ກະຊວງແຜນການ ແລະ ການລົງທຶນເປີດຫ້ອງມູນເຊື້ອ, ກາໝາຍໃໝ່ ແລະ ເວັບໄຊຂອງຕົນ
ພິທີເປີດຫ້ອງມູນເຊື້ອ, ເປີດກາໝາຍໃໝ່ ແລະ ເປີດເວັບໄຊ ເພື່ອຈາລຶກເຖິງຄຸນງາມຄວາມດີ ຂອງພະນັກງານການນຳປະຕິວັດອາວຸໂສ ແລະ ຜົນງານດ້ານຕ່າງໆຂອງກະຊວງແຜນການ ແລະ ການລົງທຶນ ໄດ້ຈັດຂຶ້ນໃນວັນທີ 14 ສິງຫານີ້ ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງດັ່ງກ່າວ.
ທ່ານ ສອນໄຊ ສີພັນດອນ ກ່າວໃນພິທີວ່າ: ການເປີດຫ້ອງມູນເຊື້ອ, ເປີດກາໝາຍໃໝ່ ແລະ ເວັບໄຊໃນມື້ນີ້ ເປັນເຫດການທີ່ສຳຄັນຂອງຂະແໜງແຜນການ ແລະ ການລົງທຶນ ເພື່ອຈາລຶກຄຸນງາມຄວາມດີ ແລະ ສະແດງຄວາມຮູ້ບຸນຄຸນຕໍ່ພະນັກງານການນຳປະຕິວັດອາວຸໂສຫລາຍທ່ານທີ່ໄດ້ນຳພາ-ຊີ້ນຳວຽກງານແຜນການ ແລະ ການລົງທຶນໃນແຕ່ລະໄລຍະ, ພ້ອມທັງສະແດງໃຫ້ເຫັນເຖິງການເຕີບໃຫຍ່ຂະຫຍາຍຕົວຂອງກົງຈັກການຈັດຕັ້ງ ແລະ ຜົນງານຕ່າງໆທີ່ຍາດມາໄດ້. ຂະນະດຽວກັນ, ກາໝາຍໃໝ່ນີ້ແມ່ນໄດ້ຜ່ານການຄັດເລືອກຈາກ 37 ຮູບແບບທີ່ສົ່ງເຂົ້າແຂ່ງຂັນ.
ສຳລັບເວັບໄຊ (www.mpi.gov.la) ຖືເປັນບາດກ້າວໃໝ່ໃນການໂຄສະນາເຜີຍແຜ່ກ່ຽວກັບພາລະບົດບາດ, ນິຕິກໍາ, ການເຄື່ອນໄຫວ ແລະ ຜົນງານດ້ານຕ່າງໆ ເພື່ອໃຫ້ສັງຄົມ, ນັກຮຽນ-ນັກສຶກສາໄດ້ສຶກສາຮຽນຮູ້.
ທ່ານ ສອນໄຊ ສີພັນດອນ ກ່າວຕື່ມວ່າ: ການເປີດຫ້ອງມູນເຊື້ອ, ກາໝາຍໃໝ່ ແລະ ເວັບໄຊ ກະຊວງໃນມື້ນີ້ ເປັນພຽງການເລີ້ມຕົ້ນເທົ່ານັ້ນ ເຊິ່ງພາກສ່ວນຮັບຜິດຊອບຍັງຈະຕ້ອງໄດ້ສືບຕໍ່ພັດທະນາເພື່ອໃຫ້ມີຄວາມສົມບູນຍິ່ງຂຶ້ນ ແລະ ສອດຄ່ອງກັບສະພາບ ແລະ ເງື່ອນໄຂຕົວຈິງໃນແຕ່ລະໄລຍະ.
