ສ.ປ. ຈີນ ເຂັ້ມງວດ! ພາວເວີແບັງ ຕ້ອງຜ່ານມາດຕະຖານ “3C” ກ່ອນນຳເຂົ້າປະເທດ
ຜູ້ໂດຍສານທີ່ເດີນທາງເຂົ້າປະເທດ ສ.ປ. ຈີນ ຕ້ອງລະມັດລະວັງ ກົດລະບຽບໃໝ່ທີ່ເຈົ້າໜ້າທີ່ຈີນບັງຄັບໃຊ້ຢູ່ສະໜາມບິນ, ພາວເວີແບັງ (Power Bank) ທີ່ຈະເອົາຂຶ້ນຍົນ ຫລື ນຳເຂົ້າປະເທດຕ້ອງເປັນອຸປະກອນທີ່ໄດ້ຮັບການຢັ້ງຢືນຕາມມາດຕະຖານ CCC (China Compulsory Certification) ເທົ່ານັ້ນ.
ມາດຕະການນີ້ຖືກບັງຄັບໃຊ້ເພື່ອເພີ່ມຄວາມປອດໄພດ້ານການບິນ ແລະ ປ້ອງກັນຄວາມສ່ຽງຈາກອຸປະກອນໄຟຟ້າທີ່ບໍ່ໄດ້ມາດຕະຖານ ເຊິ່ງອາດກໍ່ໃຫ້ເກີດເຫດໄຟໄໝ້ ຫຼື ເປັນອັນຕະລາຍຕໍ່ຜູ້ໂດຍສານຢູ່ເທິງຍົນ.
ມາດຕະຖານ CCC ຫລື 3C ຖືເປັນລະບົບການຢັ້ງຢືນບັງຄັບຂອງ ສ.ປ. ຈີນ, ໂດຍຈະມີການກວດສອບຄຸນນະພາບ, ຄວາມປອດໄພ ແລະ ຄວາມໜ້າເຊື່ອຖືຂອງອຸປະກອນກ່ອນນຳອອກຈຳໜ່າຍ ຫລື ນຳໃຊ້ໃນ ສ.ປ. ຈີນ.
ເຈົ້າໜ້າທີ່ສະໜາມບິນຂອງ ສ.ປ. ຈີນ ຍັງໄດ້ເຕືອນວ່າ ຖ້າກວດພົບພາວເວີແບັງທີ່ບໍ່ໄດ້ຜ່ານການຮັບຮອງ 3C ອາດຈະຖືກຍຶດ ຫລື ບໍ່ອະນຸຍາດໃຫ້ນຳເຂົ້າປະເທດທັນທີ. ດັ່ງນັ້ນ, ຜູ້ໂດຍສານຄວນກວດສອບອຸປະກອນຂອງຕົນເອງໃຫ້ແນ່ໃຈກ່ອນເດີນທາງ ເພື່ອປ້ອງກັນຄວາມບໍ່ສະດວກຕ່າງໆ.
