ບໍລິສັດ ລ້ານຊ້າງ ມິເນໂຣນສ໌ ລິມິເຕັດ ບໍ່ຄຳ-ທອງ ເຊໂປນ ມອບອາກອນກຳໄລຂອງປີ 2022 ມູນຄ່າ 14 ລ້ານລ້ານກວ່າໂລາສະຫະລັດ ໃຫ້ແກ່ລັດຖະບານລາວ
ວັນທີ 2 ພຶດສະພາ 2023 ຜ່ານມານີ້ ບໍລິສັດ ຊືເຟິງ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ບໍ່ຄຳ-ທອງ ເຊໂປນ ໄດ້ມອບອາກອນກຳໄລຈຳນວນ US$14.682.267,86 ຈາກການຂາຍຜົນຜະລິດຄຳ ແລະ ທອງໃນສົກປີ 2022 ໃຫ້ແກ່ລັດຖະບານລາວ ຕາງໜ້າມອບໂດຍ ປະທານ ລຊມລ ທ່ານ ໂບ ກາວ ແລະ ຜູ້ອຳນວຍການໃຫຍ່ ລຊມລ ທ່ານ ສະໝານ ອະເນກາ ຕາງໜ້າຮັບໂດຍ ທ່ານ ບຸນປະເສີດ ສີກຸນລະບຸດ, ຫົວໜ້າກົມສ່ວຍສາອາກອນ ນອກຈາກ ອາກອນ ດັ່ງກ່າວນີ້ແລ້ວ ທາງບໍລິສັດ ກໍຍັງໄດ້ຈ່າຍຄ່າພາສີຊັບພະຍາກອນແຮ່ທາດ, ຄ່າສໍາປະທານ, ເງິນປັນຜົນ ແລະ ພັນທະທາງດ້ານການເງິນອື່ນໆທີ່ກ່ຽວຂ້ອງ ລວມຍອດທັງໝົດໃນສົກປີ 2022 ເປັນ US$50 ລ້ານ ໂດຍການເປັນສັກຂີພິຍານຂອງ ທ່ານ ວ່າງເຢຍ ໄຊນາລໍ, ພະແນກຄຸ້ມຄອງລາຍຮັບອາກອນ ແລະ ທ່ານນາງ ຈັນທະນາ ຫຼ່ຽມໄມຕຣີ, ພະແນກຈັດຕັ້ງ, ບໍລິຫານ ແລະ ການເງິນ ຈາກກົມສ່ວຍສາອາກອນ; ຮອງປະທານ ລຊມລ ທ່ານ ຊູ ຈິນປິງ; ແລະ ຄະນະຜູ້ບໍລິຫານອາວຸໂສຂອງ ລຊມລ.
ທ່ານ ບຸນປະເສີດ ສີກຸນລະບຸດ, ຫົວໜ້າກົມສ່ວຍສາອາກອນ ໄດ້ກ່າວວ່າ: “ລຊມລ ເປັນທີ່ຮັບຮູ້ໃນຖານະຜູ້ມອບອາກອນລາຍໃຫຍ່ອັນດັບຕົ້ນໆຢູ່ໃນ ສປປ ລາວ ເຊິ່ງໄດ້ມີພິທີມອບໃບຍ້ອງຍໍໃຫ້ແກ່ ບໍລິສັດ-ຜູ້ປະກອບການທີ່ມອບພັນທະອາກອນທີ່ມີຜົນງານດີເດັ່ນລວມໄປທັງ ລຊມລ ຈັດຂຶ້ນໃນວັນທີ 5 ເມສາ 2023 ຜ່ານມາ.”
ທ່ານ ໂບ ກາວ, ປະທານ ລຊມລ ໄດ້ກ່າວວ່າ: “ພວກເຮົາມີຄວາມພາກພູມໃຈຍິ່ງທີ່ໄດ້ປະກອບສ່ວນທາງດ້ານການເງິນຢ່າງເຂັ້ມແຂງໃຫ້ແກ່ລັດຖະບານໃນເວລາທີ່ຫຼາຍພາກສ່ວນໃນທົ່ວໂລກພົບພໍ້ກັບຄວາມຫຍຸ້ງຍາກທາງດ້ານການເງິນ.” ໃນປີ 2022 ເຊິ່ງ ສາມາດຜະລິດຄຳໄດ້ ກວ່າ 6,7 ໂຕນ ແລະ ທອງ 6.600 ໂຕນ. ໃນປີດຽວກັນນີ້, ລຊມລ ໄດ້ເປີດບໍ່ແຮ່ໃຕ້ດິນທີ່ທັນສະໄໝແຫ່ງທຳອິດ ຂອງ ສປປ ລາວ ຢູ່ບໍ່ຄຳ-ທອງ ເຊໂປນ ອັນໄດ້ເປັນແບບຢ່າງ ແລະ ບັນທັດຖານໃຫ້ແກ່ໂຄງການບໍ່ແຮ່ອື່ນໆ ກໍຄືການຂະຫຍາຍອາຍຸການບໍ່ແຮ່ຄຳ-ທອງ ເຊໂປນ ໄປເຖິງປີ 2033 ເປັນຢ່າງຕ່ຳ.
ນັບແຕ່ປີ 2016 ເປັນຕົ້ນມາ, ລຊມລ ໄດ້ເປັນບໍລິສັດບໍ່ແຮ່ໜຶ່ງດຽວຢູ່ໃນ ສປປ ລາວ ທີ່ໄດ້ຮັບກຽດຕິສັກໃນຂັ້ນ A+ ທີ່ເປັນລະດັບສູງສຸດຈາກ ກະຊວງພະລັງງານ ແລະ ບໍ່ແຮ່ ໂດຍການເປັນແບບຢ່າງທີ່ນຳໜ້າໃຫ້ແກ່ໂຄງການອື່ນໆ.
ຕັ້ງແຕ່ດຳເນີນການຂຸດຄົ້ນ-ຜະລິດຄຳ-ທອງໃນປີ 2003, ລຊມລ ໄດ້ປະກອບສ່ວນລາຍຮັບໂດຍກົງຫຼາຍກວ່າ US$1,7 ຕື້ ໃຫ້ແກ່ ສປປ ລາວ ໂດຍຜ່ານການຈ່າຍພາສີ-ອາກອນ, ຄ່າພາສີຊັບພະຍາກອນແຮ່ທາດ ແລະ ເງິນປັນຜົນ. ນອກຈາກນັ້ນ ຍັງໄດ້ສ້າງຜົນປະໂຫຍດທາງອ້ອມຫຼາຍຮ້ອຍລ້ານໂດລາ ດ້ວຍການສ້າງວຽກເຮັດງານທຳ, ຜ່ານການຝຶກອົບຮົມຕ່າງໆ, ການພັດທະນາຊຸມຊົນ, ແລະ ການຈ່າຍເງິນໃຫ້ແກ່ ຄູ່ຮ່ວມທຸລະກິດ ແລະ ຜູ້ສະໜອງທ້ອງຖິ່ນ. ລຊມລ ໄດ້ລົງທຶນປະມານ US$50 ລ້ານ ໃສ່ການພັດທະນາໂຄງລ່າງພື້ນຖານແຫ່ງຊາດ ແລະ ທ້ອງຖິ່ນ, US$56 ລ້ານໃສ່ການເກັບກູ້ລະເບີດບໍ່ທັນແຕກ ແລະ ຫຼາຍລ້ານໂດລາ ເຂົ້າໃນການອະນຸລັກ ມໍຣະດົກທາງດ້ານວັດທະນະທຳ ແລະ ແຜນງານອື່ນໆ.
ປະຊາຊົນເມືອງວິລະບູລີ ແຂວງສະຫວັນນະເຂດ ຫຼາຍກວ່າ 40.000 ຄົນ ໄດ້ຮັບຜົນປະໂຫຍດຈາກໂຄງການ ພັດທະນາຊຸມຊົນ ທີ່ສະໜັບສະໜູນທຶນໂດຍໂຄງການຄຳ-ທອງ ເຊໂປນ ລວມມູນຄ່າ US$20 ລ້ານ. ມາຮອດປັດຈຸບັນ, ລາຍໄດ້ຂອງຊຸມຊົນທ້ອງຖິ່ນຜ່ານກຸ່ມທຸລະກິດທ້ອງຖິ່ນ ແມ່ນໄດ້ທະວີຄູນຂຶ້ນເປັນ US$50 ລ້ານ ຕະຫຼອດອາຍຸການບໍ່ແຮ່ຄຳ–ທອງ ເຊໂປນ.
ລຊມລ ຈະສືບຕໍ່ປະກອບສ່ວນຢ່າງເຂັ້ມແຂງຕັ້ງໜ້າ ໃນຖານະຄູ່ຮ່ວມພັດທະນາ ຢູ່ໃນ ສປປ
