ລັດຖະບານ ຈະປຶກສາຫາລື ຄົົ້ນຄວ້າ ແລະ ພິຈາລະນາ 6 ຫົວຂໍ້ ທີ່ສໍາຄັນ ແລະ ຈຳເປັນເຄັ່ງຮ້ອນ
February 6, 2023 - 4:04 PM
ວັນທີ 6 ກຸມພາ 2023 ລັດຖະບານ ໄຂກອງປະຊຸມລັດຖະບານສະໄໝສາມັນ ປະຈຳເດືອນມັງກອນ 2023 ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ, ນາຍົກລັດຖະມົນຕີແຫ່ງ ສປປ ລາວ.
ກອງປະຊຸມຄັ້ງນີ້້ ລັດຖະບານ ຈະໄດ້ພ້ອມກັນປຶກສາຫາລື, ຄົົ້ນຄວ້າ ແລະ ພິຈາລະນາ 6 ຫົວຂໍ້ ທີ່ສໍາຄັນ ແລະ ຈຳເປັນເຄັ່ງຮ້ອນ ໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ -ສັງຄົມ ຕິດພັນກັບບັນດາວຽກຈຸດສຸມຂອງສອງວາລະແຫ່ງຊາດ ທີ່ສະພາແຫ່ງຊາດ ໄດ້ຮັບຮອງ ກໍຄື ການແກ້ໄຂບັນຫາລວມຂອງຊາດ ດັ່ງນີ້:
- ສະຫຼຸບການຈັດຕັ້ງປະຕິບັດວຽກງານປະຈຳເດືອນມັງກອນ ແລະ ທິດທາງແຜນການເດືອນກຸມພາ 2023 ຂອງລັດຖະບານ.
- ລາຍງານກ່ຽວກັບຮ່າງດຳລັດ ວ່າດ້ວຍກອງທຶນອາຊີວະສຶກສາ.
- ສະເໜີຮ່າງມະຕິ ວ່າດ້ວຍການພັດທະນາຊັບພະຍາກອນມະນຸດ ທີ່ມີຄຸນນະພາບ ຕອບສະໜອງໃຫ້ແກ່ການພັດທະນາ ໃນເງື່ອນໄຂໃໝ່.
- ລາຍງານ ກ່ຽວກັບຮ່າງດຳລັດວ່າດ້ວຍການປັບໄໝ ແລະ ນຳໃຊ້ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບມາດຕະຖານ.
- ລາຍງານ ກ່ຽວກັບຮ່າງດຳລັດວ່າດ້ວຍການປັບໄໝ ແລະ ນຳໃຊ້ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບ ມາດຕະຖານວັດແທກ.
- ລາຍງານ ກ່ຽວກັບຮ່າງດຳລັດວ່າດ້ວຍ ເຂດປອດພາສີ ແລະ ຮ້ານຄ້າປອດພາສີ.
ທ່ານ ນາຍົກລັດຖະມົນຕີ ໄດ້ຮຽກຮ້ອງບັນດາທ່ານ ຮອງນາຍົກລັດຖະມົນຕີ ແລະ ບັນດາ ສະມາຊິກລັດຖະບານ ຈົ່ງໄດ້ພ້ອມກັນເອົາໃຈ ໃສ່ຄົ້ນຄວ້າ ແລະ ປະກອບຄໍາເຫັນຢ່າງເລິກເຊິ່ງ ດ້ວຍການສະເໜີທັດ ສະນະຢ່າງກົງໄປກົງມາ, ກະທັດຮັດ, ມີຈຸດສຸມ ແລະ ມີທາງອອກທີ່ຈະແຈ້ງ ເພື່ອໃຫ້ກອງປະຊຸມຄັ້ງນີ້ ມີປະສິດທິຜົນສູງ ແລະ ປະສົບຜົນສຳເລັດຕາມຈຸດປະສົງ ບັນລຸຕາມ ແລະ ຄາດໝາຍທີ່ໄດ້ກໍານົດໄວ້.
