ລີດສ໌ ກຽມລົງໂທດຫ້າມແຟນບານຕະຫຼອດຊີວິດ! ຫຼັງກໍ່ເຫດດຶກສິ່ງຂອງໃສ່ນັກເຕະ ແມນຢູ
ຄວາມເຄື່ອນໄຫວຫຼັງເກມພຣີເມຍລີກ ອັງກິດ ໃນນັດ “ສົງຄາມດອກກຸຫຼາບ” ທີ່ສະໜາມ ເອລແລນ ໂຣດ ເຊິ່ງເປັນການພົບກັນລະຫວ່າງ “ຍຸງທອງ” ລີດ ຢູໄນເຕັດ ແລະ “ຜີສາດແດງ” ແມນເຊັສເຕີ ຢູໄນເຕັດ ກ່ອນທີ່ຜົນຈະຈົບລົງດ້ວຍໄຊຊະນະຂອງທີມຢາມ ທີ່ບຸກເອົາຊະນະມັນໄປໄດ້ຢ່າງສຸດເດືອດ 4-2
ເຊິ່ງອີກຈຸດເດັ່ນທີ່ສຳຄັນໃນເກມນີ້ ແມ່ນການທີ່ແຟນບານຂອງ ລີດສ໌ ບາງສ່ວນ ໄດ້ຖິ້ມສິ່ງຂອງລົງສະໜາມຈົນເຮັດໃຫ້ ແອນໂທນີ່ ອີ່ແຣັງກ້າ ປີກດາວຮຸ່ງຂອງທີມ ແມນເຊັສເຕີ ຢູໄນເຕັດ ບາດເຈັບທີ່ຫົວເຮັດໃຫ້ ຣາຟ ຣັງນິກ ຄູຝຶກຂອງ ຜີສາດແດງ ສະແດງຄວາມບໍ່ພໍໃຈຫຼາຍ
ຈົນລ່າສຸດ ໂຄສົກຂອງ ລີດສ໌ ຢູຳນເຕັດ ໄດ້ອອກຖະແຫຼງການຢືນຢັນວ່າ ຈະມີການສັ່ງຫ້າມແຟນບານຕະຫຼອດຊີວິດທັນທີ ຫາກສາມາດລະບຸຜູ້ທີ່ກະທໍາຜິດຢູ່ໃນສະໜາມໄດ້ ໂດຍຂະນະນີ້ໄດ້ມີການຮ່ວມມືຢ່າງເຕັມທີ່ກັບຕຳຫຼວດເພື່ອຂະຫຍາຍຜົນຫາຜູ້ກະທຳຜິດມາລົງໂທດໃຫ້ໄດ້
ນອກຈາກນີ້ຍັງໄດ້ລາຍງານວ່າເກມດັ່ງກ່າວ ມີການນຳກຳລັງເຈົ້າໜ້າທີ່ຕຳຫຼວດມາສະໜາມຫຼາຍເຖິງ 900 ຄົນ ເພື່ອຄຸ້ມກັນການປະທະກັນກ່ອນການແຂ່ງຂັນຂອງແຟນບານ ເຊິ່ງຖືວ່າເປັນສະຖິຕິສູງສຸດໃນປະຫວັດສາດຂອງບານເຕະອັງກິດອີກເຊັ່ນດຽວກັນ.
