ກຽມພັດທະນາປຶ້ມຜ່ານແດນແບບທຳມະດາ ເປັນແບບເອເລັກໂຕຣນິກ ດ້ວຍມູນຄ່າການລົງທຶນ 18.666.000 ໂດລາ ໄລຍະການຮ່ວມທຸລະກິດ 40 ປີ

ວັນທີ 29 ພະຈິກ 2022 ນີ້, ໄດ້ມີພິທິເຊັນບົດບັກທຶກຄວາມເຂົ້າໃຈ (MOU) ລະຫວ່າງກະຊວງປ້ອງກັນຄວາມສະຫງົບ ຕ່າງໜ້າໂດຍກົມໃຫຍ່ພາລາທິການ ກັບໂຮງພິມ ໂຊກພາໄຊ ຈຳກັດ ໃນໂຄງການພັດທະນາປຶ້ມຜ່ານແດນທຳມະດາ ໃຫ້ເປັນປຶ້ມຜ່ານແດນແບບອີເລັກໂຕຣນິກຝັງຊິບ (E-Border pass) ດ້ວຍມູນຄ່າການລົງທຶນ 18.666.000 ໂດລາສະຫາລັດ, ລົງນາມລະຫວ່າງ ພົຈວ ໜູຈອນ ກ້ອນທອງດຳ ຮອງຫົວໜ້າກົມໃຫຍ່ພາລະທິການ ແລະ ທ່ານ ນາງ ສຸນັດຕາ ລິດປັນຍາ ອຳນວຍການໂຮງພິມໂຊກພາໄຊ ຈຳກັດ, ໂດຍເຂົ້າຮ່ວມເປັນສັກຂີພິຍານໂດຍ ພົທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ມີບັນດາຄະນະພັກ-ຄະນະບັນຊາອ້ອມຂ້າງກະຊວງ, ກົມໃຫຍ່ພະລາທິການ ແລະ ບໍລິສັດເຂົ້າຮ່ວມ.

ການລົງທຶນເພື່ອພັດທະນາໂຄງການດັ່ງກ່າວ, ໂດຍມີຄວາມປະສົງຮ່ວມກັບກະຊວງປ້ອງກັນຄວາມສະຫງົບ ໃນການພັດທະນາປຶ້ມຜ່ານແດນແບບທຳມະດາ ໃຫ້ເປັນປຶ້ມຜ່ານແດນແບບອີເລັກໂຕຣນິກຝັງຊິບ (E-Border pass) ທີ່ກວດອ່ານດ້ວຍເຄື່ອງມືທັນສະໄໜ. ພາຍຫລັງໄດ້ຮັບຜິດຊີ້ນຳກົມວິຊາສະເພາະ ໄດ້ຈັດຕັ້ງປະຕິບັດຕາມພາລະບົດບາດຕາມທິດຊີ້ນໍາຂອງຂັ້ນເທິງບົນພື້ນຖານ ລະບຽບກົດໝາຍທີ່ກ່ຽວຂ້ອງ ໄດ້ຄົ້ນຄວ້າປຶກສາຫາລືຮ່ວມກັບ ບໍລິສັດ ເພື່ອເອກະພາບເນື້ອໃນຂອງແຕ່ລະຝ່າຍທີ່ມີຄວາມສົນໃຈຮ່ວມກັນ, ໄດ້ສັງລວມເອົາເຂົ້າຄົ້ນຄວ້າໃນກອງປະຊຸມຄະນະ ຄລທ ປກສ ຄັ້ງວັນທີ 6 ກັນຍາ 2012, ຜົນກອງປະຊຸມແມ່ນ ເຫັນດີໃຫ້ໂຮງພິມປັບປຸງເຈດຈຳນົງ ລະອຽດຄືນໃໝ່ ແລ້ວໃຫ້ກົມໃຫຍ່ພະລາທິການເປັນໃຈກາງປະສານງານ.

ຮອດວັນທີ 3 ພະຈິກ 2022, ໄດ້ມີຄຳເຫັນຂອງທ່ານຮອງລັດຖະມົນຕີ ໃສ່ໜັງສືລາຍງານໂຮງພິມໂຊກພາໄຊ ສະບັບເລກທີ 067/ຊຊ, ລົງວັນທີ 17 ຕຸລາ 2022 ມີຄຳເຫັນໃຫ້ ກົມໃຫຍ່ພະລາທິການ ຄົ້ນຄວ້າສຶກສາຄວາມເປັນໄປໄດ້ຮ່ວມກັບອຳນວຍການໂຮງພິມ ເພື່ອນຳມາລາຍງານຄະນະນໍາກະຊວງພິຈາລະນາ, ສ່ວນຮູບແບບການລົງທຶນແມ່ນກົມໃຫຍ່ສັນຕິບານ ເປັນເຈົ້າຂອງໂຄງການໂຮງພິມໂຊກພາໄຊ ເປັນຜູ້ລົງທຶນ 100% ມູນຄ່າການລົງທຶນ 18.666.000 ໂດລາສະຫະລັດ, ການແບ່ງປັນຜົນປະໂຫຍດກະຊວງປ້ອງກັນຄວາມສະຫງົບ 30%; ໂຮງພິມ 70%, ໄລຍະການຮ່ວມທຸລະກິດ 40 ປີ.

ຮອດວັນທີ 28 ພະຈິກ 2022 ຈຶ່ງໄດ້ຮັບການອະນຸມັດຂໍ້ຕົກລົງຈາກທ່ານ ລັດຖະມົນຕີກະຊວງປ້ອງກັນຄວາມສະຫງົບ ສະບັບເລກທີ 2107/ປກສ ວ່າດ້ວຍການເຫັນດີ ໃຫ້ກົມໃຫຍ່ພະລາທິການເຊັນບົດບັນທຶກຄວາມເຂົ້າໃຈ MOU ຮ່ວມກັບໂຮງພິມໂຊກພາໄຊ ຈຳກັດ ຢ່າງເປັນທາງການ.

ພາບ-ຂ່າວ: ບຸນພະຈັນ