ເອີລົບ-ຢູນີເຊັບ ຊ່ວຍເຫລືອພາຫະນະ ເພື່ອປັບປຸງວຽກງານໂພຊະນາການ ແກ່ລັດຖະບານລາວ

ຂ

ປລ. ​ສະຫະພາບເອີລົບ (EU) ​ແລະ ອົງການຢູນີເຊັບ (UNICEF) ປະຈຳ ສປປ ລາວ ​ໄດ້​ມອບລົດກະບະ ຈໍານວນ 11 ຄັນ ແລະ ລົດຈັກ 85 ຄັນ ໃຫ້ກະຊວງ ສາທາລະນະສຸກ ​ເພື່ອປະກອບສ່ວນໃນການປັບປຸງຄວາມສາມາດ ຂອງກອງເລຂາຄະນະກຳມາທິການ ວຽກງານໂພຊະນາການແຂວງຕ່າງໆ ໃນການລົງຕິດຕາມຊຸກຍູ້ຊ່ວຍເຫລືອ ກິດຈະກຳທີ່ກ່ຽວຂ້ອງກັບວຽກງານໂພຊະນາການ ໃນທ້ອງຖິ່ນຕ່າງໆ​ໃນ​ລາວ.

ພິທີ​ມອບ-​ຮັບ ​ພາຫະນະ​ດັ່ງກ່າວ, ​ໄດ້​ຈັດ​ຂຶ້ນ​ໃນ​ທ້າຍ​ອາທິດ​ທີ່​ຜ່ານ​ມາ ທີ່​ນະຄອນຫລວງ​ວຽງ​ຈັນ,​ ມອບ​ໂດຍ​ ທ່ານ ເລໂອ ຟາເບີ ເອກອັກຄະລັດຖະທູດ EU ແລະ ທ່ານ ອົກຕາວຽນ ບີໂວນ ຜູ້ຕາງໜ້າ ອົງການຢູນີເຊັບ ປະຈຳ ສປປ ລາວ ກ່າວ​ຮັບ,​ ໂດຍ ​ທ່ານ ດຣ. ບຸນກອງ ສີຫາວົງ ລັດຖະມົນຕີ ກະຊວງ ສາທາລະນະສຸກ. ການຊ່ວຍເຫລືອດ້ານພາຫະນະຄັ້ງ​ນີ້, ແມ່ນໜຶ່ງໃນກິດຈະກໍາການຮ່ວມມື ໃນການປັບປຸງດ້ານວຽກງານໂພຊະນາການ ​ໃນ​ບັນດາ​ແຂວງ​ເປົ້າ​ໝາຍ​ເປັນ​ຕົ້ນ ແຂວງອັດຕະປື, ສາລະວັນ, ສະຫວັນນະເຂດ, ຄຳມ່ວນ, ຊຽງຂວາງ, ຫົວພັນ, ຜົ້ງສາລີ, ຫລວງພະບາງ, ຫລວງນໍ້າທາ ແລະ ແຂວງບໍ່ແກ້ວ ເພື່ອເສີມຂະຫຍາຍຄວາມສາມາດ ໃນການຕິດຕາມຊຸກຍູ້ ແລະ ຊ່ວຍເຫລືອການປະຕິບັດ 22 ບູລິມະສິດ ຂອງການແຊກແຊງ ດ້ານວຽກງານໂພຊະນາການ.

ການຮ່ວມມື ລະຫວ່າງສະຫະພາບ EU-UNICEF ໃນການປັບປຸງວຽກງານໂພຊະນາການ ແມ່ນການຮ່ວມທຶນຊ່ວຍເຫລືອ ທີ່ມີຈຸດຫມຸ້ງໝາຍ ໃນການປັບປຸງການຮ່ວມມືຫລາຍຝ່າຍ ດ້ານການບໍລິຫານຄຸ້ມຄອງວຽກງານໂພຊະນາການຂັ້ນສູນກາງ, ແຂວງ ແລະ ເມືອງ, ຊຶ່ງເປັນວິທີການກະຕຸ້ນຜົນໄດ້ຮັບຂອງວຽກງານໂພຊະນາການຫລາຍຂຶ້ນ. ພ້ອມກັນນີ້, ຍັງແນໃສ່ສ້າງຄວາມສາດ ດ້ານການວາງແຜນ, ການປະ ຕິບັດການ ແລະ ການຕິດຕາມຊຸກຍູ້ ການປະຕິບັດໂຄງການໂພຊະນາການ ໃຫ້ມີປະສິດທິຜົນສູງ ຂອງ ກະຊວງສາທາລະນະສຸກ.

ທ່ານ ເລໂອ ຟາເບີ ກ່າວວ່າ: ການຮ່ວມມືເພື່ອປັບປຸງວຽກງານໂພຊະນາການ ແມ່ນໃຫ້ການສະ ໜັບສະໜູນ ການປະຕິບັດໂຄງການແບບຫລາຍຂະແໜງການ ໃນການແກ້ໄຂສິ່ງທ້າທາຍໃນການຂາດສານອາຫານ ທີ່ແຜ່ຂະຫຍາຍໃນທົ່ວປະເທດ ​ໂດຍ​ສະ​ເພາະກຸ່ມເດັກທີ່ຂາດສານອາຫານ ຢູ່ໃນກຸ່ມບັນດາຊຸມຊົນຊົນເຜົ່າ ໃນເຂດຫ່າງໄກສອກຫລີກ ແລະ ໂດດດ່ຽວ ທີ່ຍາກຕໍ່ການເຂົ້າເຖິງ. ພວກເຮົາຫວັງຢ່າງຍິ່ງວ່າ ລົດໃຫຍ່ ແລະ ລົດຈັກ ເຫລົ່ານີ້ ຈະອຳນວຍຄວາມສະດວກຢ່າງພຽງພໍ ໃຫ້ແກ່ການປະຕິບັດໂຄງ ການ ໃນຊຸມຊົນເປົ້າຫມາຍ, ໂດຍສະເພາະ ການລົງເຮັດວຽກກັບຊຸມຊົນທີ່ຢູ່ຫ່າງໄກທີ່ສຸດ ແລະ ຊຸມຊົນທີ່ດ້ອຍໂອກາດ.

ທ່ານ ອົກຕາວຽນ ບີໂວນ ກ່າວຕື່ມວ່າ: ເປົ້າໝາຍຂອງການຮ່ວມມື ແມ່ນ ເພື່ອເລັ່ງລັດການລຸດຜ່ອນພາວະການຂາດສານອາຫານຊໍາເຮຶ້ອ ໃນກຸ່ມເດັກອາຍຸຕໍ່າກ່ວາ 5 ປີ ໃຫ້ປະສົບຜົນສຳເລັດ ຫລາຍ ກ່ວາ 6 ປີທີ່ຜ່ານມາ. ແນວໃດກະຕາມ ເພື່ອບັນລຸເປົ້າຫມາຍດັ່ງກ່າວ, ຕ້ອງມີເຄື່ອງມືທີ່ເໝາະສົມ ທີ່ອໍານວຍຄວາມສະດວກໃຫ້ແກ່ການປະຕິບັດງານ. ພວກເຮົາເຊື່ອວ່າ ພາຫະນະດັ່ງກ່າວນີ້, ຈະຊ່ວຍໃນການແກ້ໄຂຂໍ້ຫຍຸ້ງຍາກດ້ານພາຫະນະ ທີ່ທີມງານຂັ້ນແຂວງ ແລະ ເມືອງກຳລັງປະເຊີນຢູ່ ເພື່ອເດີນທາງໄປຕິດ ຕາມຊຸກຍູ້ ການປະຕິບັດໂຄງການຢູ່ຊຸມຊົນ.