ອາຣັບບີ ຊາອຸດິດ ລະງັບນຳເຂົ້າຊີ້ນ ແລະ ສັດປີກຈາກບຣາຊິນກັງວົນອາຫານປົນເປື້ອນ

    ອາຣັບບີ ຊາອຸດິດ ລະງັບການນຳເຂົ້າຊີ້ນສັດ ແລະ ສັດປີກຈາກບໍລິສັດບຣາຊິນ 4 ແຫ່ງ ຈາກຄວາມກັງວົນກ່ຽວກັບຄວາມປອດໄພດ້ານອາຫານ, ພາຍຫລັງມີຂໍ້ກ່າວຫາວ່າມີການຕິດສິນບົນເຈົ້າໜ້າທີ່ໃຫ້ອະນຸຍາດຈຳໜ່າຍຊີ້ນເໜົ່າ ແລະ ຊີ້ນປົນເປື້ອນພະຍາດ.

ຕຳຫລວດບຣາຊິນຕັ້ງຂໍ້ກ່າວຫາຜູ້ກ່ຽວຂ້ອງກວ່າ 100 ຄົນ ສ່ວນຫລາຍເປັນເຈົ້າໜ້າທີ່ກວດສອບດ້ານສາທາລະນະສຸກວ່າຮັບສິນບົນ ໂດຍອະນຸຍາດໃຫ້ຈຳໜ່າຍຜະລິດຕະພັນເໜົ່າ, ປອມແປງເອກະສານສົ່ງອອກ ແລະ ບໍ່ໄດ້ກວດສອບໂຮງງານບັນຈຸຈາກການຕິດຕາມສອບສວນເປັນເວລາ 2 ປີໃນອຸດສາຫະກຳບັນຈຸອາຫານແຊ່ແຂງ ຂອງບຣາຊິນ. ສຳນັກຂ່າວສະປາຂອງທາງການລາຍງານອ້າງຖະແຫລງການສຳນັກງານອາຫານ ແລະ ຢາຂອງອາຣັບບີ ຊາອຸດິດວ່າ: ມາດຕະການຫ້າມນຳເຂົ້າຊີ້ນສັດຈາກບຣາຊິນ ເຊິ່ງເປັນຜູ້ສົ່ງອອກຊີ້ນສັດປີກລາຍໃຫຍ່ທີ່ສຸດໃນໂລກມີຂຶ້ນເປັນການຊົ່ວຄາວ ເພື່ອຄວາມປອດໄພຂອງປະຊາຊົນ.