ສໍາເລັດໂຄງການສ້າງໂອກາດການມີວຽກເຮັດງານທຳໃຫ້ແຮງງານເຄື່ອນຍ້າຍກັບຄືນປະເທດ
ວັນທີ 26 ພຶດສະພາ 2023 ຜ່ານມານີ້ ກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ຈັດພິທີປິດໂຄງການສ້າງໂອກາດການມີວຽກເຮັດງານທຳໃຫ້ແຮງງານເຄື່ອນຍ້າຍກັບຄືນປະເທດ ແລະ ການເຊື່ອມເຂົ້າໃນການພັດທະນາເສດຖະກິດຂອງທ້ອງຖິ່ນ ເພື່ອຕອບໂຕ້ຜົນກະທົບຂອງພະຍາດໂຄວິດ-19ພາຍໃຕ້ ແຜນງານຮ່ວມມື ອົງການແຮງງານສາກົນ ແລະ ການສະຫນັບສະຫນູນທອນຈາກລັດຖະບານຍີ່ປຸ່ນ ພາຍໃຕ້ການເປັນປະທານຂອງ ທ່ານ ນາງ ອານຸສອນ ຄໍາສິງສະຫວັດ,ຫົວໜ້າກົມການຈັດຫາງານ ກະຊວງ ຮສສ; ທ່ານ ຈຸນຍາ ນາກາໂນະ(Junya NAKANO), ອັກຄະລັດຖະທູດປະເທດ ຍີ່ປຸ່ນ ປະຈໍາ ສປປ ລາວ; ທ່ານ ວຽງປະສິດ ທິບພະສຸດາ ຜູ້ປະສານງານ ຂອງອົງການແຮງງານສາກົນ ປະຈໍາ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ອານຸສອນ ຄໍາສິງສະຫວັດ ໄດ້ກ່າວວ່າ: ຈຸດປະສົງ ຂອງພິທີໃນຄັ້ງນີ້ ເພື່ອເປັນການສະຫຼຸບລາຍງານ ແລະ ປິດໂຄງການດັ່ງກ່າວ ຊຶ່ງຖືເປັນການຈັດຕັ້ງຜັນຂະຫຍາຍນະໂຍບາຍ, ທິດທາງ ແລະ ແຜນງານ ຂອງວຽກງານແຮງງານ ແລະ ສະຫວັດດີການສັງຄົມ ໄລຍະ 2021-2025 ແລະ ວາລະແຫ່ງຊາດ ເພື່ອພັດທະນາສີມືແຮງງານ ໃຫ້ແຮງງານໃນຂອບເຂດທົ່ວປະເທດ ເຂົ້າສູ່ຕໍາແໜ່ງງານໃໝ່ ແລະ ການປະກອບອາຊີບຈໍານວນ 15.000 ຄົນ, ທົດສອບມາດຕະຖານສີມືແຮງງານ ຕາມມາດຕະຖານສີມືແຮງງານແຫ່ງຊາດ ໃຫ້ໄດ້ 1.700 ຄົນ; ສົ່ງເສີມການຈັດຫາວຽກເຮັດງານທຳໃນຕະຫຼາດແຮງງານຕາມຂະແໜງການເສດຖະກິດໃນຕົວເມືອງ ແລະ ຊົນນະບົດ ຢູ່ພາຍໃນ ແລະ ຕ່າງປະເທດ ຈໍານວນ 392.197 ຄົນ ໃນນີ້ ຜູ້ຢູ່ນອກກໍາລັງແຮງງານ ທີ່ພ້ອມເຂົ້້າສູ່ການເຮັດວຽກ 355.620 ຄົນ, ກໍາລັງແຮງງານທີ່ຈະເພີ່ມຂຶ້ນໃໝ່ ແລະ ຜູ້ວ່າງງານ 36.577 ຄົນ.
ຊຶ່ງໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດມາແຕ່ ເດືອນເມສາ 2022 ຫາ ເດືອນ ພຶດສະພາ 2023 ເປັນໄລຍະເວລາ ທັງຫມົດ 14 ເດືອນ ໂດຍກຸ່ມເປົ້າໝາຍແຮງງານເຄື່ອນຍ້າຍ, ແຮງງານຫວ່າງງານທີ່ມີຄວາມສ່ຽງເປັນແຮງງານເຄື່ອຍຍ້າຍ, ຜູ້ທີ່ມີຄວາມຕ້ອງການຢາກເປັນຜູ້ປະກອບການ ແລະ ຈຸນລະວິສາຫະກິດ,ວິສາຫະກິດຂະໜາດນ້ອຍ ແລະ ກາງຢູ່ 3ແຂວງຄື: ແຂວງສະຫວັນນະເຂດ, ຈໍາປາສັກ ແລະ ນະຄອນຫຼວງວຽງຈັນ. ໂດຍຈຸດປະສົງຫລັກຂອງໂຄງການແມ່ນເພື່ອສະໜັບສະໜູນ ແລະ ໃຫ້ການຊ່ວຍເຫລືອແຮງງານເຄື່ອນຍ້າຍກັບຄືນປະເທດ, ຜູ້ທີ່ມີຄວາມຕ້ອງ ການຢາກເປັນຜູ້ປະກອບການ ແລະ ຟື້ນຟູຂະແໜງ MSME ໃຫ້ກັບຄືນມາມີສ່ວນຮ່ວມໃນການພັດທະນາເສດຖະກິດ, ສ້າງລາຍຮັບ ແລະ ເພີ່ມໂອກາດການຈ້າງງານທີ່ມີຄ່າຈ້າງ ໃຫ້ຍືນຍົງກວ່າເກົ່າ ຜ່ານການເສີມຂະຫຍາຍການຜະລິດ ແລະ ການບໍລິການທ້ອງຖິ່ນໃນຫຼາຍຂະແໜງເສດຖະກິດທີ່ສຳຄັນພ້ອມກັບສົ່ງເສີມມາດຕະການປ້ອງກັນ COVID-19. ເພື່ອໃຫ້ບັນລຸເປົ້າຫມາຍ ທາງໂຄງການໄດ້ໃຫ້ການຊ່ວຍເຫລືອທາງດ້ານອຸປະກອນ ແລະ ເຕັກນິກວິຊາການໃຫ້ແກ່ບັນດາຄູ່ຮ່ວມຈັດຕັ້ງປະຕິບັດ ໂດຍສະເພາະແມ່ນ ກົມການຈັດຫາງານ, ຈຸດບໍລິການຈັດຫາງານ 7 ຈຸດ ໃນ 3 ແຂວງເປົ້າຫມາຍ, ສະຖາບັນ ແລະ ສູນຝຶກທັກສະສີມືແຮງງານ ທັງ 6 ແຫ່ງ, ແລະ ສະຄົມສະມາຊິກສະພາການຄ້າ ເຊີ່ງພາຍໃນໄລຍະຈັດຕັ້ງປະຕິບັດ ມີແຮງງານທັງຫມົດ 328 ຄົນ ໄດ້ຮັບການຝຶກທັກສະ ແລະ ອອກໃບປະກາດຢັ້ງຢືນທັກສະ ແລະ ໃນຈຳນວນນີ້ 178 ຄົນ ແມ່ນມີໂອກາດໄດ້ເຂົ້າວຽກ.
ການຈັດຕັ້ງວຽກງານຈັດຫາງານ ແລະ ພັດທະນາສີມືແຮງງານໃນໄລຍະຜ່ານມາ ແມ່ນຍັງມີຄວາມຈໍາກັດທາງດ້ານງົບປະມານ , ການມີສ່ວນຮ່ວມຂອງບັນດາພາກລັດ ພາກເອກະຊົນທີ່ກ່ຽວຂ້ອງຕ່າງໆ ເພື່ອຊ່ວຍຂັບເຄື່ອນການພັດທະນາ ແລະ ແກ້ໄຂບັນຫາການມີວຽກເຮັດງານທໍາຂອງແຮງງານ. ຈາກສະພາບການຈັດຕັ້ງປະຕິບັດຕົວຈິງ ຄວາມຮຽກຕ້ອງການ ຂອງການຈັດຫາງານ ແລະ ພັດທະນາສີມືແຮງງານ ພາຍໃນ, ການເຊື່ອມໂຍງກັບພາກພື້ນ ແລະ ສາກົນ ຈື່ງມີຄວາມຈໍາເປັນຈະຕ້ອງໄດ້ ສຸມໃສ່ຈັດຕັ້ງປະຕິບັດວຽກງານຈັດຫາງານ ພັດທະນາສີມືແຮງງານເປັນອັນລະອຽດ, ຊັດເຈນ, ກ້ວາງຂວາງ ແລະ ເປັນລະບົບຂຶ້ນເພື່ອເຮັດໃຫ້ແຮງງານລາວ ໄດ້ຮັບການພັດທະນາ ສາມາດມີວຽກເຮັດງານທໍາທີ່ໝັ້ນຄົງ, ມີລາຍໄດ້ທີ່ເໝາະສົມ.
#ຂ່າວສານແຮງງານແລະສະຫວັດີການສັງຄົມ#ຮສສ
