ອ​ພິສູດ​ຕົວ​ບຸກຄົນ​ທີ່​ເຂົ້າສະໜາມກິລາ​ກວ່າ 40 ​ແຫ່ງ. ​ເຈົ້າໜ້າ​ທີ່​ໂອ​ແລມປິກ ​ແລະ ນັກ​ກິລາ​ກວ່າ 300.000 ຄົນ​ຈະ​ຕ້ອງ​ມາ​ບັນທຶກ​ພາບ​ລົງ​ຖານ​ຂໍ້​ມູນ​ກ່ອນ​ເລີ່​ມການ​ແຂ່ງຂັນ​ກິລາ​ໂອ​ແລມປິກ 2020 ​ໃນ​ເດືອນ​ກໍລະກົດ ​ເຊິ່ງທຸກ​ຄົນ​ທີ່​ຈະ​ເຂົ້າສູ່​ສະໜາມກິລາ​ຈະ​ຕ້ອງ​ຜ່ານ​ລະບົບ​ຮັກສາ​ຄວາມ​ປອດ​ໄພ​ກ່ອນ. ຖະ​ແຫລ​ງການ​ລະບຸ​ວ່າ: ລະບົບ​ກວດ​ສອບ​ດ້ວຍ​ການ​ຈົດ​ຈຳ​ໃບ​ໜ້າ​ຈະ​ຊ່ວຍ​ຍົກ​ລະດັບ​ຄວາມ​ປອດ​ໄພ ​ແລະ ຫລຸດ​ຂັ້ນຕອນ​ບໍ່​ໃຫ້​ນັກ​ກິລາ​ເສຍ​ເວລາ​ຖ້າ​ດົນ.