ນັກທຸລະກິດອິນເດຍ ເຂົ້າມາລົງທຶນຢູ່ລາວ ຈໍານວນ 276 ຫົວໜ່ວຍມີມູນຄ່າທຶນຈົດທະບຽນທັງໝົດແມ່ນ 6.628 ຕື້ກີບກວ່າກີບ
ວັນທີ 9 ສິງຫາ 2022 ຜ່ານມານີ້ ທ່ານ ດີງກາ ອັດຕະນາ (Dinkar Asthana) ເອກອັກຄະລັດຖະທູດ ແຫ່ງ ອິນເດຍ ປະຈຳ ສປປ ລາວ ໄດ້ເຂົ້າພົບປະ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ (ອຄ) ທັງສອງໄດ້ແລກປ່ຽນ ແລະ ປຶກສາຫາລືບັນດາວຽກທີ່ຕິດພັນລະຫວ່າງການຄ້າຂອງ ສປປ ລາວ ແລະ ອິນເດຍ.
ໄລຍະຜ່ານມາ ນັກທຸລະກິດຂອງ ປະເທດອິນເດຍ ກໍໄດ້ມີຄວາມສົນໃຈ ແລະ ເຂົ້າມາລົງທຶນຢູ່ ສປປ ລາວ ຫຼາຍພໍສົມຄວນ ຊຶ່ງສະແດງອອກ ໃນປີ 2008-2022 ມີນັກທຸລະກິດອິນເດຍ ເຂົ້າມາລົງທຶນ ຈໍານວນ 276 ຫົວໜ່ວຍວິສາຫະກິດ ມູນຄ່າທຶນຈົດທະບຽນທັງໝົດແມ່ນ 6.628.638.109.669 ກີບ.
ຂະແໜງການຕົ້ນຕໍທີ່ລົງທຶນໄດ້ແກ່: ກະສິກຳ, ປ່າໄມ້ ແລະ ການປະມົງ; ການຄ້າຂາຍຍົກ ແລະ ຂາຍຍ່ອຍ, ສ້ອມແປງລົດຍົນ ແລະ ລົດຈັກ; ອຸດສາຫະກຳປຸງແຕ່ງ; ການເຄື່ອນໄຫວດ້ານສາຍວິຊາຊີບ, ວິທະຍາສາດ ແລະ ເຕັກນິກ; ການເຄື່ອນໄຫວໃຫ້ທີ່ພັກເຊົາ ແລະ ບໍລິການອາຫານ; ການສຶກສາ; ການເຄື່ອນໄຫວດ້ານອະສັງຫາລິມະຊັບ ແລະ ອື່ນໆ.
ສິນຄ້າຫຼັກທີ່ ສປປ ລາວ ສົ່ງອອກໄດ້ແກ່: ໂລຫະຄຳປະສົມເງິນ, ກົ່ວ, ຜະລິດຕະພັນໄມ້, ກາເຟ (ຍັງບໍ່ທັນປຸງແຕ່ງ), ຂີ້ຊີ, ເກືອໂບຣມ, ເຄື່ອງນຸ່ງຫົ່ມ ແລະ ອື່ນໆ; ສິນຄ້າຫຼັກທີ່ ສປປ ລາວ ນຳເຂົ້າໄດ້ແກ່ ຜະລິດຕະພັນການຢາ (ເພສັດຊະກຳ), ພາຫະນະທາງບົກ (ນອກຈາກລົດໄຖນາ ແລະ ລົດຈັກ), ເຄື່ອງໄຟຟ້າ ແລະ ອຸປະກອນໄຟຟ້າ, ອຸປະກອນລົດຈັກ (ນອກຈາກເຄືື່ອງກົນຈັກພາຫະນະ), ຝ້າຍ ແລະ ຜະລິດຕະພັນຈາກຝ້າຍ, ເຄື່ອງນຸ່ງຫົ່ມ ແລະ ອື່ນໆ.
ເພື່ອເຮັດໃຫ້ການພົວພັນໃນຂະແໜງອຸດສາຫະກຳ ແລະ ການຄ້າ ລະຫວ່າງ ສປປ ລາວ ແລະ ອິນເດຍ ນັບມື້ນັບຂະຫຍາຍຕົວ ແລະ ເຂົ້າສູ່ລວງເລິກ ຈຶ່ງມີຂໍ້ສະເໜີ ຄື: ໃຫ້ມີການແລກປ່ຽນຂໍ້ມູນ ລະຫວ່າງ ນັກທຸລະກິດລາວ-ອິນເດຍ ຢ່າງເປັນປະຈຳຜ່ານສະຖານທູດ ຫຼື ກອງປະຊຸມພົບປະຂອງສອງປະເທດ ເພື່ອດຶງດູດນັກລົງທຶນ ຂອງສອງປະເທດໃຫ້ນັບມື້ນັບຫຼາຍຂຶ້ນ ແລະ ເພື່ອຊອກຫາຊ່ອງທາງໃນການສົ່ງອອກສິນຄ້າຂອງລາວໄປຍັງຕະຫຼາດອິນເດຍ; ໃຫ້ມີການແລກປ່ຽນບົດຮຽນ ເພື່ອສຶກສາຄວາມເປັນໄປໄດ້ໃນການຮ່ວມມືພັດທະນາອຸດສາຫະກຳປຸງແຕ່ງສິນຄ້າກະສິກຳ, ອຸດສາຫະກຳ, ICT ແລະ ອຶ່ນໆ ສ້າງແຜນການສົ່ງເສີມການຕະຫຼາດ ເປັນຕົ້ນການອຳນວຍຄວາມສະດວກໃຫ້ແກ່ພາກລັດ ແລະ ພາກທຸລະກິດໄດ້ເຂົ້າຮ່ວມງານວາງສະແດງສິນຄ້າໃນງານສຳຄັນຕ່າງໆຢູ່ອິນເດຍ; ເພື່ອເປັນການສົ່ງເສີມການພົວພັນການຄ້າ ແລະ ການລົງທຶນ ລະຫວ່າງ ສອງປະເທດ ແມ່ນເຫັນດີໃຫ້ມີການຈັດກອງປະຊຸມພົບປະແລກປ່ຽນ ລະຫວ່າງ ພາກລັດ ແລະ ພາກເອກະຊົນຂອງສອງປະເທດ; ສະເໜີພິຈາລະນາການສ້າງແຜນການສົ່ງເສີມການຕະຫຼາດ ເປັນຕົ້ນການອຳນວຍຄວາມສະດວກໃຫ້ແກ່ພາກລັດ ແລະ ພາກທຸລະກິດໄດ້ເຂົ້າຮ່ວມງານວາງສະແດງສິນຄ້າໃນງານສຳຄັນຕ່າງໆຢູ່ອິນເດຍ ເຊັ່ນ: ກົນຈັກ, ພັດທະນາ ປຸງແຕ່ງ ສິນຄ້າກະສິກຳ, ການແປຮູບສິນຄ້າ, ນະວັດຕະກຳໃໝ່ ແລະ ອື່ນໆ.
