ມຽນມາໂທດກຸ່ມກໍ່ຄວາມບໍ່ສະຫງົບ ຈູດເຮືອນຊາວໂຣຮິງຢາກວ່າ 2.600 ຫລັງ

ທາງ​ການ​ມຽນມາ​ກ່າວ​ໂທດ​ກຸ່ມ​ກໍ່​ຄວາມ​ບໍ່​ສະຫງົບ​ໂຣຮິງ​ຢາ​ວ່າ: ຈູດ​ເຮືອນ​ຊາວ​ໂຣຮິງ​ຢາ 2.625 ຫລັງ​ຢູ່​ລັດ​ຍະ​ໄຂ່​ໃນ​ອາທິດ​ກ່ອນ.

ໜັງສືພິມ​ໂກລບອນ​ນິວ​ໄລ​ອອບມຽນມາລາ​ຍງານ​ວ່າ: ການ​ຈູດ​ເຮືອນ​ຊາວ​ໂຣຮິງ​ຢາ​ເປັນ​ຝີ​ມື​ຂອງ​ກອງທັບ​ປົດ​​ແອກ​ໂຣຮິງ​ຢາ​ອາຣະກັນ​ທີ່​ອ້າງ​ຕົວ​ວ່າ​ບຸກດ່ານ​ເຈົ້າໜ້າ​ທີ່​ຫລາຍ​ແຫ່ງ​ພ້ອມ​ກັນ​ໃນ​ອາທິດ​ກ່ອນ ​ເຮັດ​ໃຫ້​ເກີດ​ການ​ປະ​ທະ​ຄັ້ງ​ໃຫຍ່ ມີ​ຜູ້​ເສຍ​ຊີວິດ​ແລ້ວ​ເກືອບ 400 ຄົນ. ຂະນະ​ທີ່​ກຸ່ມ​ຮິ​ວ​ແມນ​ໄຮ​ວອດ​ວິ​ເຄາະ​ພາບ​ຖ່າຍ​ດາວ​ທຽມ ​ແລະ ຄຳ​ບອກ​ເລົ່າ​ຂອງ​ຊາວ​ໂຣຮິງ​ຢາທີ່​ໜີ​ຂ້າມ​ຊາຍ​ແດນ​ເຂົ້າ​ໄປ​ບັງ​ກະລາ​ເທດ​ວ່າ: ກອງ​ກຳລັງ​ມຽນມາ​ເປັນ​ຜູ້​ຈູດ. ພາບ​ບ້ານ​ເຮືອນ​ເສຍ​ຫາຍ​ ​ເຮັດ​ໃຫ້​ເກີດ​ຄວາມ​ກັງວົນ​ວ່າ: ລະດັບ​ການ​ທຳລາຍ​ຢູ່​ລັດ​ຍະ​ໄຂ່​ອາດ​ຮ້າຍ​ແຮງ​ກວ່າ​ການ​ຄາດ​ເດົາ​ໄວ້.

ສ່ວນ​ສຳນັກງານ​ຂ້າ​ຫລວງ​ໃຫຍ່​ຜູ້​ລີ້​ໄພ​ແຫ່ງ​ສະຫະ​ປະຊາ​ຊາດ (UNSCR) ​ເປີດ​ເຜີຍ​ວ່າ: ມີ​ຊາວ​ໂຣຮິງ​ຢາ​ໜີ​ເຂົ້າ​ໄປ​ບັງ​ກະລາ​ເທດ​ແລ້ວ 58.600 ຄົນ, ຄ້າຍ​ຜູ້​ລີ້​ໄພ​ປັດຈຸບັນ​ເກືອບ​ເຕັມ​ແລ້ວ ຈຳ​ນວນ​ຜູ້​ລີ້​ໄພ​ເພີ່ມ​ຂຶ້ນ​ໄວ​ຫລາຍ ຄາດ​ວ່າ​ຈະ​ເດີນທາງ​ມາ​ເພີ່ມ​ອີກ.