ຍີ່ປຸ່ນຜະເຊີນຄື້ນຄວາມຮ້ອນ ເສຍຊີວິດແລ້ວ 14 ຄົນ

ສື່​ຍີ່ປຸ່ນລາຍ​ງານ​ໃນ​ວັນ​ທີ 17 ກໍລະກົດ​ວ່າ: ຄື້ນຄວາມ​ຮ້ອນ​ຮຸນ​ແຮງ​ແຜ່​ປົກ​ຄຸມ​ຍີ່ປຸ່ນ​ໃນ​ອາທິດ​ຜ່ານ​ມາ ​ເຮັດ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 14 ຄົນ. ຂະນະ​ທີ່​ອຸນຫະພູມ​ສູງ​ຂຶ້ນຈົນ​ກະທົບ​ຕໍ່​ການ​ຟື້ນຟູ​ພື້ນທີ່​ປະສົບ​ໄພ​ນ້ຳຖ້ວມ ທີ່​ມີ​ຜູ້​ເສຍ​ຊີວິດ​ຫລາຍ​ກວ່າ 200 ຄົນ ​ໃນ​ອາທິດ​ຜ່ານ​ມາ.

ສື່​ລາຍ​ງານ​ຜູ້​ເສຍ​ຊີວິດ​ຈາກ​ສະພາບ​ອາກາດ​ຮ້ອນ​ອົບ​ເອົ້າ 14 ຄົນ​ໃນ​ທ້າຍ​ອາທິດ​ຜ່ານ​ມາ ​ເຊິ່ງລວມທັງ​ຜູ​້ຍິງ​ອາຍຸ 90 ປີ ທີ່​ພົບ​ນອນ​ໝົດ​ສະຕິ​ຢູ່​ສະໜາມ ​ແລະ ຍັງ​ມີ​ອີກ​ຫລາຍ​ພັນ​ຄົນ​ທີ່​ຕ້ອງ​ເຂົ້າຮັບ​ການ​ປິ່ນປົວ​ໃນ​ໂຮງໝໍ​ຈາກ​ອາກາ​ນປ່ວຍ​ທີ່​ມາ​ຈາກ​ອາກາດ​ຮ້ອນ. ສະພາບ​ອາກາດ​ຮ້ອນ​ຮຸນ​ແຮງ​ໃນ​ຫລາຍ​ພື້ນທີ່ ​ໂດຍ​ສະ​ເພາະ​ຢູ່​ແຂວງ​ກິຟຸ ອຸນຫະພູມ​ເພີ່ມ​ຂຶ້ນ​ເຖິງ 39,3 ອົງສາ ​ໃນ​ເມືອງ​ອິບິ​ງາ​ວະ ​ໃນ​ວັນ​ທີ 16 ກໍລະກົດ ​ເຊິ່ງຖື​ວ່າ​ອາກາດ​ຮ້ອນ​ທີ່​ສຸດ​ໃນ​ຍີ່ປຸ່ນ, ສ່ວນ​ຢູ່​ນະຄອນຫລວງ​ໂຕ​ກຽວ​ບັນທຶກ​ໄດ້ 34 ອົງສາ ​ໃນ​ວັນ​ທີ 16 ກໍລະກົດ. ອຸນຫະພູມ​ໃນ​ພື້ນທີ່​ທາງ​ພາກ​ຕາ​ເວັນ​ຕົກ​ຂອງ​ຍີ່ປຸ່ນ ​ເຊິ່ງຜະ​ເຊີນ​ກັບ​ອຸ​ທົກ​ກະ​ໄພ​ຮຸນ​ແຮງ​ຜ່ານ​ມາ ​ເພີ່ມ​ຂຶ້ນ​ເຖິງ 34,3 ອົງສາ ​ຍິ່ງ​ເພີ່ມ​ຄວາມ​ສ່ຽງ​ຕໍ່​ທະຫານ ​ແລະ ອາສາ​ສະໝັກ​ເກັບ​ກວາດ​ກອງ​ດິນ ​ແລະ ຊາ​ກຫັກ​ພັງ.