ອົງການອະນາໄມໂລກແນະນຳສັກວັກແຊງ ປ້ອງກັນໄຂ້ເຫລືອງກ່ອນໄປບຣາຊິນ

ຄົນ​ບຣາຊິນຈຳນວນ​ຫລາຍ​ຫລັ່ງ​ໄຫລກັນ​ໄປ​ສັກ​ວັກ​ແຊງ​ປ້ອງ​ກັນ​ພະຍາດ​ໄຂ້​ເຫລືອງ, ຫລັງ​ອົງການ​ອະນາ​ໄມ​ໂລກ​ອອກ​ປະກາດ​ເຕືອນ ​ແລະ ​ແນະນຳ​ໃຫ້​ນັກ​ທ່ອງ​ທ່ຽວ​ສັກ​ວັກ​ແຊງ​ກ່ອນ​ເດີນທາງ​ໄປ​ບຣາຊິນ.

WHO: All of Sao Paulo State at Risk for Yellow Fever https://t.co/2ZYwYQPxn9 pic.twitter.com/dkriLS6lgU

— Voice of America (@VOANews) January 16, 2018

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ເມືອງ​ເຊົາ​ເປົາ​ລູ ປະ​ເທດ​ບຣາຊິນ ​ໃນ​ວັນ​ທີ 18 ມັງກອນ​ວ່າ: ບັນຍາກາດ​ຢູ່​ຕາມ​ໂຮງໝໍ​ເກືອບ​ທຸກ​ແຫ່ງ​​ໃນ​ບຣາຊິນ ​ໂດຍ​ສະ​ເພາະ​ເມືອງ​ເຊົາ​ເປົາ​ລູ ​ເຊິ່ງ​ເປັນ​ເມືອງ​ໃຫຍ່​ທີ່​ສຸດ​ຂອງ​ປະ​ເທດ ​ແລະ ​ເປັນ​ເມືອງ​ເອກ​ຂອງ​ລັດ​ເຊົາ​ເປົາ​ລູ ທີ່​ຕັ້ງຢູ່​ໃນ​ບໍລິ​ເວນ​ພາກ​ຕາ​ເວັນ​ອອກ​ ​ໜາ​ແໜ້ນ​ໄປ​ດ້ວຍ​ປະຊາຊົນ​ທຸກ​ເພດ​ທຸກ​ໄວ ​ເຊິ່ງພາກັນ​ໄປ​ສັກ​ວັກ​​ແຊງ​ປ້ອງ​ກັນ​ພະຍາດ​ໄຂ້​ເຫລືອງ. ນອກຈາກ​ນີ້ ບັນຍາກາດ​ການ​ຕື່ນ​ຕົວ​ຂອງ​ປະຊາຊົນ​ຍັງ​ເກີດ​ຂຶ້ນຢູ່​ນະຄອນຫລວງ​ບຣາຊິ​ລີ ​ແລະ ລັດ​ມີ​ນັສ​ເຊ​ໄຣ ​ເຊິ່ງມີ​ເມືອງ​ເອກ​ຄື​ເມືອງ​ເບ​ໂລ​ໂອຣີຊອນ​ຕີ  ​ແລະ ​ເປັນ​ເມືອງ​ໃຫຍ່​ອັນ​ດັບ 3 ຂອງ​ບຣາຊິນ.

ທັງ​ນີ້ ອົງການ​ອະນາ​ໄມ​ໂລກ (WHO) ອອກ​ປະກາດ​ໃນ​ອາທິດ​ນີ້ ​ແນະນຳ​ໃຫ້​ປະຊາຊົນ​ໃນ​ບຣາຊິນ​ໂດຍ​ສະ​ເພາະ​ລັດ​ເຊົາ​ເປົາ​ລູ ​ເພີ່ມ​ຄວາມ​ລະມັດລະວັງ​ການ​ເຈັບ​ເປັນ​ດ້ວຍ​ພະຍາດ​ໄຂ້​ເຫລືອງ​ທີ່​ມີ​ຍຸງ​ລາຍ ຫລື ຍຸງ​ໄຂ້​ເຫລືອງ​ເພດ​ເມຍ​ເປ​ັນພາຫະ ​ເນື່ອງ​ຈາກ​ພົບ​ຜູ້​ເສຍ​ຊີວິດ​ຢ່າງ​ໜ້ອຍ 11 ຄົນ ນັບ​ແຕ່​ເດືອນ​ກໍລະກົດ​ປີຜ່ານມາ ​ແລະ ສະຖິຕິ​ຜູ້​ເສຍ​ຊີວິດ​ຂອງ​ລັດ​ມີ​ນັສ​ເຊ​​ໄຣ​ໃນ​ໄລຍະ​ເວລາ​ດຽວ​ກັນ​ຢ່າງ​ໜ້ອຍ 15 ຄົນ ​ໂດຍ WHO ​ແນະນຳ​ໃຫ້​ນັກ​ທ່ອງ​ທ່ຽວ​ທີ່​ມີ​ຈຸດປະສົງ​ທ່ອງ​ທ່ຽວບຣາຊິນ​ສັກ​ວັກ​ແຊງ​ປ້ອງ​ກັນ​ການ​ຕິດ​ເຊື້ອ​ໄວຣັສດັ່ງກ່າວ​ກ່ອນ​ອອກ​ເດີນທາງ.