Emirates ກຽມຈັບມື Pfizer ແລະ ຜູ້ຜະລິດຢາຊັ້ນນຳ ຈັດສົ່ງວັກຊີນໂຄວິດ-19 ກະຈາຍທົ່ວໂລກ
ສາຍການບິນ Emirates ຂອງສະຫະລັດ ອາຣັບ ເອມິເຣດ ເປີດເຜີຍວ່າ: ກຳລັງວາງແຜນເຮັດວຽກຮ່ວມກັບ Pfizer ແລະ ບໍລິສັດຜູ້ຜະລິດຢາຊັ້ນນຳທົ່ວໂລກ ໃນການຈັດລະບົບໂລຈິສຕິກ ເພື່ອອຳນວຍຄວາມສະດວກໃນການຂົນສົ່ງວັກຊີນຕ້ານໂຄວິດ-19 ໄປທົ່ວໂລກ.
ທ່ານ ທິມ ຄລາກ ປະທານສາຍການບິນ Emirates ເປີດເຜີຍລະຫວ່າງໃຫ້ສຳພາດພິເສດຕໍ່ທາງສະຖານີໂທລະພາບ CNBC ວ່າ: ບໍລິສັດກຳລັງຢູ່ໃນຂັ້ນຕອນການຈັດວາງລະບົບໂລຈິສຕິກທີ່ດີທີ່ສຸດ ເພື່ອໃຫ້ແນ່ໃຈວ່າຈະສາມາດຈັດສົ່ງວັກຊີນໄປພື້ນທີ່ຈຳເປັນທຸກແຫ່ງທົ່ວໂລກ.
ຄຳເຫັນຂອງປະທານສາຍການບິນ Emirates ມີຂຶ້ນພຽງບໍ່ດົນ ຫລັງຈາກ Pfizer ເປີດເຜີຍຜົນສຳເລັດຂອງການທົດລອງວັກຊີນໂຄວິດ-19 ເຮັດໃຫ້ Emirates ແລະ ສາຍການບິນອື່ນໆທົ່ວໂລກຕ່າງຮ່ວມຫາລືກັບ Pfizer ເພື່ອຫາທາງຈັດສົ່ງ ແລະ ກະຈາຍວັກຊີນໃຫ້ຄວບຄຸມຫລາຍທີ່ສຸດ.
ລາຍງານລະບຸວ່າ: ການຈັດສົ່ງ ແລະ ກະຈາຍວັກຊີນນີ້ມີເງື່ອນໄຂ ແລະ ຂໍ້ຄວນລະວັງຫລາຍປະການ ໂດຍສະເພາະໃນລະຫວ່າງການຂົນສົ່ງທີ່ຕ້ອງຈັດເກັບວັກຊີນໄວ້ຢູ່ໃນອຸນຫະພູມ -70 ອົງສາ ເພື່ອຮັກສາຄຸນສົມບັດຕ້ານໄວຣັສ.
ທັງນີ້ Pfizer ໄດ້ອອກມາຄາດຄະເນວ່າ: ຖ້າເປັນໄປຕາມແຜນ ບໍລິສັດຈະສາມາດຜະລິດວັກຊີນຕ້ານໂຄວິດ-19 ໄດ້ເຖິງ 50 ລ້ານໂດສ ພາຍໃນປີ 2020 ແລະ ສູງເຖິງ 1.300 ລ້ານໂດສ ໃນປີ 2021.
ນອກຈາກ Pfizer ແລ້ວ, ບັນດາຜູ້ຜະລິດຢາຊັ້ນນຳຫລາຍແຫ່ງທົ່ວໂລກຕ່າງເລັ່ງມືພັດທະນາຄົ້ນຄວ້າວັກຊີນຕ້ານໂຄວິດ-19 ຢ່າງເຕັມທີ່ ໂດຍມີບໍລິສັດຢາທີ່ໜ້າຈັບຕາຄື: Moderna, AstraZenecca ແລະ Johnson & Johnson ທີ່ມີລາຍງານວ່າ: ທັງໝົດກຳລັງຢູ່ລະຫວ່າງການທົດລອງວັກຊີນທາງຄລີນິກ ເຊິ່ງ Emirates ຄາດຫວັງວ່າ: ວັກຊີນທີ່ຜະລິດອອກມານີ້ຈະສາມາດຈັດເກັບໃນອຸນຫະພູມທີ່ຕິດລົບໜ້ອຍກວ່າວັກຊີນຂອງ Pfizer ທີ່ຈະຊ່ວຍເພີ່ມໂອກາດໃນການຂົນສົ່ງໃຫ້ຮອດມືຜູ້ບໍລິໂພກໄດ້ໄວທີ່ສຸດ.
