ລາວ ແລະ ສ. ເກົາຫລີ ຮັດແໜ້ນສາຍພົວພັນຮ່ວມມື ສອງອົງການນິຕິບັນຍັດໃຫ້ນັບມື້ນັບຂະຫຍາຍຕົວຍິ່ງຂຶ້ນ
ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ໄດ້ຕ້ອນຮັບ ແລະ ຍິນດີ ຕໍ່ ທ່ານ ປັກ ບ່ຽງຊອກ ສະມາຊິກສະພາແຫ່ງຊາດ, ອະດີດປະທານສະພາແຫ່ງຊາດ ສ. ເກົາຫລີ ພ້ອມຄະນະ ໃນໂອກາດມາເຄື່ອນໄຫວຢ້ຽມຢາມ ແລະເຮັດວຽກ ຢູ່ ສປປ ລາວ ໃນວັນທີ 26-28 ກໍລະກົດ 2023.ເຊິ່ງເປັນການພົບປະຄັ້ງທີ 2 ພາຍຫລັງທີ່ໄດ້ພົບປະທາງໄກ ໃນເດືອນມີນາ 2022 ທີ່ຜ່ານມາ; ສະແດງຄວາມເຫັນໃຈຕໍ່ລັດຖະບານ ແລະ ປະຊາຊົນ ສ. ເກົາຫລີ ໃນເຫດການໄພທຳມະຊາດນ້ຳຖ້ວມກະທັນຫັນ ໃນຕົ້ນເດືອນກໍລະກົດຜ່ານມາ ອັນໄດ້ກໍ່ໃຫ້ເກີດຄວາມເສຍຫາຍ ທັງຊີວິດ ແລະ ຊັບສິນຢ່າງຫລວງຫລາຍ ແລະ ໄດ້ຕີລາຄາສູງຕໍ່ການຢ້ຽມຢາມ ເປັນການປະກອບສ່ວນອັນສໍາຄັນເຂົ້າໃນການຊູກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການພົວພັນຮ່ວມມືອັນດີງາມ ລະຫວ່າງ ສອງປະເທດລາວ ແລະ ສ. ເກົາຫລີ ໂດຍສະເພາະສອງອົງການນິຕິບັນຍັດ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.
ໂອກາດນີ້, ທັງສອງຝ່າຍໄດ້ແຈ້ງກ່ຽວກັບສະພາບລວມຂອງເສດຖະກິດ-ສັງຄົມ ໃຫ້ກັນ ແລະ ກັນຊາບ ທັງຕີລາຄາສູງຕໍ່ສາຍພົວພັນ ແລະ ການຮ່ວມມື ລະຫວ່າງສອງປະເທດ ລາວ ແລະ ສ. ເກົາຫລີ ທີ່ມີມູນເຊື້ອດີງາມມາແຕ່ດົນນານ ແລະ ໄດ້ຮັບການເສີມຂະຫຍາຍຢ່າງຕໍ່ເນື່ອງ ສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ ລະຫວ່າງສອງປະເທດ, ມີການຮ່ວມມືທີ່ດີທາງດ້ານເສດຖະກິດ, ການຄ້າ, ການລົງທຶນ, ສຶກສາ, ສາທາລະນະສຸກ, ທ່ອງທ່ຽວ, ກິລາ ແລະອື່ນໆ ເຊິ່ງ ສ. ເກົາຫລີ ເປັນປະເທດທີ່ມີການລົງທຶນໃນອັນດັບ 5 ຢູ່ ສປປ ລາວ ໂດຍມີຂະແໜງພະລັງງານໄຟຟ້າ, ການກໍ່ສ້າງ, ການບໍລິການ, ກະສິກຳ, ອຸດສາຫະກໍາ ແລະ ຫັດຖະກໍາ, ການທ່ອງທ່ຽວ, ໂຮງແຮມ ແລະ ຮ້ານອາຫານ, ທະນາຄານ ແລະ ອື່ນໆ; ພ້ອມ ທັງນີ້ກໍແລກປ່ຽນຮ່ວມມືຂອງສອງອົງການນິຕິບັນຍັດລາວ-ສ. ເກົາຫລີ ໃນໄລຍະຜ່ານມາ ແລະ ແຜນການຮ່ວມມືໃນຕໍ່ໜ້າ ທັງຫາລືກັນໃນວຽກງານອື່ນໆ ທີ່ຕ່າງຝ່າຍຕ່າງໃຫ້ຄວາມສົນໃຈຕື່ມອີກ.
ສອງຝ່າຍເປັນເອກະພາບກັນຫລາຍບັນຫາ ເປັນຕົ້ນ ການສະໜັບສະໜູນ ສປປ ລາວ ເປັນປະທານອາຊຽນ ໃນປີ 2024 ໃນນັ້ນກໍຈະເປັນເຈົ້າພາບກອງປະຊຸມສຸດຍອດອາຊຽນ ຄັ້ງທີ 43 ແລະ ຄັ້ງທີ 44. ສ່ວນສະພາແຫ່ງຊາດລາວ ກໍຈະເປັນເຈົ້າພາບຈັດກອງປະຊຸມໃຫຍ່ ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45, ຂົນຂວາຍເອົາບັນດາໂຄງການລົງທຶນຂະໜາດໃຫຍ່, ນັກທ່ອງທ່ຽວ, ເປີດສາຍການບິນ ລະຫວ່າງ ແຂວງຫລວງພະບາງ ແລະ ເມືອງທ່ອງທ່ຽວ ຂອງ ສ. ເກົາຫລີ, ຊຸກຍູ້ເອົາແຮງງານລາວໄປອອກແຮງງານຢູ່ ສ. ເກົາຫລີ ແລະ ອື່ນໆ.
