ແຂວງຫລວງພະບາງເລັ່ງ ສ້ອມແປງເສັ້ນທາງຫລວງແຫ່ງຊາດ ທີ່ເປ່ເພໜັກ
ຂ່າວສານ ແຂວງຫລວງພະບາງ ລາຍງານວັນທີ 20 ມິຖຸນາ 2025 ວ່າ: ທ່ານ ບຣົ່ງຫວ່າງ ຫວ່າງເຈ່ຍຊ່າ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຫລວງພະບາງ ໄດ້ໃຫ້ສຳພາດຕໍ່ສື່ມວນຊົນວ່າພະແນກໂຍທາທິການ ແລະ ຂົນສົ່ງແຂວງໄດ້ຈັດລຽງບູລິມະສິດການສ້ອມແປງແບບສຸກເສີນຈຸດທີ່ເປ່ເພໜັກໜ່ວງ ໄປ-ມາ ມີຄວາມຫຍຸ້ງຍາກ, ບໍ່ສາມາດໄປໄດ້ ຕາມເສັ້ນທາງຫລວງແຫ່ງຊາດ ໃຫ້ສາມາດທຽວໄດ້ປົກກະຕິ ແລະ ເພື່ອບໍ່ໃຫ້ເປັນການຫລ້າຊ້າ ແລະ ຕ້ອງໄດ້ແກ້ໄຂຮີບດ່ວນ ພະແນກໂຍທາທິການ ແລະ ຂົນສົ່ງ ໃນນາມຜູ້ຮັບຜິດຊອບ ຈຶ່ງໄດ້ຈັດຊື້-ຈັດຈ້າງ ຄັດເລືອກເອົາບໍລິສັດທີ່ມີເງື່ອນໄຂຄົບຖ້ວນທາງດ້ານພາຫະນະກົນຈັກ, ບຸກຄະລາກອນ, ທຶນຮອນ ແລະ ອອກໜັງສືໃຫ້ບໍລິສັດທີ່ຊະນະການປະມູນ ລົງມືຈັດຕັ້ງປະຕິບັດວຽກໂດຍໄວ ໂດຍນຳໃຊ້ງົບປະມານກອງທຶນທາງປະຈຳປີ 2025 ຮ່ວງບູລະນະຮັກສາ ແລະ ສ້ອມແປງເສັ້ນທາງຫລວງແຫ່ງຊາດ ຂອບເຂດແຂວງຫລວງພະບາງ ໂດຍໄດ້ແບ່ງອອກເປັນ 9 ຊ່ວງ ໂຄງການກໍ່ສ້າງ ຄື:
- ໂຄງການສ້ອມແປງທາງຫລວງແຫ່ງຊາດ ທາງເລກທີ 13 ເໜືອ ແຕ່ຊາຍແດນແຂວງວຽງຈັນ ຫາ ເມືອງຊຽງເງິນ, ລວງຍາວ 114 ກິໂລແມັດ
- ໂຄງການສ້ອມແປງທາງຫລວງແຫ່ງຊາດ ທາງເລກທີ 13 ເໜືອ ແຕ່ເມືອງຊຽງເງິນ ຫາ ສາມແຍກວົງວຽນກົກງິ້ວ ແລະ ແຕ່ສາມແຍກກົກງິ້ວ ຫາ ຂົວນໍ້າຄານ (ວົງວຽນບ້ານວັງເງິນ) ລວງຍາວທັງໝົດ 21 ກິໂລແມັດ
- ໂຄງການສ້ອມແປງທາງຫລວງແຫ່ງຊາດ ທາງເລກທີ 13 ເໜືອ ແຕ່ສາມແຍກ ວົງວຽນກົກງິ້ວ ຫາ ສາມແຍກວົງວຽນພອນໄຊ ລວງຍາວ 22.5 ກິໂລແມັດ
- ໂຄງການສ້ອມແປງທາງຫລວງແຫ່ງຊາດ ທາງເລກທີ 13 ເໜືອ ແຕ່ສາມແຍກ ວົງວຽນບ້ານພອນໄຊ ຫາ ບ້ານປາກມອງ ລວງຍາວ 100.5 ກິໂລແມັດ
- ໂຄງການສ້ອມແປງທາງຫຼວງແຫ່ງຊາດ ທາງເລກທີ 7 ແຕ່ສາມແຍກພູຄູນ ຫາ ຊາຍແດນແຂວງຊຽງຂວາງ ລວງຍາວ 42 ກິໂລແມັດ
- ໂຄງການສ້ອມແປງທາງຫລວງແຫ່ງຊາດ ທາງເລກທີ 4 ແຕ່ສາມແຍກປາກແວດ ຫາ ປາກຄອນ ແລະ ທາງເລກທີ 22 ແຕ່ສາມແຍກປົ່ງດົງ ຫາ ຊາຍແດນແຂວງວຽງຈັນ ລວງຍາວທັງໝົດ 90.4 ກິໂລແມັດ
- ໂຄງການສ້ອມແປງທາງຫລວງແຫ່ງຊາດ ທາງເລກທີ 1C ແຕ່ບ້ານປາກມອງ ຫາ ບ້ານຫ້ວຍແຊວ ລວງຍາວ 60 ກມ
- ໂຄງການສ້ອມແປງທາງຫລວງແຫ່ງຊາດ ທາງເລກທີ 1C ແຕ່ບ້ານຫ້ວຍແຊວ ຫາ ບ້ານສາມສຸມ ລວງຍາວ 40 ກິໂລແມັດ
- ໂຄງການສ້ອມແປງທາງຫລວງແຫ່ງຊາດ ທາງເລກທີ IC ແຕ່ບ້ານສາມສຸມ ຫາ ຊາຍແດນແຂວງຫົວພັນ ລວງຍາວ 46 ກິໂລແມັດ.
ມາຮອດປັດຈຸບັນນີ້ບັນດາບໍລິສັດຮັບເໝົາພວມເລັ່ງລົງມືແກ້ໄຂສ້ອມແປງເສັ້ນທາງຈຸດທີ່ມີຄວາມສຽງທີ່ລົດຈະຄາເພື່ອໃຫ້ ລົດແລ່ນສະດວກໃນຊ່ວງລະດູຝົນ. ສ່ວນການຍົກລະດັບເສັ້ນທາງໃຫ້ໄດ້ມາດຕະຖານ ເພື່ອຮອງຮັບສະພາບລົດບັນທຸກໜັກໃນອານາຄົດ ກຳລັງສະເໜີຄົ້ນຄວ້າຮູບແບບໃໝ່ໃຫ້ບໍລິສັດທີ່ມີທ່າແຮງທາງດ້ານການເງິນ, ບຸກຄະລາກອນ ມາຈັດຕັ້ງປະຕິບັດ.
ທີ່ມາ: LuangPrabang News
