ຮອງປະທານສະພາ ຖະແຫລງ ຜົນສຳເລັດການພິຈາລະນາວຽກງານວຽກງານ ຂອງສະພາແຫ່ງຊາດ

ສຳລັບ ດ້ານນິຕິບັນຍັດ ການສ້າງ ແລະ ປັບປຸງກົດໝາຍ ສາມາດບັນລຸໄດ້ 52 ສະບັບ, ໄດ້ປັບປຸງກົດໝາຍຂົງເຂດສ່ວຍສາອາກອນ ແລະ ກົດໝາຍວ່າດ້ວຍຢາເສບຕິດ ເພື່ອຮັບໃຊ້ໃຫ້ແກ່ການປະຕິບັດ ສອງວາລະແຫ່ງຊາດ, ພ້ອມທັງ ຄົ້ນຄວ້າປັບປຸງແຜນການສ້າງ ແລະ ປັບປຸງກົດໝາຍ ແຕ່ປີ 2023-2025 ມີຈໍານວນ 40 ສະບັບ; ສຳເລັດການຈັດຕັ້ງປະເມີນການປະຕິບັດກົດໝາຍ ຂົງເຂດເສດຖະກິດ-ການເງິນ, ຂົງເຂດຍຸຕິທໍາ, ຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ຂົງເຂດສະພາແຫ່ງຊາດ ຈໍານວນ 15 ສະບັບ; ໃຫ້ສັດຕະຍາບັນແກ່ສົນທິສັນຍາ-ສັນຍາສາກົນ, ຈໍານວນໜຶ່ງຕາມການສະເໜີຂອງລັດຖະບານ. ສ່ວນດ້ານການຕົກລົງບັນຫາສໍາຄັນພື້ນຖານຂອງປະເທດຊາດ ໄດ້ດໍາເນີນກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ໂດຍໄດ້ພິຈາລະນາຕົກລົງບັນຫາສໍາຄັນພື້ນຖານຂອງປະເທດຊາດ ເປັນຕົ້ນ ການເລືອກຕັ້ງບຸກຄະລາກອນໃນຕໍາແໜ່ງສໍາຄັນຂອງລັດ, ຮັບຮອງເອົາ ກົງຈັກການຈັດຕັ້ງ ແລະ ບຸກຄະລາກອນ ຕາມກົດໝາຍກໍານົດ; ດໍາເນີນກອງປະຊຸມສະໄໝສາມັນ 5 ຄັ້ງ ເພື່ອພິຈາລະນາ 160 ເນື້ອໃນ, ອອກເປັນມະຕິ 122 ສະບັບ; ດໍາເນີີນກອງປະຊຸມສະໄໝວິສາມັນ 1 ເພື່ອພິຈາລະນາຮັບຮອງເອົາ 2 ວາລະແຫ່ງຊາດວ່າດ້ວຍ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ; ດໍາເນີນກອງປະຊຸມຄະນະປະຈໍາສະພາແຫ່ງຊາດ ຈໍານວນ 33 ຄັ້ງ ເພື່ອພິຈາລະນາ 513 ເນື້ອໃນ ແລະ ອອກເປັນມະຕິ ຈໍານວນ 223 ສະບັບ. ດ້ານການຕິດຕາມກວດກາ ໄດ້ຄົ້ນຄວ້າບັນຫາເຄັ່ງຮ້ອນຂອງສັງຄົມ ເພື່ອກໍານົດເປັນຫົວຂໍ້ຕິດຕາມກວດກາຂອງ ສະພາແຫ່ງຊາດ ແລະ ບັນດາກໍາມາທິການສະພາແຫ່ງຊາດ ຈໍານວນ 70 ຄັ້ງ; ດໍາເນີນກອງປະຊຸມຮ່ວມ ລະຫວ່າງ ຄະນະປະຈໍາສະພາແຫ່ງຊາດ ແລະ ລັດຖະບານ ຈຳນວນ 5 ຄັ້ງ ຊຶ່ງໄດ້ພິຈາລະນາ 39 ເນື້ອໃນ; ດໍາເນີນກອງປະຊຸມຮ່ວມ ລະຫວ່າງ ຄະນະປະຈໍາສະພາແຫ່ງຊາດ ແລະອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ອົງການກວດກາແຫ່ງລັດ, ອົງການກວດສອບແຫ່ງລັດ, ສູນກາງແນວລາວສ້າງຊາດ ແລະ ພາກສ່ວນກ່ຽວຂ້ອງ ໃນແຕ່ລະປີ; ຕິດຕາມກວດກາ ດ້ວຍການປະກອບຄໍາເຫັນ, ຕັ້ງຄໍາຊັກຖາມໃນກອງປະຊຸມສະພາແຫ່ງຊາດ ເພື່ອໃຫ້ພາກສ່ວນກ່ຽວຂ້ອງ ຈໍານວນ 22 ພາກສ່ວນ ມາຊີ້ແຈງ, ກວມເອົາ 183 ຄໍາຖາມ ທີ່ພົວພັນກັບ ການພັດທະນາເສດຖະກິດ-ສັງຄົມ, ການເໜັງຕີງຂອງລາຄາສິນຄ້າ, ການຈັດຕັ້ງປະຕິບັດໂຄງການລົງທຶນຂອງລັດ, ການຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ, ການແກ້ໄຂປະກົດການຫຍໍ້ທໍ້ໃນສັງຄົມ;ໄດ້ຮັບຄໍາຮ້ອງຂໍຄວາມເປັນທໍາ ຂອງພົນລະເມືອງ ຈໍານວນ 1.429 ເລື່ອງ, ສົ່ງໃຫ້ພາກສ່ວນກ່ຽວຂ້ອງ 919 ເລື່ອງ; ໄດ້ຕ້ອນຮັບ ແລະ ໃຫ້ຄໍາປຶກສາແກ່ປະຊາຊົນ ໄດ້ຈຳນວນ 834 ຄັ້ງ.

ສຳລັບ ທິດທາງແຜນການທ້າຍສະໄໝ ຮອດປີ 2025 ຈະຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ ແຕ່ປີ 2023-2025 ຊຶ່ງລວມມີຈໍານວນ 40 ສະບັບ; ຄົ້ນຄວ້າ ແລະ ກະກຽມໃຫ້ແກ່ການປັບປຸງລັດຖະທໍາມະນູນ; ຄົ້ນຄວ້າ, ໃຫ້ສັດຕະຍາບັນແກ່ສົນທິສັນຍາ-ສັນຍາສາກົນ ທີ່ ສປປ ລາວ ເປັນພາຄີ ຕາມການສະເໜີ ຂອງລັດຖະບານ. ພ້ອມທັງ ຈະເອົາໃຈໃສ່ຊີ້ນໍາໃນການປະສານສົມທົບກັບ ພາກສ່ວນກ່ຽວຂ້ອງ ເພື່ອປຶກສາຫາລື ແລະ ເອກະພາບກ່ຽວກັບເນື້ອໃນແຕ່ລະບັນຫາ ກ່ອນຈະນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 7, ເທື່ອທີ 8, ເທື່ອທີ 9 ແລະ ເທື່ອທີ 10 ຂອງສະພາແຫ່ງຊາດ ຊຸດທີ IX ແລະ ດໍາເນີນກອງປະຊຸມຄະນະປະຈໍາສະພາ ແຫ່ງຊາດປະຈໍາເດືອນເປັນປົກກະຕິ ເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ.

ສ່ວນ ທິດທາງແຜນການ ປະຈໍາປີ 2024 ສະພາແຫ່ງຊາດ ຊຸດທີ IX ຈະສ້າງ ແລະ ປັບປຸງກົດໝາຍ ປະຈໍາປີ 2024 ຈໍານວນ 26 ສະບັບ; ຄົ້ນຄວ້າ ກະກຽມປັບປຸງລັດຖະທໍາມະນູນ ແຫ່ງ ສປປ ລາວ ເພື່ອຂໍທິດຊີ້ນໍາຈາກກົມການເມືອງສູນກາງພັກ; ຄົ້ນຄວ້າການໃຫ້ສັດຕະຍາບັນແກ່ ສົນທິສັນຍາ-ສັນຍາສາກົນ ທີ່ ສປປ ລາວ ເປັນພາຄີ ຕາມການສະເໜີຂອງພາກສ່ວນກ່ຽວຂ້ອງ ແລະ ອື່ນໆ.