ທ່ານ ທຣຳ – ທ່ານ ກິມ ກຽມເຈລະຈາ ເລື່ອງປົດນິວເຄຼຍ-ສ້າງສັນຕິພາບ
ສຳນັກຂ່າວແຫ່ງຊາດຂອງ ສປປ ເກົາຫລີ ເປີດເຜີຍຫົວຂໍ້ສຳຄັນຂອງການຫາລືທີ່ສິງກະໂປ ລະຫວ່າງ ປະທານາທິບໍດີ ໂດນັນ ທຣຳ ຜູ້ນຳອາເມລິກາ ແລະ ທ່ານ ກິມ ຈ໋ອງອຸນ ຜູ້ນຳສູງສຸດຂອງ ສປປ ເກົາຫລີ ໃນວັນທີ 12 ມິຖຸນານີ້ ວ່າຄວບຄຸມທັງການປົດອາວຸດນິວເຄຼຍ ແລະ ກົນໄກການສ້າງສັນຕິພາບ.
ສຳນັກຂ່າວກາງເກົາຫລີ (KCNA) ກະບອກສຽງຂອງລັດຖະບານພຽງຢາງ ລາຍງານໃນວັນທີ 11 ມິຖຸນາວ່າ: ທ່ານ ກິມ ຈ໋ອງອຸນ ຜູ້ນຳສູງສຸດຂອງ ສປປ ເກົາຫລີ ເດີນທາງຢ້ຽມຢາມສິງກະໂປ ໂດຍມີກຳນົດພົບປະຫາລືກັບປະທານາທິບໍດີ ໂດນັນ ທຣຳ ຜູ້ນຳອາເມລິກາ ໃນວັນທີ 12 ມິຖຸນານີ້ ເພື່ອແລກປ່ຽນຄວາມຄິດເຫັນໃນບັນຫາທີ່ “ຫລາກຫລາຍ ແລະ ເລິກເຊິງ” ກ່ຽວກັບການເສີມສ້າງການພົວພັນລະດັບທະວີພາຄີໃນຮູບແບບໃໝ່ ບໍ່ວ່າຈະເປັນກົນໄກການສ້າງສັນຕິພາບທີ່ຖາວອນ ແລະ ຍືນຍົງຢູ່ແຫລມເກົາຫລີ, ເນັ້ນໜັກເຖິງຂະບວນການປົດອາວຸດນິວເຄຼຍຢູ່ແຫລມເກົາຫລີ ແລະ ອີກຫລາກຫລາຍບັນຫາທີ່ທັງສອງຝ່າຍມີຄວາມກັງວົນຮ່ວມກັນ.
ທັງນີ້, ທ່ານ ກິມ ຈ໋ອງອຸນ ໄດ້ຮັບການຕ້ອນຮັບຈາກນາຍົກລັດຖະມົນຕີ ລີ ຊຽນ ລຸງ ຜູ້ນຳສິງກະໂປ ທີ່ທຳນຽບອິສຕານາ ໂດຍຜູ້ນຳຂອງ ສປປ ເກົາຫລີ ກ່າວຂອບໃຈລັດຖະບານສິງກະໂປໃນການເປັນເຈົ້າພາບຈັດກອງປະຊຸມຄັ້ງປະຫວັດສາດ ທີ່ທົ່ວໂລກເຝົ້າຕິດຕາມຢ່າງໃກ້ຊິດ. ຂະນະທີ່ ທ່ານ ລີ ຊຽນ ລຸງ ກ່າວວ່າ: ລັດຖະບານສິງກະໂປທຸ້ມງົບປະມານ 20 ລ້ານໂດລາສິງກະໂປ ເຊິ່ງເປັນຄ່າໃຊ້ຈ່າຍທີ່ຝ່າຍສິງກະໂປ “ເຕັມໃຈ” ເພື່ອຮ່ວມເປັນສ່ວນໜຶ່ງຂອງຂະບວນການສ້າງສັນຕິພາບລະຫວ່າງປະເທດ.
