ລັດຖະບານຈີນຈະຈຳກັດປະຊາກອນ ຊຽງໄຮ້ບໍ່ໃຫ້ເກີນ 25 ລ້ານຄົນ

ຄະນະ​ລັດຖະບານ​ຈີນ​ຈະ​ຈຳກັດ​ຈຳນວນ​ປະຊາກອນ​ໃນ​ນະຄອນ​ຊຽງ​ໄຮ້​ບໍ່​ໃຫ້​ເກີນ 25 ລ້ານ​ຄົນ​ພາຍ​ໃນ​ປີ 2035 ຕາມ​ນະ​ໂຍບາຍ​ແກ້​ບັນຫາ​ພະຍາດ​ເມືອງ​ໃຫຍ່.

​ເວັບ​ໄຊ​ລັດຖະບານ​ຈີນ​ແຈ້ງ​ໃນ​ວັນ​ທີ 25 ທັນວາ​ວ່າ: ຄະນະ​ລັດຖະບານ​ເຫັນ​ພ້ອມ​ແຜນ​ແມ່​ບົດ​ຊຽງ​ໄຮ້​ປີ 2017-2035 ໜຶ່ງ​ໃນ​ນັ້ນມີ​ເປົ້າໝາຍ​ເລື່ອງ​ການ​ຈຳກັດ​ຈຳນວນ​ປະຊາກອນ​ໄວ້​ທີ່ 25 ລ້ານ​ຄົນ ​ແລະ ຈຳກັດ​ພື້ນທີ່​ກໍ່ສ້າງ​ໄວ້​ທີ່ 3.200 ​ຕາ​ກິ​ໂລ​ແມັດ ພາຍ​ໃນ​ປີ 2035 ອັນ​ເປັນ​ສ່ວນ​ໜຶ່ງ​ຂອງ​ນະ​ໂຍບາຍ​ແກ້​ໄຂ​ບັນຫາ​ພະຍາດ​ເມືອງ​ໃຫຍ່. ສື່​ທາງ​ການ​ຈີນ​ອະທິບາຍ​ວ່າ: ພະຍາດ​ເມື​ອງ​ໃຫຍ່​ໝາຍ​ເຖິງ​ພະຍາດ​ຂອງ​ມະຫາ​ນະຄອນ​ທີ່​ເຕັມ​ໄປ​ດ້ວຍ​ມົນ​ລະ​ພິດ​ດ້ານ​ສິ່ງ​ແວດ​ລ້ອມ, ການ​ຈະລາຈອນ​ແອ​ອັດ ​ແລະ ບໍລິການ​ສາທາລະນະ​ເລື່ອງ​ການ​ສຶກສາ ​ແລະ ການ​ແພດ​ບໍ່​ພຽງພໍ. ນອກຈາກ​ນີ້ ມະຫາ​ນະຄອນ​ຂອງ​ຈີນ​ຫລາຍ​ແຫ່ງ​ຍັງ​ມີ​ບັນຫາ​ລາຄາ​ທີ່ຢູ່​ອາ​ໄສ​ປັບ​ຂຶ້ນຕໍ່​ເນື່ອງ ຈົນ​ເກີດ​ກະ​ແສ​ກັງວົນ​ວ່າ​ຈະ​ເກີດ​ຟອງ​ສະ​ບູອະສັງຫາລິມະ​ຊັບ. ສຳນັກ​ຂ່າວ​ຊິນ​ຮົວຂອງ​ທາງ​ການ​ຈີນ​ລາຍ​ງານ​​ໃນ​ປີ​ກ່ອນ​ວ່າ: ຮອດ​ທ້າຍ​ປີ 2015 ຊຽງ​ໄຮ້​ມີ​ພົນລະ​ເມືອງ​ທີ່​ອາ​ໄສ​ຢູ່​ຖາວອນ 24,15 ລ້ານ​ຄົນ.