ແຈ້ງເຕືອນໄພ ພາຍຸໝູນເຂດຮ້ອນ ວາມກໍ (STS VAMCO)ແຕ່ໄລຍະວັນທີ 14 ຫາ 17 ພະຈິກ 2020
ພາຍຸຫມຸນເຂດຮ້ອນ ວາມກໍ (STS VAMCO) ຫົວທີ 22 ປະຈໍາປີ 2020 ໃນເຂດດ້ານຕາເວັນຕົກຂອງມະຫາສະໝຸດປາຊີຟິກຕອນເໜືອ, ຊຶ່ງໃນເວລາ 07 ໂມງ 30 ນາທີ ຂອງວັນທີ 12 ພະຈິກ 2020 ມີຈຸດສູນ ກາງຢູ່ເສັ້ນຂະຫນານທີ່ 15.2 ອົງສາເໜືອ ແລະ ເສັ້ນ ແວງທີ່ 119.7 ອົງສາຕາເວັນອອກ ພວມເຄື່ອນທີ່ມາ ທາງທິດຕາເວັນຕົກ ດ້ວຍຄວາມໄວ 30 ກິໂລແມັດຕໍ່ ຊົ່ວໂມງ ແລະ ຄວາມໄວສູງສຸດຢູ່ໃກ້ຈຸດສູນກາງຂອງ ພະຍຸແມ່ນ 108 ກິໂລແມັດຕໍ່ຊົ່ວໂມງ.
ຄາດຄະເນວ່າ ພາຍຸຫົວນີ້ ຈະເຄື່ອນຂຶ້ນຝັ່ງທາງພາກກາງຂອງ ສສ ຫວຽດນາມ ໃນຕອນກາງຄືນຂອງວັນທີ 14 ພະຈິກ 2020 ແລະ ຈະສືບຕໍ່ເຄື່ອນທີ່ຜ່ານພາກກາງ ຫາ ພາກເໜືອດ້ານຕາເວັນອອກຂອງ ສປປ ລາວ ໃນໄລຍະວັນທີ 15 ຫາ 16 ພະຈິກ 2020 ຊຶ່ງຈະເຮັດໃຫ້ມີຝົນຕົກໃນລະດັບ ປານກາງ ຫາ ຕົກຫນັກ ພ້ອມມີລົມພັດແຮງຢູ່ບັນດາແຂວງ ພາກກາງ ແລະ ພາກເໜືອດ້ານຕາເວັນອອກ ໃນໄລຍະວັນທີ 14 ຫາ 17 ພະຈິກ 2020.
ແຈ້ງເຕືອນເຖິງປະຊາຊົນ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໄສຢູ່ບັນດາແຂວງ ເຊກອງ, ສາລະວັນ, ສະຫວັນນະເຂດ, ຄໍາມ່ວນ, ບໍລິຄໍາໄຊ, ໄຊສົມບູນ, ຊຽງຂວາງ, ຫົວພັນ ແລະ ຫຼວງພະບາງ ຈົ່ງມີສະຕິລະມັດລະວັງ ຕໍ່ສະພາບຝົນຕົກ ແລະ ລົມພັດແຮງ ພ້ອມນີ້ໃຫ້ກະກຽມເກັບມ້ຽນ ຜົນລະປູກໄປໄວ້ບ່ອນທີ່ປອດໄພ ແລະ ຂໍໃຫ້ຕິດຕາມການ ແຈ້ງເຕືອນຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
